NEEMIA 9 - Bukuit Ne Tilil

Kong'aanyei piik tengekwogikwak

¹ Ki iyumgei anyun Yahudik eng' peetuutap tiptem ak ang'wan ne po arawanooto ak korugutkei, kolaachi kuniok ak kogeiilegei ng'ung'unyek.

² Ki itabaanegei `iyoteetap Israel toek tugul yeityo kotononso kong'aany tengekwogikwak ak tengekwogigap kwanisyekwak.

³ Kitononso eng' komostanywa, kosoman bukuitap Ng'atuutigap Kamuktaindet ne Toroor, Kamuktaindennywa eng' kebeberta agenge ne po ang'wan ne po peetuut. Ki ng'aany tengekwogikwak eng' kebeberta age ne po ang'wan ak kolas Kamuktaindet ne Toroor, Kamuktaindennywa.

⁴ Yeityo kotononso eng' lang'eiywotap Lawiik: Jeshua, Bani, Kadmiel, Sebania, Buni, Serebia, Bani ak Kenani. Kowaakyo eng' kutit ne oo, kowaakyi Kamuktaindet ne Toroor, Kamuktaindennywa.

⁵ Yeityo komwa Lawiik: Jeshua, Kadmiel, Bani, Hasabeneia, Serebia, Hodia, Sebania ak Petaia kole, “Otononie ak olasu Kamuktaindet ne Toroor, Kamuktaindeng'wong' kobooch koigeny agoi koigeny.” Ingoberuurok kaineng'ung' ne po toroornatet, ne itoroorot kosiir kaberuret tugul ak kalasunet.

⁶ Ii Kamuktaindet ne Toroor, inyee inyegei; ki iyai kipsengwet, kipsengwet ne po kipsengwet kobooto tuguukwak tugul, ng'wony ak tuguuk tugul che mi olooto, nyanjosyek ak tuguuk tugul che miitei, ak iriibe tuguuchooto tugul ak kolasun lugeet tugul ne po kipsengwet.

⁷ Ii Kamuktaindet ne po Toroornatet, ne ki ilewen Abram ak imutu ineendet komong' eng' Ur ne po Kaldeik ak igoochi ineendet kainet iguure Abraham.

⁸ Ki igeer ile po iman muguleldanyi eng' taing'ung', ak oyomiskei ak ineendet igoochi ineendet emetap kanaanindet, Hitindet, Amorindet, Perisindet, Jebusindet ak Girgasindet, igoochi emonooto iyotennyi ak kaiyai ng'aleeguk kosulda, amu ii po iman.

⁹ Ki igeer nyalilwogigap kwanisyekyok eng' Misiri, ak ki igas riirekwak eng' ye neegitee Araraita ne Piriir.

¹⁰ Ki ibarte kaboorunoik ak kwang'utik eng' Pharaoh, ak otwogikyik tugul ak piik tugul che po emennyi, amu ki ingen ile ki inyaliil icheek eng' menoteet. Ki igoochigei kainet, nooto ne mi agoi rani.

¹¹ Ki ipchei nyanjet eng' tainnywa, si kobun icheek kwenutap nyanjet eng' emet ne yaamaat. Ki itoorchi piik che ki isubu icheek rirosyek, ko uu ye ki wiirchin koita peek che kiimeen.

¹² Ki indochi icheek kogeny peet eng' toloitap pooldet, ak indochi icheek kemoi eng' toloitap maat, kokweng'ji ooreet ne kanyool kobun.

¹³ Ki ichoorchigei kogeny tulweetap Sinai, ak ing'alaalji icheek imi kipsengwet, ak igoochi icheek kirwoogutik che lititen, ng'atuutik che po iman, katigonutik che myach ak kayomisutik.

¹⁴ Ki iboorchi icheek konai sabatoing'ung' ne tiliil ak ing'atyi icheek ng'atuutik ak katigonutik ak Ng'atuutyet, eng' eutap Musa otwogindeng'ung',

¹⁵ Eng' rubennywa, kogiigoochi amitwogik che punu kipsengwet, ak imoong'u peek eng' rwandet agobo icheek, amu meleldanywa, yeityo ing'at icheek koba konam emet kobunji, emet ne kiga iitoochi eung'ung' igoochi.

¹⁶ Ago kiboisye icheek ak kwanisyekyok menoteet ak kouiit kaatinnywa ama kas iit ng'atuutiguk.

¹⁷ Ki eesyo icheek kogas iit, amata kobwaat kwang'utiguk che ki iyai eng' kwenunnywa, ago ki iuiit kaatinnywa. Eng' ngelelnatennywa kogilewen kiptaiyannywa komut icheek koweekyigei otwoknateet eng' Misiri. Ago ii Kamuktaindet ne ichoboot inyochi kaat, ii myee ak itinye riirge, ii Kamuktaindet ne ma sip konereechi, ak itinye rireenet ne oo, ama imete icheek.

¹⁸ Ee, agot ye kingo kagoyachigei moita ne kitanyi, ak komwa kole ni ko Kamuktaindeng'ung' ne ki imutun imong'u eng' Misiri, anan ye kingo yai tagisyosyek che eecheen,

¹⁹ koma imete icheek eng' surkwen amu rireenosyeguk che chaang'. Ma istoegei paragunnywa peet toloitap pooldet si kondochi icheek eng' ooreet. Ama istoegei icheek toloita ne po maat kemoi, si koboorchi icheek lapkeiyet ak ooreet ne kanyool kobun.

