MATAYO 5 - Bukuit Ne Tilil

Amdaet eng' Tulweet

¹ Ye kingo keer `Jeso tuiyosyek, kotogosta tulweet, ak kingo kagotep ng'wony, kobwonji kasubikyik.

² Ki yaat kutinnyi ak koneet icheek koleenji:

Poiboiyet ne po Iman

³ Poiboen che ponoon eng' muguleldo, amu nenywa pounatetap kipsengwet.

⁴ Poiboen che aragendos, amu tuun kigoigoi.

⁵ Poiboen che talaen, amu tuun punjin ng'wony.

⁶ Poiboen che amei rubo ak melelda agobo imanda, amu tuun piyang'dos.

⁷ Poiboen che rireegei, amu tuun nyooru ak icheek rireenetapkei.

⁸ Poiboen che tiliileen mugulelwek, amu tuun keerei Kamuktaindet.

⁹ Poiboen che yaei kaalyeet, amu kiguure weeriigap Kamuktaindet.

¹⁰ Poiboen che kageusaus agobo imanda, amu nenywa pounatetap kipsengwet.

¹¹ Oboiboi ye churook piik, ak ye usausook, ak ye mwaitaenok yaityet age tugul kong'oochook agobo anee.

¹² Oboiboitu ak ogaaskei miising', amu oo melektang'wong' eng' kipsengwet; amu ki kiusaus ko uu nooto maotik che ki indounenok.

Muunyuk ak Lapkeiyet

¹³ Oo muunyugap ng'wony, ago ngo pet anyinyindap muunyuk, kotagenyoorundo ano anyinyindo? Kobooch yooto koma kotilei kiy, ago ketumda ak kotyegaat piik.

¹⁴ Oo lapkeiyatap ng'wony. Ma kimuuchi keuny nganaseet ne mi tulweet parak.

¹⁵ Ak ma inaami piik tait, ak konde kitonget oriit, ago indoi kiit ne tonone; ak kokweng'ji piik tugul che mi ko.

¹⁶ Ongoluu lapkeiyeng'wong' ko uu nooto eng' taitap piik, si komuuch kogeer poisyonikwok che myach, ak kolas Kwandang'wong' ne mi kipsengwet.

Ng'atuutik

¹⁷ Moleen ki anyoo abut Ng'atuutyet anan Maotik, ki ma anyoo abut, ago ayai kosulda.

¹⁸ Amu amwaiwok iman ale, agoi kosiirto kipsengwet ak ng'wony, koma siirtoi agot tisyet anan kiy ne ming'in eng' Ng'atuutyet, agoi kosulda tuguuk tugul.

¹⁹ Nooto anyun, chii age tugul ne putei ng'atuutyet agenge ne ming'in kot, eng' ng'atuutichu, ak koneeti piik ko uu nooto, keguure ineendet ne ming'in eng' tugul eng' pounatetap kipsengwet: ago chii tugul ne yaei ak koneeti chooto, keguure ineendet ne oo eng' pounatetap kipsengwet.

²⁰ Amu amwaiwok ale, ngot koma siir imandang'wong' imanda ne po siriik ak Pharisaik, ko moite pounatetap kipsengwet ne matiny.

Rumisyet

²¹ Ki ogas keele ki kileenji icheek che po keny, “Amerumisye, ak age tugul ne rumisyei ko kagoriikyi kirwooget.”

²² Ago amwaiwok ale, Age tugul ne nereekyin ne tupcho ko kagoriikyi kirwooget; ak age tugul ne leenji ne tupcho, “Raca” ko kagoriikyi kapkirwooget; ak age tugul ne mwaei kole abusanani ko kagoriikyi Gehenna ole mi maat.

²³ Nooto anyun ngigoite kagoochineng'ung' eng' kaptisisyet, ak ibwaat eng' olooto ile ting'enen ne otupche ng'olyoo,

²⁴ ibagaakte kagoochineng'ung' eng' taitap kaptisiisyo ak iwe anyun ochamyegei korook ak ne otupche, yeityo inyoo igoite kagoochineng'ung'.

