NG'ANG'UTYET 10 - Bukuit Ne Tilil

Malaikaiyat ak Bukuit ne ming'in

¹ Ak ki ageer malaikaiyat age ne kiim kochoorugei eng' kipsengwet, kolaachi pooldet; ak ki mi chepkuinobor paragutap metinnyi, ak ki uu togeennyi asiista, ak ki uu keelyekyik tolochigap maat;

² ak ki tinyei eng' eunnyi bukuit ne ming'in ne yaataat: ak ki inde keldanyi ne po tai nyanjet, ak ki inde ne po kaataam emet;

³ ak kitwek eng' kutit ne oo, ko uu ye morori ng'etundo. Ak ye kingo kagotwek, kobolyo tuloosyek tisabu.

⁴ Ak ye kingo kagobolyo tuloosyek tisabu, amach asir: ak ki agas kutit ne punu kipsengwet kole, “Ng'ooch tuguuk che kamwa tuloosyek tisabu, amesir.”

⁵ Ak ki namji parak eunnyi ne po tai kotokyi kipsengwet malaikaiyat ne ki ageer kotonone nyanjet ak emet,

⁶ ak ki iyasyo eng' ineendet ne sabei koigeny ak koigeny, ne ki tau koyaei kipsengwet ak tuguuk che miitei olooto, ak ng'wony ak tuguuk che mi olooto, ak nyanjet ak tuguuk che mi oriit, kole ma komi kagaetapkei:

⁷ ago eng' peetuusyegap kutitap malaikaiyatap tisap, ye tuun machei koguut, kogeskei ung'ootyetap Kamuktaindet ko uu Logoiywek che Myachen che ki mwachi otwogikyik maotik.

⁸ Ak tuugeet ne ki agas kobunu kipsengwet ko ki ng'alaalwo kogeny, koleen, “Ui nam bukuit ne yaataat eng' eutap malaikaiyat ne tononi eng' nyanjet ak eng' emet ne yamaat.”

⁹ Awe anyun ole mi malaikaiyat, ak aleenji kogoono bukuinooto ming'in. Ak koleenjo, “Nam ak iam, si kogoochi kong'wanit moeng'ung', ago anyinyitu eng' kuting'ung' ko uu kuumyaat.”

¹⁰ Ak ki anam bukuit ne ming'in eng' eutap malaikaiyat, ak aam; ak ki anyiny eng' kutinnyu ko uu kuumyaat, ak kingo kaam, kong'wanit moennyu.

¹¹ Ak komwaiwo, kole, “Kanyool imaoten agobo piik che chaang' ak pororyosyek ak kutusweek ak laitorinik.”