NG'ANG'UTYET 1 - Bukuit Ne Tilil

¹ Ng'ang'utyet ne po Jeso Kristo, ne ki igoochi Kamuktaindet ineendet koboorchi otwogikyik tuguuk che piitu kochogu ne matiny. Ki iyook `ineendet malaikaiyandennyi kole koboorchi kiboityondennyi Johana,

² ne ki paoryan agobo tuguuk tugul che ki keer, nooto ko ng'olyootap Kamuktaindet ak paornateetap Jeso Kristo.

³ Paibai ineendet ne somani, ak icheek che kasei ng'aleegap maonatoni ak koriibei tuguuk che ki kisir eng' maonatoniito, amu kagoriik peetuut.

Kagatyet ne ityin Kanisosyek tisap

⁴ Sirchin Johana kanisosyek tisap che mi Asia: Ingotep myeeindo ak kaalyeet kobootok che punu ineendet ne mi, ne ki mi ak ne tuun nyoonei; ak che punu saboonwek tisap che mi taitap ng'echerennyi ne po laitornatet,

⁵ ak che punu Jeso Kristo, paoryat ne po iman, taita ne po che ki kobek ak ko pounindetap laitorinigap ng'wony. Ingobunji ineendet ne chamech ak ne kiityaachech eng' tengekwogikyok eng' korotiikyik,

⁶ ak koyaech keegu laitornatet, tisiik che poisyechin Kamuktaindet nenyi ak ko Kwanda; nenyi toroonatet ak kimnateet koigeny ak koigeny. Amen.

⁷ Ogeero! Nyoonei kobooto poolik; ak tuun keerei ineendet konda age tugul, kobooto icheek che kiga toor ineendet; ak koteiyo pororyosyek tugul che po ng'wony amu ineendet. Ee, uu nooto! Amen.

⁸ “Anee ko aa Alpha ak ko aa Omega,” mwaei Kiptaiyat Kamuktaindet, Ne po Kamuktaet, ne mi ak ko ki mi ak ko tuun nyoonei.

Ng'ang'utyet agobo Kristo

⁹ Aa Johana, tupcheng'wong' ak ko aa ne kiyamdoi tugul nyalilda ak laitornatet ak muitaet eng' Jeso, ki ami emet ne ki ikween peek ne kiguure Patmo amu ng'olyootap Kamuktaindet ak paornateetap Jeso.

¹⁰ Ki ami eng' Kabuuset ne Tiliil eng' peetuutap Kiptaiyat, ak ki agas kutit ne oo eng' patennyu ko uu ne po iryageet

¹¹ koleen, “Sirchi bukuit tuguuk che igeere ak iyookyi kanisosyek tisap; iyookyi Epheso, ak Smyrna, ak Pergamo, ak Thyatira, ak Sardis, ak Philadephia, ak Laodikia.”

¹² Ak ki awelelgei ale ageer kuutinooto ki ng'alaalwo. Ak kingo kaawelelgei ageer keelyek tisap che po taisyek che po thahabu;

¹³ ak eng' kwenutap kelyechooto po taisyek ageer chiito ne kergei ak weeriitap chii, kolaachi ngoryeet ne itei keelyek ak koratategei pireneetap thahabu eng' tegeet.

¹⁴ Ak ki leel metinnyi ak ki leelach suumeekyik ko uu koroorik che leelachen, ko uu teluji; ak ki uu konyekyik liplibenetap maat;

¹⁵ ak ki uu keelyekyik sugunwet ne sitaat miising', ko uu ne ki kitiliil eng' maat, ak ki uu tuugeennyi cheetap peek che chaang'.

¹⁶ Ki tinyei kecheik tisap eng' eunnyi ne po tai, ak ki mang'une kutinnyi rotwetap chok ne ng'atiben komoswek tuwai. Ki uu togeennyi asiista ne iluu eng' kimnateennyi.

¹⁷ Kinga keer ineendet, abutyi keelyekyik ko uu chiito ne kagome. Ago ki igonoora eunnyi ne po tai, ak kole, “Meiywei! Aneendet ko aa ne po tai ak ne po let.

¹⁸ Aa ne Sabei; kiga amei, ago keero, asabe koigeny ak koigeny; ak atinye yaateiwegap meet ak che po ye mi che ki kobek.

¹⁹ Sir anyun tuguuk che kaigeer, ak tuguuk che miitei, ak tuguuk che tuun piitu eng' let.

²⁰ Ung'ootyetap kecheik tisap che kegeer eng' eunnyu ne po tai, ak keelyek tisap che po taisyek che po thahabu ko uu ni: kecheichooto tisap ko malaikaisyegap kanisosyek tisap: ak kelyechooto tisap po taisyek ko kanisosyek tisap.