MIKAH 3 - Bukuit Ne Tilil

Pounik ak Maotik che yaach

¹ Ki amwa ale, Ogaso; asoomok okweek kandoigap Jakobo ak pounigap kootap Israel, tos manyoljok onai kirwooget?

² Che oweche myeeindo ak ochame yaityet; che onemu irirenikwak kobooto panyeekwak eng' kawekwak;

³ che amei kogeny panyeegap piikyuk; ak koenyei irirenikwak, ak koiri kawekwak: ee, tonatoni, ko uu che kindo tereet, ak ko uu panyeek che kiyoi eng' saburyet.

⁴ Ye ibata koriirchi Kamuktaindet ne Toroor, ago mawoljin: ee, ung'e togeennyi icheek eng' peetuusyechooto, ko uu ye ki yai yaityet eng' poisyonikwak.

⁵ Mwaei Kamuktaindet ne Toroor ko uu ni agobo maotik che igoochin piikyuk ko leel; kowaaktos koleen, kaalyeet, ye tinyei icheek kiy ne amei, yeityo koyai lugeet koyachi che ma tinyei kiy ne indoi kuut.

⁶ Egu anyun kemout eng' okweek, si mogeer kiy; ak koimenit eng' okweek si mogeer ng'ang'uut; ak kororokto asiista eng' maotik, ak koimenit peetuut eng' icheek.

⁷ Ak kolilaanso keerik, ak kotoptobenso piik che ng'oorsei; ak kagonamgei kuut tugul, amu ma mi waluunet ne punu Kamuktaindet.

⁸ Ago kanyiia iman kimnateet eng' Kabuusetap Kamuktaindet ne Toroor, ak eng' kirwooget, ak eng' kamuget, si kobiit amwachi Jakobo pistoennyi, ak amwachi Israel tengektanyi.

⁹ Asoomok anyun ale ogas niito, okweek kandoigap kootap Jakobo, ak pounigap kootap Israel, che oweche kirwooget, ak omaasi imanda tugul.

¹⁰ Teege Zion korotiik, ak koteege Jerusalem tengekto.

¹¹ Irwoochi kandoik amu tuguuk che kigoigoisye ak ineetisyei tisiik amu melekto, ak kong'orsei maotikyik amu silingisyek: nganda uu nooto kotiegei Kamuktaindet ne Toroor ak koleen, Tos ma mi Kamuktaindet ne Toroor kwenunnyo? Ma mi yaityet ne nyoonjinech.

¹² Kibati anyun Zion agobo okweek ko uu ye kibati mbareet, ak koek Jerusalem karurugutik, ak koigei tulweetap koot komoswek che torooreen che po timiin.