²⁵ Ochamyegei ak punyondeng'ung' kota imi ooreet ak ineendet; si ma imutyin `punyondeng'ung' kirwoogindet, ak komutyin `kirwoogindet riibindet, eng' let ketoorchin korgoreet.

²⁶ Amwaun iman ale, ma koi imong'u eng' olooto agoi iyaakte sendeiyot ne po let.

Kesesnatet

²⁷ Ki ogas keele ki kimwa keele mogesesen.

²⁸ Ago amwaiwok ale, age tugul ne keerei kobogoryo ak kogase myat ineendet, ko kagogesesen ak ineendet eng' muguleldanyi.

²⁹ Ngo riichin kondang'ung' ne po tai, ibalu ak iwiirte; kaigai eng' inyee ngo petenen kebeberta agenge eng' poorto kosiir ketoorchi Gehenna poortang'ung' komugul.

³⁰ Ak ngo riichin eung'ung' ne po tai, itil ak iwiirte; kaigai eng' inyee ngo petenen kebeberta agenge eng' poorto kosiir kwo Gehenna poortang'ung' komugul.

Pesyeet

³¹ Ki kimwa kogeny keele age tugul ne oonei osotyonnyi, ko ingogoochi anyun sireet ne po peesyet.

³² Ago amwaiwok ale age tugul ne oonei osotyonnyi, ama eng' sokseet, ko kayai ineendet koegunoot chebaigeiyat: ak age tugul ne ituni kobogoryondonooto ne kigeon, ko kabaigei.

Kayasyoet

³³ Ki ogas kogeny keele kigemwachi icheek che po keny keleenji, ameyosyechigei eng' lembech, ago yachi Kamuktaindet ne Toroor kayasyosyeguk.

³⁴ Ago amwaiwok ale, Amoyosye agot kitigin; agot agobo kipsengwet, amu ng'echereetap Kamuktaindet nooto;

³⁵ anan agobo ng'wony, amu keldebesaigap keelyekyik; anan agobo Jerusalem, amu nganaseetap Laitoryat ne oo.

³⁶ Anan iyasye agobo meting'ung', amu memuuchi iyai sumeiyot agenge koleelit anan kotuuit.

³⁷ Ago ingoek ng'alaaleng'wong', wei ko wei anan achicha ko achicha; ak kiy age tugul ne siirei chuuto kobunu ineendet ne ya.

Yaaktaetap Mugetuut

³⁸ Ki ogas keele ki kimwa keele konda eng' konda ak keldet eng' keldet.

³⁹ Ago amwaiwok ale, Amogirinde ne ya; ago age tugul ne irabaachin matandap tai, iweekyi age agine.

⁴⁰ Ngomutyin age tugul kapkirwook, komachei korebenen sumeng'ung', ko ingoip ngoryeeng'ung' agine.

⁴¹ Ak age tugul ne pirchinin iwe mailit agenge, obe tuwai mailisyek aeng'.

⁴² Igoochi ineendet ne soomin, ametuktoochi patai ineendet ne machei kobesenin.

Chameetap Puunik

⁴³ Ki ogas keele ki kimwa keele cham chiitap kokweng'ung', ak iwech punyondeng'ung'.

⁴⁴ Ago amwaiwok ale, Ocham puunikwok ak osachi icheek che usook,

⁴⁵ si oegu weeriigap Kwandang'wong' ne mi kipsengwet; amu igoochin asiistanyi kochorchi che yaach ak che myach, ak iyookyin ropta che po imanda ak che ma po imanda.

⁴⁶ Amu ngot ochame icheek che chamok, ko nee melekto ne otinye? Ma yaei ak icheek ko uu nooto taagigap aisuruut?

⁴⁷ Ak ngot ogati che otupche kityo, ko koyai nee ne siirei alak? Tos ma yaei ak icheek ko uu nooto Pororyosyek?

⁴⁸ Nooto anyun, oegu okweek che igesunotkei ko uu ye igesunotkei Kwandang'wong' ne po kipsengwet.