NEEMIA 2 - Bukuit Ne Tilil

Kowendi `Nehemiah Jerusalem

¹ Eng' arawetap Nisan, eng' kenyiitap tiptem ne po Laitoryat Artaserses, anemu divaik che ki mi tainnyi ak agoochi laitoryat. Amu kitom aarageni eng' tainnyi,

² koteebena laitoryat koleenjo, “Amu nee si komi arageneet togeng'ung', ago memyani? Niito koma kiit age ago arageneetap muguleldo.” Kingo mwaiwo ko uu nooto, aaragen anyun miising'.

³ Ki aleenji laitoryat, “Ingosap laitoryat koigeny. Kalya si ma aaragen togeennyu ago ki koek karaatya nganaseet ye mi kereeriisyegap kwanisyekyuk ak ki kolalyo ormariichokyik?”

⁴ Komwaiwo anyun laitoryat koleenjo, “Nee ne isoome?” Ki asaa anyun Kamuktaindetap kipsengwet,

⁵ yeityo aleenji laitoryat, “Ngo cham laitoryat ak ngo kagonyoor otwogindeng'ung' chameet eng' taing'ung', iyookto anyun awo Judah agoi nganaseetap kereeriisyegap kwanisyekyuk si kobiit ateech.”

⁶ Ak kiteebena laitoryat koleenjo, (kimi osotyonnyi ak ineendet,) “Po peetuusyek ata pandang'ung', ak iweeksei au?” Ki cham anyun laitoryat koyookta, ak ki amwachi peetuusyek che awendi.

⁷ Ki amwachi kogeny laitoryat aleenji, “Ngo cham laitoryat, ingegoono paronok che po pounik che mi aineet pitoniin, si kochamwo asiirto agoi ait Judah.

⁸ Ingogoono parweet ne kisirchin Asaph riibindetap timdap laitoryat, si kogoono keetiik ayae pagoinigap kurgotik che po irimeet ne ki namgei ak koot, che po irimeetap nganaseet ak che po koot ne awendi.” Ki koono laitoryat ko uu nooto, amu kimi euut ne myee ne po Kamuktaindennyu kobooto.

⁹ Ki ait anyun ye mi pounik che ki mi aineet pitoniin, ak agoochi icheek paronogap laitoryat. Ki iyookto laitoryat kiptainigap lugeet ak piik che ketei paraisisyek kobooton.

¹⁰ Kingo kas ng'aleechu `Sanbalat Horonindet ak Tobia otwogindet ne Amonindet, kogas icheek ng'wanindo ne oo amu kanyo chiito si kobiit kocheeng'ji piigap Israel sabeet ne myee.

¹¹ Ki ait anyun Jerusalem ak ki atebee yooto peetuusyek somok.

¹² Ki ang'eet kemoi anee ak piik che ng'ering' che ki mi kobooto, amamwachi chii age tugul kiit ne ki inde Kamuktaindennyu muguleldanyu ayachi Jerusalem. Ki ma komi tyony age tugul kobooto, kobatee ne ki abune.

¹³ Ki amande kemoi eng' ormariichet ne po atebweet, ne tokyingei kondap peek ne po maswetit, agoi ormariichetap kiptangasyat ak ki atoben irimoigap Jerusalem che kiga kobutok ak ormariichook che kiga kolalyo.

¹⁴ Ki awe anyun ormariichetap kondap peek agoi tamboiyotap laitoryat, ago ki ma piit ole punei tyondo ne ki abunoti.

¹⁵ Ki atogoste anyun kemoi abun tabandap kereruut ak atoben amarar irimeet, yeityo aweege anyoo abunu ormariichet ne po atebweet ak aweege.

¹⁶ Ki ma nai pounik ole kigawe anan kiit ne ki ayai, amu kitom amwachi Yahudik anan ko tisiik anan ko piik che taagunotiin anan ko pounik anan ko che kiboisyei.

¹⁷ Yeityo aleenji, “Ogeere nyalili kimi, ko uu Jerusalem ak ormariichokyik che ki kolalyo ak koek karaatya. Ara obwa anyun keteech kogeny irimeetap Jerusalem, si mata keegu che kichoosei.”

¹⁸ Ki amwachi kora icheek agobo euut ne myee ne po Kamuktaindennyu ne ki mi kobooto, ak ki amwachi kogeny ng'aleegap laitoryat che kiga komwaiwo. Ki wol icheek kole, ongeng'eetyee keteekse. Ki igimitkei anyun eng' poisyet ne myee.

¹⁹ Ago kingo kas Sanbalat Horonindet, ak Tobia otwogindet ne Amonindet, ak Gesem Arabuindet, kororechech, kochotech ak kosasech ak kole, “Nee kii oyae? Ongeleljini laitoryat?”

²⁰ Ki awolji anyun icheek aleenji, koonech Kamuktaindetap kipsengwet kabelisyet; nooto anyun king'eetosi acheek otwogikyik ak keteech irimeet, ago okweek, ko motinye kebeberya neng'wong' anan kiy ne oyaache eng' Jerusalem.