NEEMIA 5 - Bukuit Ne Tilil

Koriirchin `piik Nehemiah

¹ Ki piit riirek che ng'woneen eng' piik ak eng' osotikwak agobo tupchosyekwak Yahudik.

² Amu kimi che ki mwa kole ki chaang' acheek kobooto weeriikyok ak tiibiikyok: ongecheeng'jige peek, si kobiit keam ak kesapche.

³ Ki mi alak kogeny che ki mwa kole kigoitoi mbareenikyok, ak mbareenikyok che po sabibuk, ak kooriikyok si kotononwech, si kiyan kegoonech peek amu rubeet.

⁴ Ki mi alak kogeny che ki mwa kole kogiarorte mbareenikyok, ak mbareenikyok che po sabibuk kotononwech kebesene fedhaisyek si kobiit kigoite aisuruut ne po laitoryat.

⁵ Ago kergei anyun poorwekyok ak che po tupchosyekyok, lagokyok ko kergei ak lagokwak: ak ogeero, kimutu weeriikyok ak tiibiikyok kobwa ratisyet si koek otwogik, ak kagimutu tiibiikyok alak kobwa ratisyet: ama ki tinyei kimnateet keesye kioto; amu tinyei piik alak mbareenikyok ak mbareenikyok che po sabibuk.

⁶ Ak ki anereech miising' kinga kas riirekwak ak ng'aleechuuto.

⁷ Ki abwaat anyun aneege, ak ki kitiiye ak piik che taagunotiin ak pounik, ak aleenji icheek, “Omage keljinet ne siirei ne nyolu, chii age tugul tupchennyi.” Ak ki ayai tuiyet ne oo kegirindae icheek.

⁸ Ak ki aleenji icheek, ko uu kiit ne tee kamugennyo, ko kogityaach tupchosyekyok Yahudik che kiga kialdochi pororyosyek; ak tos oaldoi tupchosyekwok si tuun oaldawech icheek? Kosiisyo anyun, ma sich kiy ne wolu.

⁹ Ki amwa kogeny ale kiit ne oyae koma myee. Tos ma nyoljinok obendate kaiyweisyetap Kamuktaindennyo si kogiring'da chotisyetap pororyosyek che puunikyok?

¹⁰ Ak ki kibesendochi `icheek fedhaisyek ak peek ko uu nooto, anee, tupchosyekyuk ak otwogikyuk si kesich keljinet. Asoomok ale kemete poisyonep keljinet.

¹¹ Asoomok oweekyi icheek rani mbareenikwak, mbareenikwak che po mseituni, ak kooriikwak, ak oweekyi kogeny kebeberta agenge eng' pogol ne po fedhaisyek, ak ne po peek, ak divaik, ak mwanik, che ki omage icheek.

¹² Komwa anyun kole, kiweekyini icheek, ama kemage kiy icheek; kiyae anyun ko uu nooto, ko uu ye kemwa. Ki aguur anyun tisiik, ang'at koyasyo kole koyai ko uu kayomisutyoni.

¹³ Ki aleglekte kogeny ngoryennyu ale, “Ingoleglekta ko uu nooto Kamuktaindet chii age tugul komong' eng' koonnyi ak eng' poisyennyi ne ma yai kayomisutyoni; ingeleglekta ko uu nooto kot koma kotinyei kiy.” Ak ki mwa piik tugul che po tuiyet kole, “Ee ingoyaak ko uu nooto,” ak kolas Kamuktaindet ne Toroor. Ak ki yai piik ko uu kayomisutyoni.

Aiyebindap Nehemiah

¹⁴ Kogeny kobooch peetuut ne ki kindea aek pounindennywa eng' emetap Judah, kong'etee kenyiitap tiptem agoi kenyiitap sosom ak aeng' ne po Laitoryat Artaserses ko ki ek chooto kenyiisyek taman ak aeng'; ki ma kiam ak tupchosyekyuk amitwogigap pounindet.

¹⁵ Ago ki igoochi mileet piik pounik che po tai che ki indounena, ak ki ibe icheek magatiinik ak divaik, koma pooto shekelisyek artam che po fedha; ee, kiboi agot otwogikwak piik: ago ki ma ayai anyun ko uu nooto, amu kaiyweisyet ne aiywei Kamuktaindet.

¹⁶ Ee, ki awe tai kogeny eng' poisyetap irimoni, ama ki al kooret age tugul; ak ki iyumjigei yuto otwogikyuk tugul si kobois.

¹⁷ Ki amisye kogeny mesennyu Yahudik ak pounik, murenik pogol ak konom, koma pooto icheek che ki pwa ole ki kimi, che ki mong'u eng' pororyosyek che kiyiemech.

¹⁸ Che kiga kichop agobo peetuut agenge ko ki eito agenge ak keechiirek lo che ki kilewen; ak ki kichobwa ngogaik, ak ki kichop divaik alak tugul konyil agenge eng' peetuusyek taman; agot eng' chuuto tugul koma amach amitwogigap pounindet amu ki oo otwoknateet eng' pichu.

¹⁹ Ibwaata, ee Kamuktaindennyu, eng' tuguuk che myach, amu tugul che ki ayachi pichu.