NEEMIA 13 - Bukuit Ne Tilil

Piigap pororyosyek alak

¹ Kingesoman eng' peetuunooto bukuitap Musa kogas piik, ko ki kinyoor ng'aleek che ki kisir keele machutei Amonindet ak Moabindet tuiyetap Kamuktaindet koigeny,

² amu ki ma toroogune piigap Israel amitwogik ak peek. Machutei amu ki igoochi Balaam melekto kogirinda icheek ak kochupto icheek, ago ki wal Kamuktaindennyo chubisyet koek kaberuret.

³ Kingo kas icheek Ng'atuutyet, koisto tuiyet tugul piik che salu pororyosyek alak komang'une Yahudik.

Kalititutik Nehemiah

⁴ Ye ki tomo koyaak ng'olyoondoniito, ko kiga kochop Eliasib tisiindet ne kiga kilewen koboi kooriik che po oriit che po koot ne oo ne po Kamuktaindennyo. Kichopchi ineendet Tobia ne kitilyanut

⁵ koot ne ki kigonoree kobooch keny kagoochinoik che po peek che ng'ootiin, tuguuk che nyamdut, tereenik, kebeberwegap taman che po peek, che po divaik ak che po mwanichooto ki mwa ng'atuutik kole kigoochi Lawiik, tyeniik ak riibiigap kurgotik, ak kagoochinoigap tisiik.

⁶ Ago eng' peetuusyechooto tugul kitesei tai ng'aleechu, ko ki ma ami Jerusalem, amu kigawe kaplaitoryat eng' kenyiitap sosom ak aeng' ne po Artaserses laitoryatap Babilon, ak kingo pata peetuusyek alak asoom laitoryat kochamwo awo.

⁷ Ki anyoo Jerusalem ak agas yaityet ne kiga koyai Eliasib agobo Tobia, amu kichopchi ineendet koot ne po oriit eng' seremusyegap kootap Kamuktaindet.

⁸ Ki koono niito aaragen miising'. Ki awirte anyun komanda eng' koyooto po oriit tuguuk tugul che po kootap Tobia.

⁹ Yeityo ang'at kitiliil koorichooto po oriit. Ki aip kogeny tuguugap kootap Kamuktaindet koba yooto, kobooto kagoochinoigap peek che ng'ootiin ak tuguuk che nyamdut.

¹⁰ Ki anai ale ma kigoochi Lawiik kebeberwekwak, amu nooto anyun, ko kiga komwei age tugul kwo mbareennyi eng' Lawiik ak tyeniik che kiyaei poisyet.

¹¹ Ki ager kong' anyun pounik aleenji, “Amu nee si kebagaakta kootap Kamuktaindet?” Ak ki ayum tugul che kiga komweiso ak ande icheek komostanywa.

¹² Ki ip anyun Judah tugul kebeberwegap taman che po peek ak che po divaik ak che po mwanik, konde ole kigonoree tuguuk.

¹³ Ki ande riibiik koriip ole kigonoree tuguuk, Selemya tisiindet, Zadok siriindet, ak eng' Lawiik ko Pedaiah. Kirubei icheek Hanan weeriitap Sakur, weeriitap Mattaniah amu ki kiit keele piik che kiyani ak ki poisyennywa ko kopchechi tupchosyekwak tuguuk.

¹⁴ Ibwaata, ee Kamuktaindennyu agobo ng'olyoondoniito, amat ibuch poisyonikyuk che myach che ki ayai agobo kootap Kamuktaindennyu ak poisyonikyik.

¹⁵ Ki ageer eng' peetuusyechooto eng' Judah alak che kityechei sabibuk eng' ole kituisye eng' peetuutap sabato, koibu ratuutigap peek che karatyi sigiroik. Ki yai ko uu nooto eng' divaik, sabibuk, logoegap mogoonik ak lautik alak tugul che ki ibu kobwa Jerusalem eng' peetuutap sabato. Ki ager kong' icheek eng' peetuunooto mat koalda amitwogik.

