NEEMIA 6 - Bukuit Ne Tilil

Parweetap Sanbalat

¹ Ak ki ngemwachi anyun Sanbalat, Tobia, Gesem Arabuindet ak puunikyok alak keleenji, ki ateech irimeet, ak ma komi ole putot, (ago eng' peetuunooto ko kitom ande kereiywek che po ormariichok;)

² koyook Sanbalat ak Gesem ng'olyo koleenjo, “Nyoo ketuiyechi nganaseet age eng' nganasook che mi warengetap Ono.” Ago ki ibwaati kole koyaiywo ne ya.

³ Ki ayookyi piik icheek koba koleenji, “Ayae poisyet ne oo, ara anyun ma muuchi achoorge. Tos amu nee si kotonon poisyet ko kachooruge anyoo ole omi?”

⁴ Ki iyook ng'olyoo ko uu nooto konyil ang'wan, ak ki awolji icheek ko uu nooto kogeny.

⁵ Eng' ne po muut, koyookwo Sanbalat otwogindennyi koip eng' eunnyi parweet ne yaataat,

⁶ ne ki kisir keele mwaat eng' pororyosyek ak komwaei Gasmu ko uu nooto kole inyee ak Yahudik ko ongelel. Ara nooto ne koonok oteech irimeet, ak ne siirei ko mwaat keele imache iegu laitoryannywa.

⁷ Ki ilewen kogeny maotik si kobiit komwaita ng'aleek agobo inyee eng' Jerusalem kole mi laitoryat Judah. Nae anyun laitoryat ng'aleechuuto. Ara anyun nyoo si kirwooch tugul.

⁸ Ki ayooktoochi chiito kwo koleenji, “Ma kiyaei tuguuk che uu che kemwa; ago iibwaati chooto inyegei eng' muguleldang'ung'.”

⁹ Kita machei pichooto tugul komuech, amu ki ibwaati kole, “Nyaluldos eunekwak eng' poisyet, si ma yaak.” Ago ki agimiit anyun eunekyuk.

¹⁰ Eng' pesyo ko ki awe kootap Semaiah weeriitap Delaiah, weeriitap Mehetabel, ne ki rataat ak ki le, “Ongetuiyechi kootap Kamuktaindet, eng' Hekaluut oriit ak ongeger kurgotigap Hekaluut, amu pwoonei icheek kobarin, ee, pwoonei kemoi kobarin.”

¹¹ Ago ki ale, “Tos nyolu komwei chii ne uu anee? Ak mi ng'oo ne uu anee, ne machei kwo Hekaluut kosar saboondanyi? Ma wendi oriit.”

¹² Ki anai iman ale ki ma iyook ineendet Kamuktaindet, ago ki yai maonatoni kole kogirindaa. Kigasir ineendet Tobia ak Sanbalat si kogoochi melekto.

¹³ Kiga kisir ineendet anyun si konyoor melekto amu ng'olyoondoni kole si aiyweis ak ayai ko uu nooto, ayai tengekto, si kosich ng'aleek che yaach che mwaitoi, kole kotaama.

¹⁴ “Ibwaat, ee Kamuktaindennyu, Tobia ak Sanbalat ko uu poisyonichuchwak ak ibwaat kogeny Noahdia chebyoset ne ki maotyot ak maotik tugul chooto che kityemei komua.”

Kigeesu teekseetap irimeet

¹⁵ Ki kigees anyun irimeet eng' peetuutap tiptem ak muut ne po arawetap Elul. Ki ek peetuusyek tugul konom ak aeng'.

¹⁶ Kingo kas puunikyok tugul, koiyweis pororyosyek tugul che kigayiemech ak kosaskei amu ki nai kole poisyoni kogiyaei Kamuktaindennyo.

¹⁷ Ki iyookto kogeny eng' peetuusyechooto piik che taagunotiin che po Judah, paronok che chaang' koba kap Tobia ak kinyoor ak icheek paronogap Tobia.

¹⁸ Amu kimi che chaang' eng' Judah che kiga koyasyechi ineendet, amu kisandetap Shekaneiah weeriitap Ara, ak kiga itun weeriinnyi Jeohanan cheptap Mesulam weeriitap Berekiah.

¹⁹ Ki ng'alaal kogeny agobo poisyonikyik che myach eng' tainnyu, ak ki ipchi ng'aleekyuk ineendet. Ki iyook Tobia paronok kole komua.