NEEMIA 1 - Bukuit Ne Tilil

Kosaachin `Nehemiah piikyik

¹ Che isubi ko ng'aleegap Nehemiah weeriitap Hakalia: Eng' arawetap Kisleb eng' kenyiitap tiptem, ye ki ami Susa eng' kaplaitoryat,

² konyo Hanani, age eng' tupchosyekyuk ak piik alak che ki punu Judah. Ki ateebee icheek agobo Yahudik che kiga kochililso, che ki ng'et eng' che kiga keluul, ak ateebee kora agobo Jerusalem.

³ Kimwaiwo icheek kole, “Tinyei nyalilda ne oo ak churisyet eng' emonooto piik che ki ng'et eng' che kiga keluul. Ki kobutok agine irimeetap Jerusalem ak ki kebeel ormariichokyik.”

⁴ Ye kinga kas ng'aleechuuto, atep ng'wony ariir ak aaragen eng' peetuusyek alak, ki arugutkei ak asaa eng' taitap Kamuktaindetap kipsengwet.

⁵ Yeityo ale; “Asaain, ee Kamuktaindet ne Toroor, Kamuktaindetap kipsengwet, Kamuktaindet ne oo ne po kwong'eet, ne riibei arorutyet ak rireenet eng' icheeget che chamei ineendet ak koriibei ng'atuutikyik:

⁶ ingoep iit itiiguk ak koyatagis konyeguk, si kobiit igas saaetap otwogindeng'ung' ne asaain eng' saini, peet ak kemoi, agobo piigap Israel otwogiguk, ye ang'aanye tengekwogigap piigap Israel, che kigeyaun. Ee, ki ayai tengekto kobooto kootap kwandanyu.

⁷ Ki keyaun ne ya miising', ama ki riip ng'atuutik anan kayomisutik anan kirwoogutik che ki ing'at otwogindeng'ung' Musa.

⁸ Asaain ale, ibwaat ng'olyoot ne ki ing'at otwogindeng'ung' Musa, ileenji, ‘Ngot obistoe aiyestook obe ye mi pororyosyek,

⁹ ago ngot oweekyage, oriip ng'atuutikyuk ak oyai, ko agot ngo ki kiyestochok tabandap kipsengwet, ayumi kobwa eng' olooto ak amutu kobwa ole ki alewen ande kainennyu kotebee.’

¹⁰ Ara anyun chuuto ko otwogiguk ak ko piiguk, che ki ityaach eng' kamuktaeng'ung' ne oo ak eng' eung'ung' ne kiim.

¹¹ Asaain, ee Kiptaiyat, ale, ingoepchi iit iting'ung' saaetap otwogindeng'ung' ak saaetap otwogiguk che igaasegei koywei kaineng'ung'. Asaain ale, igoochi otwogindeng'ung' koboor eng' peetuuni ak igoochi ineendet rireenet eng' taitap chiichi.” (Eng' peetuusyechooto, kogio ne ipchin laitoryat kigombet.)