¹⁶ Kimenyei olooto piigap Tyro ak icheek che ki ibu njireenik ak tuguuk alak tugul che po mung'aaret, si koaldochi lagogap Judah eng' peetuutap sabato eng' Jerusalem.

¹⁷ Yeityo ager kong' piik che taagunotiin che po Judah, aleenji icheek, “Nee yaityoni oyae, ong'eme peetuutap sabato?

¹⁸ Tos ki ma yai ko uu nooto kwanisyekwok ak tos ki ma ibwech Kamuktaindennyo yaityoni tugul ak nganasani? Ang'ni ra koipchi Israel nereegek che siirei eng' ng'emetap sabato.”

¹⁹ Ye kingo mach koimen eng' ormariichogap Jerusalem ye kitom koit sabato, ang'at keger ormariichok ak ang'at ale ma kiyatei kot kogeskei sabato. Ki ande otwogikyuk alak koriip ormariichok si ma ki ip konyo oriit lautyet age tugul eng' peetuutap sabato.

²⁰ Ki tebee anyun saang'utap Jerusalem konyil agenge anan aeng' chemung'arainik ak che aldoi tuguuk alak tugul che po mung'aaret.

²¹ Ki awagee icheek aleenji, “Amu nee si otebee ole neegitee irimeet? Ngot kota oyai ko uu no kogeny, anamok.” Kobooch peetuunooto ko mata kobwa icheek eng' peetuutap sabato.

²² Ki ang'at Lawiik koanyinygei ak kobwa koriip ormariichok, kotabaan peetuutap sabato. “Ibwaata, ee Kamuktaindennyu, agobo ng'olyoondoniito agine, ak iriirena ko uu ooindap rireeneng'ung'.”

²³ Ki ageer kogeny eng' peetuusyechooto Yahudik che kiga kotun tiibiigap Ashdod, che po Ammon ak che po Moab.

²⁴ Ki ng'alaali kebeber eng' lagokwak ng'aleegap Asdodik anan ko kutusweegap pororyennywa amu ki ma komuuchi kong'alaal kutitap Yahudik.

²⁵ Ki ager kong' icheek ak achup, abir alak eng' icheek ak ang'ei sumekwak, yeityo abirchi icheek koyasyo eng' Kamuktaindet aleenji, “Amat ogoochi tiibiikwok weeriikwak anan otunji weeriikwok tiibiikwak anan otun okweeget.

²⁶ Tos ki ma yai tengek Solomon laitoryatap Israel eng' tuguuchu? Nganda ki ma komi laitoryat ne uu ineendet eng' pororyosyek che chaang' ak ki chamat eng' Kamuktaindennyi, ak ki inde `Kamuktaindet ineendet koek laitoryat koboi Israel tugul; ko ki igoochi tiibiigap pororyosyek alak ineendet koyai tengekto.

²⁷ Tos kigasak iit anyun ak keyai yaityoni oo tugul, kingelelji Kamuktaindennyo kitun tiibiigap pororyosyek alak?”

²⁸ Ki saania eng' kap Sanbalat Horonindet age eng' weeriigap Joiada, weeriitap Eliasib tisiindet ne oo. Ki aoon anyun ineendet kwo eng' ole ami.

²⁹ Ibwaat icheek, ee Kamuktaindennyu, amu ki kong'waniit tiseinateet, ak kayomisutyetap tiseinateet ak ne po Lawiik.

³⁰ Ki aanyiny Tisiik ak Lawiik anyun eng' piigap pororyosyek tugul, ak ang'at poisyonikwak si koyai age tugul poisyennyi.

³¹ Ki ang'at tuguuk che po kagoochinetap kweenik ak che po tongoanik keip eng' peetuusyek che ki king'at. Ibwaata, ee Kamuktaindennyu eng' tuguuk che myach.