²⁰ Ki igoochi kogeny icheek Kabuuseng'ung' ne myee koneet, ama ietee icheek koam mana, ak inage peek amu meleldanywa.

²¹ Ee, ki ibai icheek eng' surkwen kenyiisyek artam, ki ma rarchi kiy icheek; ma osegitu ngoroikwak, ama ibwanso keelyekwak.

²² Ki igoochi kogeny icheek laitornatosyek ak pororyosyek che ki ipchechi icheek kobee kebeberwekwak. Ki nam icheek anyun emetap Sihon, emetap laitoryatap Hesbon ak emetap Og laitoryatap Bashan kobunji.

²³ Kogeny, ko ki ites lagokwak kotenit kecheigap kipsengwet ak imutu icheek kobwa emonooto kiga ileenji kwanisyekwak koba konam kobunji.

²⁴ Ki pa anyun lagochooto ak konam emet kobunji, ak iterteer eng' tainnywa piigap emonooto. Chooto ko ki Kanaanik ak inde icheek eunekwak kobooto laitorinikwak ak piigap emet, si koyachi icheek ko uu ye machei.

²⁵ Ki nam `icheek nganasook che ng'ootaatiin, emet ne akwai, kooriik che nyiitootiin tuguuk tugul che myachen, ak keriingonik che ki kibal, mbareenigap sabibuk, mbareenigap mseituni ak keetiik ng'iisyat che po logoek. Ki am anyun ak kibiyong'so. Kineryo ak ki igaskei eng' myeeindong'ung' ne oo.

²⁶ Ago ma kasin iit ak ki ingeleljin. Ki wiirta Ng'atuutiguk kotuktoochi patai ak kobar maotiguk che kibaoryanji, icheek kole koweech icheek kobwanjin, ak koyai tagisyosyek che eecheen.

²⁷ Nooto anyun, ki inde icheek eunegap puunikwak, che kiim icheek. Ago eng' peetuusyegap nyalildanywa, koriirchin. Ki igas eng' kipsengwet, ak ko uu eng' rireenosyeguk che chaang', ko ki igoochi icheek saruunik che ki sar icheek eng' eunegap puunikwak.

²⁸ Ago kingo kagomuuny, koyai yaityet kogeny eng' taing'ung'. Ki ibagakyi anyun eunegap puunikwak, si kobiit koboi icheek. Ago ye kingo week ak koriirchin, igas eng' kipsengwet, ak ki isaru icheek konyil che chaang' ko uu rireenosyeguk.

²⁹ Ki ibaoryanji icheek itigon, ile imutyi kogeny Ng'atuutyeng'ung', ago kiboisyee icheek menoteet, ama kas iit ng'atuutiguk, ago ki yai tengekto kongelelji kirwoogutiguk (che ngot koriip chii age tugul kosabe). Kilit oliin ak kouiit kaatinnywa ama cham kogas.

³⁰ Ki imuitoochi icheek eng' kenyiisyek che chaang'. Ki iteechine icheek Kabuuseng'ung' kobun maotiguk, ago ma cham kogas. Ara ki inde anyun icheek eunegap piigap emotinwek.

³¹ Ago eng' rireenosyeguk che chaang' koma igeesu icheek anan imete, amu ii Kamuktaindet ne po myeeindo, ak itinye rireenet ne oo.

³² Ara anyun Kamuktaindennyo ne oo ne po kamuktaet, ak ko Kamuktaindet ne po kwong'eet, ne riibei arorutyet ak rireenetapkei, amat igeer ile kiy ne ming'in, ng'wanindo tugul ne kaityech ak laitorinikyok, pounikyok, tisiikyok, maotikyok, kwanisyekyok ak piiguk tugul kobooch eng' peetuusyegap laitorinigap Assyria agoi rani.

³³ Ago ii po iman eng' tuguuk tugul che ki kobwanjech, amu ki iyai ne po iman, ago ki keyai ne ya:

³⁴ ama riip laitorinikyok kobooto pounikyok, tisiikyok anan kwanisyekyok Ng'atuutyeng'ung', ama kas iit ng'atuutiguk ak paornatosyeguk che ki ibaoryan agobo icheek.

³⁵ Amu ma otin eng' laitornatennywa ak eng' myeeindong'ung' ne oo ne ki igoochi ak eng' emet ne paraa ak ko akwai ne ki igoochi eng' tainnywa ama meto poisyonikwak che yaacheen.

³⁶ Keero, ki otwogik rani ak eng' emet ne ki igoochi kwanisyekyok koam logoekyik ak myeeindonyi. Keero, ki otwogik eng' emoniito.

³⁷ Ak rurei emoniito miising' korurchin laitorinik che ki inde koboiywech amu tengekwogikyok. Tinyei kogeny kimnateet koboi poorwekyok, kobooto tuukyok, ko uu ye machei ak kimi pichiindo ne oo.

Ng'ochetap arorutyet

³⁸ Agot eng' chooto tugul ko kagiyai arorutyet ne kiim, ak keesir, ak kong'ooch pounikyok ak Lawikyok ak tisiikyok.