MATAYO 7 - Bukuit Ne Tilil

Kirwoogyin piik alak

¹ Amorwooch, si ma kirwookwok.

² Amu kirwooget ne orwoochi ko tuun kirwoogunenok nooto, ak eng' kerutyet ne ogere, ko tuun kigerunenok nooto.

³ Kalya si igeer petbetyat ne mi kondap ne otupche, ago ma ibwaat pambaniat ne mi kondang'ung' inyeendet?

⁴ Anan imwachindoi ano ne otupche ileenjini, “Inganemun petbetyat eng' kondang'ung',” ye mi `pambaniat kondang'ung' inyeendet?

⁵ Chombilindoni, icheru korook pambaniat eng' kondang'ung', si igeer anyun komyee inemu petbetyat eng' kondap ne otupche.

⁶ Amogoochi sesenik kiit ne itabaanat, anan owiirchi toorook sonoegap kamanuut si ma tyech eng' keelyekwak, ak koweekyogei okweek kogereerak.

Osoom, ocheeng', ogonykony.

⁷ Osoom si kegoonok; ocheeng' si onyooru; ogonygony si keyatwok.

⁸ Amu age tugul ne soomei kigoochin; ak ne cheeng'ei konyooru; ak ineendet ne igonygonyi keyatyin.

⁹ Tos ng'oo eng' okweek ne ngo soom weeriinnyi magatyat, kogoochi koita?

¹⁰ Anan ngo soom njiryot, kogoochi ereneet?

¹¹ Ngot ongen okweek anyun nga oo yaach ogoochi lagokwok kagoochinoik che myach, ko tos yaei myeein ne tya Kwandang'wong' ne mi kipsengwet. Tos ma igoochin che soomei ineendet tuguuk che myach?

¹² Nooto anyun, tuguuk tugul che omache koyaiywok piik, ko kanyool oyachi ak icheek ko uu nooto: amu chuuto ng'atuutigap Musa ak kaneetisyosyegap maotik.

Kurgeet ne mariich

¹³ Obun okweek kurgeet ne mariich; amu kurgeet ne paraa ak ooreet ne tebees ko wendi ng'emisyet, ak chaang' che punei nooto kot koit olooto.

¹⁴ Mariich kurgeet ak ko pichiy ooreet ne wendi saboon ak ng'ering' che nyooru.

Ki naen keetit logoekyik

¹⁵ Oriibegei maotik che po lembech, che pwonjinok eng' ngoroik che po keechiirek nga suik che amei piich.

¹⁶ Onae icheek logoekwak. Tos kesei piik sabibuk eng' katook, anan logoegap mogoonik eng' katook che rutei piich?

¹⁷ Uu nooto keetit age tugul ne myee, yiei logoek che myach; ago keetit ne ya, koyiei logoek che yaach.

¹⁸ Ma imuuchi keetit ne myee kooi logoek che yaach, amaimuuchi keetit ne ya kooi logoek che myach.

¹⁹ Keetit age tugul ne mayiei logoek che myach keebei ak kewiirchi ma.

²⁰ Nooto anyun onae icheek logoekwak.

Ma ngenook okweek

²¹ Ma age tugul ne leenjino “Kiptaiyat, Kiptaiyat,” ne itei pounatetap kipsengwet, ago ineendet ne yaei mageetap Abba ne mi kipsengwet.

²² Leenjino che chaang' peetuunooto, “Kiptaiyat, Kiptaiyat, tos ki ma kiyai maonateet eng' kaineng'ung', ak keon oik eng' kaineng'ung', ak keyai eng' kaineng'ung' poisyonik che chaang' che po kimnateet?”

²³ Ak amwachi anyun icheek eng' yooto kotook aleenji, “Mangenok kobooch agoi; oistoenage okweek che oyae yaityo.”

Kalewenet agobo tegiik aeng'

²⁴ Nooto anyun age tugul ne kasei ng'aleechuchuk ak koyai, kiyanie chiito ne utaat ne ki teech koonnyi rwandet parak:

²⁵ ak ki roobon, ak ki pwa mogoochek, ak kius usoonaik, ak koryep koyooto; ama iluul, amu ki kiteech rwandet parak.

²⁶ “Ak age tugul ne kasei ng'aleechuchuk, ama yaei, kiyanie chiito ne perber, ne ki teech koonnyi ng'aniek:

²⁷ ak ki roobon, ak ki pwa mogoochek, ak kius usoonaik, ak koryep koyooto; ak kiluul: ak kieet luulennyi.”

Kaneetisyetap Jeso

²⁸ Ak ye kingo kes Jeso ng'aleechu, kokwong'yo tuiyosyek amu kaneetisyennyi:

²⁹ amu ki ineet ko uu ne tinyei kimnateet, ama uu siriikwak.