NEEMIA 11 - Bukuit Ne Tilil

Meng'iigap Jerusalem ko kaibata teekseet

¹ Ki meny anyun Jerusalem `kandoigap piik, ak ki iseer parbareek piik che ki ng'et si komut kebeberta agenge eng' taman ne po piik komeny Jerusalem, nganaseet ne tiliil ak kebeberwek sogool eng' taman ne po piik, komeny nganasook alak.

² Ki iberuur piik murenik tugul che ki igoitogei eng' chamyet komeny Jerusalem.

³ Chu ko piik che eecheen che po emotinwek che ki meny Jerusalem, ago ki meny chii tugul komostanyi eng' nganasoogap Judah eng' nganasookwak, chooto ko ki Israel, tisiik, Lawiik, otwogigap Hekaluut ak lagogap otwogigap Solomon.

⁴ Ak ki meny Jerusalem alak eng' lagogap Judah ak eng' lagogap Benjamin. Che po lagogap Judah ko ki Ataia weeriitap Uzziah, weeriitap Zekariah, weeriitap Amariah, weeriitap Shepatiah, weeriitap Mahalalel, ne po lagogap Peres;

⁵ ak Maaseia weeriitap Baruk, weeriitap Kolhose, weeriitap Hasaia, weeriitap Adaiah, weeriitap Joiarib, weeriitap Zekariah, weeriitap Silonindet.

⁶ Ki ek weeriik tugul che po Peres che ki menyei Jerusalem pogol ang'wan ak tamanwogik lo ak sisiit, murenik che nyigoonen.

⁷ Eng' weeriigap Benjamin: Salu weeriitap Mesulam, weeriitap Joed, weeriitap Pedaiah, weeriitap Kolaia, weeriitap Maaseia, weeriitap Itiel, weeriitap Jesaia.

⁸ Kirubei ineendet Gabia, Salai. Ki piik pogol sogool ak tiptem ak sisiit.

⁹ Ki pounindennywa Joel weeriitap Zikri, ak ki ne po aeng' ne ki pou nganaseet Judah weeriitap Hasenuah.

¹⁰ Che po tisiik ko ki: Jedaiah weeriitap Joiarib, Jakin,

¹¹ Seraiah weeriitap Hilkiah, weeriitap Mesulam, weeriitap Zadok, weeriitap Meraiot, weeriitap Ahitub, pounindetap kootap Kamuktaindet,

¹² ak tupchosyekwak che ki yai poisyetap koot, ko ki piik pogol sisiit ak tiptem ak aeng'; ak Adaiah weeriitap Jeroham, weeriitap Pelalia, weeriitap Amsi, weeriitap Zekariah, weeriitap Pasur, weeriitap Malkija,

¹³ ak tupchosyekyik, che eecheen che po kooriigap kwanisyek, ko ki piik pogol aeng' ak artam ak aeng'. Amashai weeriitap Asarel, weeriitap Asai, weeriitap Meshillemoth, weeriitap Imer,

¹⁴ ak tupchosyekwak, murenik che kiimeen che nyigoonen, ko ki pogol ak tiptem ak sisiit, ak ki pounindennywa Sabdiel, weeriitap Hagedolim.

¹⁵ Che po Lawiik ko ki Semaiah weeriitap Hasub, weeriitap Asrikam, weeriitap Hasabia, weeriitap Buni,

¹⁶ ak Sabetai, Josabad, che po che eecheen eng' Lawiik, che ki pou poisyetap saang' ne po kootap Kamuktaindet,

¹⁷ ak Mattaniah weeriitap Mikah, weeriitap Sabdi, weeriitap Asaph, ne ki ne oo ne ki tau komwaei kongoi eng' saaet, Bakbukia, ne po aeng' eng' tupchosyekyik ak Abda weeriitap Samua, weeriitap Galal, weeriitap Jeduthun.

¹⁸ Lawiik tugul che ki mi nganaseet ne tiliil ko ki pogol aeng' ak tamanwogik sisiit ak ang'wan.

¹⁹ Kogeny, kibogol ak tamanwogik tisap ak aeng' riibiigap kurgotik, chooto ko ki: Akub, Talmon ak tupchosyekwak tugul che kiriipsei eng' ormariichok.

²⁰ Ak che ki ng'et che po Israel, eng' Tisiik ak Lawiik, ko ki mi nganasook tugul che po Judah, chii age tugul eng' ole mi porotennyi.

²¹ Ago ki meny otwogigap Hekaluut Ophel. Ki pou otwogichooto po Hekaluut Siha ak Gispa.

²² Ki pounindetap Lawiik eng' Jerusalem Usi weeriitap Bani, weeriitap Hasabia, weeriitap Mattaniah, weeriitap Mikah, ne po weeriigap Asaph, tyeniik, che ki pou poisyet ne po kootap Kamuktaindet.

²³ Amu kimi ng'atuutyet ne king'atyi icheek laitoryat, ak tuguuk che ki kichopchi tyeniik, che yamei peetuut age tugul.

²⁴ Petaia weeriitap Mesesabel, ne po lagogap Zerah weeriitap Judah, ko kitoretindetap laitoryat eng' ng'aleek tugul che po piik.

Piigap nganasook alak

²⁵ Eng' nganasook kobooto mbareenikwak, kogimenyei alak eng' lagogap Judah, Kiriath-arba ak nganasookyik, eng' Dibon ak nganasookyik, eng' Jekabseel ak nganasookyik,

²⁶ eng' Jeshua, eng' Molada ak Beth-pelet,

²⁷ ak eng' Hasar-sual, eng' Beer-sheba ak nganasookyik,

²⁸ eng' Ziklag, eng' Mekono ak nganasookyik,

²⁹ eng' En-rimon, eng' Sora, eng' Jarmut,

³⁰ Sanoa ak Adulam ak nganasookwak, Lakish ak mbareenikyik, Aseka ak nganasookyik. Ki meny anyun kobooch Beer-sheba agoi atebweetap Hinom.

³¹ Ki meny lagogap Benjamin ak icheek kobooch Geba ak kwo tai, eng' Mikmas ak Ahija, ak eng' Bethel ak nganasookyik;

³² eng' Anatoth, Nob, Anania,

³³ Hasor, Ramah, Gitaim,

³⁴ Hadid, Seboim, Nebalat,

³⁵ Lod ak Ono ak atebweetap musogik.

³⁶ Ki iyomogei ak Benjamin, Lawiik alage che po Judah.