MATAYO 8 - Bukuit Ne Tilil

Kisoobi chiito ne tinyei mogondosaik

¹ Ye kingo choorgei eng' tulweet, koosup ineendet tuiyosyek che eecheen.

² Ak ogeero, ki nyoonji chii ne ki tinyei mogondosaik ak kogutung'ji ak koleenji, “Kiptaiyat, ngot icham, imuuchi itiliilo.”

³ Ki iito eunnyi ak kotwekyi ineendet koleenji, “Kaacham, tiliiliitu.” Ak kisop chiichooto sainooto eng' mogondosaik.

⁴ Ak ki mwachi Jeso koleenji, “Riipkei, memwachi chii, ago ui iboorchigei tisiindet, ak igoite kagoochinet ne ki ng'at Musa, si koek paornateet eng' icheek.”

Kosoobi `Jeso chii ne ki meat poor

⁵ Ak ye kingo kagomong'ji Kapernaum, konyonji chemogetap kiplugotinik pogol kogaigai,

⁶ kole, “Kiptaiyat, myani otwogindennyu eng' kaa, kasaat miising', meat poorto.”

⁷ Ak ki leenji, “Anyo si asoop ineendet.”

⁸ Ak ki wolji chemogonooto po kiplugotinik pogol kole, “Kiptaiyat, ma nyoljino inyoo koonnyu; ago mwaa ng'olyoot kityo, si kosap otwogindennyu.

⁹ Amu aa chii agane ne kiboiywa, ak atinye kiplugotinik che abou; ak ngamwachi ni aleenji, ‘Ui!’ kowendi; ak ngamwachi age aleenji, ‘Nyoo!’ konyonei; ak ngamwachi otwogindennyu aleenji, ‘Yai ni!’ koyaei.”

¹⁰ Ye kingo kas Jeso, kokwong' ak koleenji icheek che ki isubi, “Amwaiwok iman ale, tomo anyooru kayaneet ne tee ni agot eng' Israel.

¹¹ Amwaiwok ale tuun pwoonei che chaang' kobun kong'asiis ak cherongo, kobwa kotebi ak Abraham ak Isak ak Jakobo eng' pounatetap kipsengwet,

¹² ye tuun kitoorchin weeriik che po laitornatetap mesundeito ne po saang', ole mi riirek ak nyeetap kelek.”

¹³ Ki leenji anyun Jeso chemogonooto po kiplugotinik pogol, “Ui oldang'ung', ingeyaun ko uu ye kaiyan.” Ak kisop eng' sainooto otwogindennyi.

Kosoobi `Jeso piik che chaang'

¹⁴ Ak ye kingo kakwo Jeso kootap Petero, kogeer kametap osotyotap Petero koruei koamei eseet.

¹⁵ Ak kitwa eunnyi, ak kobagaakta eseet ineendet; ak king'eet koboisyechi.

¹⁶ Ak ye ki machei koimen, komutyi icheek che chaang' che tinyei oik: ak ki oon oik eng' ng'olyoot, ak kosoop tugul che ki myandos:

¹⁷ si kobiit kosulda ne ki kamwa maotyot Isaiah, kole, “Ki nam ineendet nyalulnatennyo ak koip myanwekyok.”

Kasubigap Jeso

¹⁸ Ak kingo keer Jeso tuiyosyek che eecheen koga yiem ineendet, kong'at kolanda pitoniin.

¹⁹ Ak ki nyo siriindet age, ak koleenji, “Kaneetindoni, asubin eng' ui tugul ole iwendi.”

²⁰ Ak ki leenji Jeso, Tinyei lelwek keriingonik, ak tinyei toriitik che po parak kesonok; ago ma tinyei Weeriitap chii ole indoi metinnyi.

²¹ Ki mwachi agenge eng' kasubikyik koleenji, “Kiptaiyat, chamwo korook awo atup abba.”

²² Ago ki leenji Jeso, Isubwo, pagakte piik che ki kobek kotup chechwaak che ki kobek.

Kogerei kong' `Jeso usoonet

²³ Ak kingo kagolaany moingetap peek, koosup ineendet `kasubikyik.

²⁴ Ak ogeero, king'eet usoonet ne oo eng' araraita, kot komaaluuch mildaetapkei ne po peek moinget: ago ki inuuchi ineendet.

²⁵ Ki pwa anyun kong'eet ineendet, koleenji, “Kiptaiyat, sarwech! Kagibegu!”

²⁶ Ak ki leenji, “Kalya si oiywei, okweek che otinye kayaneet ne ming'in?” Ki ng'eet anyun koger kong' usoonet eng' araraita; ak ki imung'do anyun kalunguletapkei.

²⁷ Ago ki kwong'yo piik, kole, “Chii nee chiichi, amu kase iit ineendet agot usoonaik ak araraita?”

Kosoobi Jeso piik aeng' tinyei oik

²⁸ Ak ye kingo kagoit pitoniin emetap Gadarenes, kotuiyo ak ineendet piik aeng' che ki tinyei oik, kobunu ye mi kereeriisyek; ki koroomen miising', kot ko ki ma komuuchi chii kosiir oranooto.

²⁹ Ak ogeero, kiwaach, kole, “Kiting'egei nee ak inyee, Weeriitap Kamuktaindet? Kenyo yu inyalilech kotom koit peetuut?”

³⁰ Ak ki agete ole ki ma ko neegitee icheek akweet ne po toorook che chaang'.

³¹ Ak ki soom ineendet oik, kole, “Ngioonech kemande, iyooktech kechut akweet ne po toorook.”

³² Ak ki leenji icheek, “Oba!” Ak kimanda koba kochut toorook: ak ogeero, ki rwai miising' akweet komugul kochoortaegei chemng'eisut koba araraita, ak kobekyi peek.

³³ Ak ki mwei che ki iyagi tooroochooto koba nganaseet ak komwaita kiy age tugul, ak kiit ne kiga keyachi che ki tinyei oik.

³⁴ Ak ogeero, ki mong' saang' nganaseet komugul kotuiyo ak Jeso: ak kingo keer ineendet, kosoom mat komanda eng' nganaseennywa.