NEEMIA 4 - Bukuit Ne Tilil

Chotisyetap Sanbalat

¹ Ago ye kingo kas Sanbalat kole kiteechei irimeet, konereech. Kinyit ineendet miising' ak kochot Yahudik,

² ak ki ng'alaal eng' taitap tupchosyekyik ak lugeetap Samaria kole, “Yaei nee anyun Yahudichu nyalulyotin? Tos igimitigei? Tos igoitoi koroseek? Tos igeesu eng' peetuut agenge? Tos ing'eeti koik komang'une karurugutigap pusagaryek che ki kolalyo?”

³ Ki mi ak ineendet Tobia Amonindet ak ki le, “Agot nooto teechei, ko ngot kolaany lelwot kobutei irimennywa ne po koik.”

⁴ Kas ee Kamuktaindennyo amu kisasech. Iweekyi icheek churisyennywa kotebee metowekwak ak igoite icheek keluul koba emet ne kiluuljin.

⁵ Amat ketuch tengektonywa, amat kibukto ng'oogistonywa eng' taing'ung' amu ki kotachin eng' taitap teegik.

⁶ Ki kiteech anyun irimeet; ak ki kituiyo irimeet tugul kot koit kebeberta ne po kooindap tononennyi amu ki tinyei piik mugulelwek che chamei poisyet.

⁷ Ago kingo kas Sanbalat, Tobia, Arabuuk ak Amonik kobooto Asdodik kole wendi tai teekseet ne keteechei irimoigap Jerusalem che kiga kobutok ak kole kityemei ole kiga koundur, konereekso miising'.

⁸ Ki irwooch tugul kibagenge kole kobwa ak kobargei ak Jerusalem ak kong'eet pooryeet eng' yooto.

⁹ Ago ki kisaa Kamuktaindennyo ak ki kinde riibiik koriipso peet ak kemoi amu icheek.

¹⁰ Ki toi piigap Judah kong'unyng'ung'so ak kole, “Kagogeskei kimnateetap che laei tuguuk ak ta komiitei pusagaryek che chaang' kot koma kimuuchi keteech irimeet.”

¹¹ Ak kileen ak icheek puunikyok, “Ye tomo konai icheek anan kogeer kiit ne tesetai, ko kageit kwenunnywa, kebar icheek ak keger poisyet kotonon.”

¹² Kingo pwa Yahudik che ki menyei ole neegitee icheek, komwaiwech konyil taman eng' komoswek tugul kole, “Kanyool oweekyeigei.”

¹³ Ki ande anyun piik komoswek che rektoot eng' irimeet patai eng' ole ma mi kiy, ande kobee ortinwekwak kotinyei rotonikwak po chok, ng'otwekwak ak kwangokwak.

¹⁴ Ak ye ki ageer ole uu, ang'eet ak aleenji piik che taagunotiin, pounik ak piik tugul, “Amoiywei icheek. Obwaat Kamuktaindet ne Toroor ne oo ak ko po kamuiset ak oyai lugeet agobo tupchosyekwok, weeriikwok, tiibiikwok, osotikwok ak kooriikwok.”

¹⁵ Kingo kas puunikyok kole kigegas kiito ak ki kowal Kamuktaindet kirwoogennywa koek puch, keeweekyigei anyun tugul irimeet, kwo chii tugul poisyennyi.

¹⁶ Kobooch peetuunooto ak kwo tai, kogiyai poisyet kebebertap otwogikyuk, konamei kebeberta age ng'otwek, long'ik kobooto kwangok ak ngoroik che po kariik. Kitabanu let pounik che po koot komugul ne po Judah

¹⁷ che kiteechei irimeet, ak che kilaei tuguuk, koginamjingei icheegei, koyai chii poisyet eng' euut age, koname euut age kariikyik,

¹⁸ ak eng' teegik, ko ki tinyei chii tugul rotwennyi po chok ne kiga rat, asi koteeksei. Ak kimi ye neegiteena ne kuutei iryageet.

¹⁹ Ki aleenji piik che taagunotiin ak pounik kobooto piik tugul, “Oo poisyet ak ko paraa, ak kagisirarchine eng' irimeet, keloochine.

²⁰ Oldo tugul ole kogasyi iryageet, oyumjeigei eng' yooto. Yaiywech lugeet Kamuktaindennyo.”

²¹ Ki kiyai anyun poisyet kobooch ko kachor asiista agoi kogatook kecheik, ak ki nam kebeberta age ne po pichooto ng'otwek.

²² Ki aleenji piik anyun eng' peetuunooto, “Ingotebee chii age tugul kobooto otwogindennyi Jerusalem oriit, asi koek riibiikyok che riipsei kemoi ak komuuchi kobois peet.”

²³ Eng' kasarata, ko ki ma kiregu ngoroikyok; anee, anan tupchosyekyuk anan otwogikyuk anan piik che kiriipsei che ki isubwo; ki wo chii age tugul ak kariikyik agoi aineet.