NAHUM 2 - Bukuit Ne Tilil

Ng'emisyet ne nyoonjin Nineveh

¹ Kagonyo taing'ung' ineendet ne tuisyei. Riip irimeet, riip ooreet! Kermenegei kimnateet, tes kimnateng'ung' koeet miising'.

² Weegu kogeny `Kamuktaindet ne Toroor telunatetap Jakobo, ko uu telunatetap Israel, nganda ki koluul icheek `luulenik, ak kong'em mooriigap keetiikwak che po sabibuk.

³ Kigesal long'onigap piikyik che kiimeen kobiriritu, ilaachi piikyik che nyigoonen ngoroik che piriireen. Ilyeldos kariigap lugeet ko uu kariik eng' peetuutap chobennyi pogei, ak parbari ng'otwek miising'.

⁴ Kirgirendos kariisyegap lugeet eng' ortinwek, rusotegei eng' ortinwek che paroen. Uu tagunatennywa tochisyek, rwaei ko uu kalyelyosyek.

⁵ Kuurei `ineendet piikyik che po teegisto; ichaboitoi icheek kobendi, choktoi kobendi irimeet, ak kechop kiit ne tektoegei.

⁶ Yaatatin kurgotigap ainoosyek, ak kochoot kootap laitoryat.

⁷ Kageng'aany Huzzab, kagimut kolooit. Riirtos tiibiikyik eng' kutit ne uu ne po cheptugenik, ak korabachi tegetikwak.

⁸ Ki koigei `Nineveh tamboiyotap peek ne kagobutok, che rootei peekyik kobendi; kuurse koleen, “Otononie! Otononie!” Ago ma mi ne kusegong'.

⁹ Oip parunenigap fedha, oip parunenigap thahabu! Ma igeesugei tuguuk che konorotiin! Chaang'indap kiy age tugul ne karaaran!

¹⁰ Ma mi kiy, mi puch, ki koek karaatya! Chootei muguleldo, ak piregei kutung'oik, ak komi ng'wanindo suenutik tugul, walaksei togoochigap icheek tugul.

¹¹ Mi ano kebeneetap ng'etuunyik ng'etuunyik che neranik, ole wendote kirgitap ng'etuny ak ne kotoy, kobooto aarwetap ng'etundo, ama mi chii ne imui?

¹² Kitonaton ng'etundo che yamei aarekyik, ak ki parchi ng'etuunyikyik che kotoen; ak konyiit kebenonikyik tyong'ik che kagobar, ak konyiit kebenonikyik panyeek che kagotonaton.

¹³ Keero, aboryenen, mwaei Kamuktaindet ne Toroor ne po lugoosyek, ak abeel kariisyeguk che po lugeet eng' iyeto, ak kobar rotwetap chok ng'etunyiguk che neranik; ageesu eng' ng'wony tyong'iguk che ibare, ama kegasei kogeny kutitap piiguk che kiyooktoi.