MIKAH 1 - Bukuit Ne Tilil

¹ Ng'olyootap Kamuktaindet ne Toroor ne ki nyoonji Mikah meng'iindetap Moresheth eng' peetuusyegap Jotham, Ahaz, ak Hezekiah, laitorinigap Judah, ne ki keer agobo Samaria ak Jerusalem.

Maonatosyek agobo kirwooget

² Ogas okweek pororyosyek, okweek tugul, oepchi iit, ee ng'wony, ak tugul che mi olooto: ak ingoek Kiptaiyat Kamuktaindet ne Toroor paoryat eng' okweek, Kiptaiyat ne mi hekalunnyi ne tiliil.

³ Amu, ogeero, mong'u Kamuktaindet ne Toroor eng' oldanyi, ak kochoorgei, ak kotyech komoswek che torooreen che po ng'wony.

⁴ Ak kochootyo tuloonook eng' keelyekyik, ak kobetogis atebwosyek, ko uu ye chotei temeniet ko kauchi maat, ko uu peek che kirandoi eng' ole keigei.

⁵ Piitu chuuto amu pistoetap Jakobo, ak amu tengekwogigap kootap Israel. Nee pistoetap Jakobo? Tos ma Samaria? Ak nee komoswek che torooreen che po Judah? Tos ma Jerusalem?

⁶ Ayae anyun Samaria koek karurugutyetap emet, ak koigei ole kiminjin sabibuk: ak atumde koikyik koba atebweet, ak ang'aany lumeiywekyik.

⁷ Ak kebir ketuatui kanamonikyik tugul che ki kiwai, ak kebeel melekwekyik tugul, ak ang'em kanamonikyik tugul: amu ki iyumune chooto melektap kugoinatet, ak koweekyigei melektap kugoinatet.

⁸ Ateei ak awaache amu niito, awendi ko kagireegunena ngoroik ak ami aach ngor: ateei ko uu lelwek, ak ariire ko uu tyong'igap songolik.

⁹ Amu ma inyaaksei mookyik; amu kagonyo kot koit Judah; itei ormariichetap piikyuk, agoi Jerusalem.

¹⁰ Amat imwaite ng'olyoondoniito eng' Gath, amat iriir agot kitigin: ki amildaegei temburyek eng' Beth-le-Apra.

¹¹ Osiirte, ee okweek piik che omenye Sapir, osiirte omi aach ngor ak kalilanet: tomo komong' chiito ne menyei Saanan; rebenok kateiyetap Beth-esel kinnyi ne tonone.

¹² Amu igeni miising' chiito ne menyei Marot kole konyoor myeeindo: amu kachoorchigei yaityet ormariichetap Jerusalem kobunu Kamuktaindet ne Toroor.

¹³ Ratyi chepkichutitap lugeet paraisiit ne chepchep, ee inyee chiito ne imenye Lakish: kitaunindetap tengekto ineendet ne po cheptap Zion; amu ki kinyoorchin pistaosyegap Israel.

¹⁴ Igoochini anyun Moreset-gat kagoochinetap saisere: egu kooriigap Aksip kiit ne po ng'aalseet eng' laitorinigap Israel.

¹⁵ Ta amutun chiito ne nyoonei konamin ibunji, ee inyee ne imenye Maresha: itei toroornatetap Israel Adulam.

¹⁶ Ingochurin met, ak icheru meting'ung' agobo lagok che iboiboin: tes poostong'ung' si koigei ne po chepsengwet; amu kageluul icheek eng' ole imi.