MATAYO 6 - Bukuit Ne Tilil

Kagoochinoik che kigoitoi

¹ Oriipkei si moyai imandang'wong' eng' taitap piik ole si kogeerok icheek; amu ngo yai ko uu nooto ko monyooru melekto kobun Kwandang'wong' ne mi kipsengwet.

² Ko uu nooto anyun, ye igoite kagoochinoiguk che po toreteet, ko mat iguutyi igoondit ko uu ye yaei chombilik eng' sinagogisyek ak ortinwek si kobiit kolas piik. Amwaiwok iman ale, kagonyoor icheek melektanywa.

³ Ago ye igoite kagoochinoik, ko mat konai eung'ung' ne po kaataam kiit ne yaei eung'ung' ne po tai,

⁴ si kobiit kobunji ung'oot kagoochinoiguk; ak kogoonin melekto Kwandang'ung' ne keerei eng' ung'oot.

Koneeti Jeso agobo Saaet

⁵ Ak ye osaae, ko moigei chombilik; amu chamei icheek kosaaei kotonondos eng' sinagogisyek ak pesiap oor si kobiit kogeer piik icheek. Amwaiwok iman ale, kagonyoor icheek melektanywa.

⁶ Ago ye imache isaa inyee, iwe koong'ung' oriit, ak ye kaiger kurgeet, isaa Kwandang'ung' ne mi eng' ung'oot, ak kogoonin melekto Kwandang'ung' ne keerei eng' ung'oot.

⁷ Ak ye osaae, ko mat otes ng'aleek puch, ko uu ye yaei pororyosyek; amu leen kigasyin icheek amu chaang'indap ng'aleekwak.

⁸ Nooto anyun amoigei icheek; amu ingen Kwandang'wong' tuguuk che omache, kotom osoom.

⁹ Nooto anyun osaa ko uu ni: “Kwandanyo ne mi kipsengwet; Ingoloosunok kaineng'ung'.

¹⁰ Ingonyo laitornateng'ung'. Ingoyaak mageng'ung' eng' ng'wony ko uu ye yaaksei eng' kipsengwet.

¹¹ Koonech ra amitwogikyok che po kotugul.

¹² Ak inyoiywech kaat lelutikyok, ko uu ye kinyochini kaat che lelweech.

¹³ Amemutech ole mi yoomseet, ago sarwech eng' ne ya.” [Amu neng'ung' laitornatet, ak kamuktaet, ak toroornatet, agoi koigeny. Amen.]

¹⁴ Amu ngo nyochini kaat piik kachiliilutikwak, konyoiywok kaat agine Kwandang'wong' ne po kipsengwet.

¹⁵ Ago ngo monyochini kaat piik kachiliilutikwak, koma nyoiywok kaat agine Kwandang'wong' kachiliilutikwok.

Karugutetapkei

¹⁶ Kogeny ye orugutkei, ko moigei chombilik, eng' togoochik che po arageneet; amu walei togoochikwak, si kogeer piik kole, koirugutkei. Amwaiwok iman ale, kagonyoor icheek melektanywa.

¹⁷ Ago ye irugutkei inyee, iil meting'ung' ak iun togeng'ung',

¹⁸ si ma keer piik kole irugutige, ago keerei Kwandang'ung' ne mi eng' ung'oot; ak kogoonin melekto Kwandang'ung' ne keerei eng' ung'oot.

Konoraik

¹⁹ Amogonorchigei konoraik eng' ng'wony, ole amei kuutik anan kong'em kutuuk, ak ole putei chooriik ak kochoor;

²⁰ ago ogonorchigei konoraik eng' kipsengwet, ole ma amei kuutik anan kong'em kutuuk, ak ole ma putei chooriik ak kochoor;

²¹ amu ole mi konorweng'ung', komiitei olooto muguleldang'ung' agine.

Lapkeiyetap Poorto

²² Taitap poorto konda; nooto anyun, ngo myee kondang'ung', ko nyiitaat poortang'ung' komugul lapkeiyet.

²³ Ago ngo ya kondang'ung', ko nyiitaat poortang'ung' komugul mesundeito. Nooto anyun, ngot koek mesundeito lapkeiyet ne mi oriing'ung', ko oo mesundeoto ne tya anyun!

Kaberuuret

²⁴ Ma mi chii ne imuuchi koot kiptainik aeng'; amu imuuch kowech age ak kocham age, anan konamgei ak age ak kosas age. Momuuchi oot Kamuktaindet ak mogornatosyek.

Kereerwegap Met

²⁵ Amwaiwok anyun ale, mogereer met agobo sabeeng'wong' eng' che oame anan che oee, anan agobo che olaachi eng' poorwekwok. Tos ma siirei saboondo amitwogik, ak ma siirei poorto ngoroik?

²⁶ Ogeer toriitik che po parak; ma kolsei ama kesisyei ama iyumjin choge, ak kobaei icheek Kwandang'wong' ne po kipsengwet. Tos ma oo koigoi okweek miising' osiir icheek?

²⁷ Ak imuuchi ng'oo ne kereri met eng' okweek kotesyi koindonyi kakwautyet agenge ne po euut?

²⁸ Ak amu nee anyun si ogereer met agobo ngoroik? Obwaat taaptook che po keeweet, ole pititoi; ma poisyei anan koletis,

²⁹ ago amwaiwok ale, agot Solomon eng' talbistanyi tugul ko ki ma kolumegei ko uu age eng' chu.

³⁰ Ago ngo laakyin Kamuktaindet ko uu nooto susweek che po keeweet, che mi rani ak mutai kewiirchi ma, ko tos mayaiywok ko uu nooto kosiir, okweek che otinye kayaneet ne ming'in?

³¹ Nooto anyun amogereer met, ole, “Ki ame nee?” Anan, “Ki ee nee?” Anan, “Kilaachi nee?”

³² Amu cheeng'ei tuguuchu tugul Pororyosyek; amu ingen Kwandang'wong' ne po kipsengwet kole omokyinigei tuguuchu tugul.

³³ Ago ocheeng' korook laitornatennyi, (ne po Kamuktaindet) ak imandanyi; si keteswook tuguuchu tugul.

³⁴ Nooto anyun amogereer met agobo mutai, amu kerere met mutaut agobo kei. Yamei peetuut yaityennyi.