MATAYO 4 - Bukuit Ne Tilil

Yoomseetap Jeso eng' Surkwen

¹ Ki imut anyun Kabuuset ne Tiliil Jeso kotogosta kwo surkwen si koyoom chesawilyet.

² Ak ye kingo kagorugutkei peetuusyek artam ak kemousyek artam eng' let koam ruhebeet.

³ Ak ki nyo yoomindet ak koleenji, “Ngo ii Weeriitap Kamuktaindet, ing'at koichu koek magatiinik.”

⁴ Ago ki wolji kole, “Siraat, ‘Ma sabei chii eng' magatyat ineegei, ago eng' ng'olyoot age tugul ne mang'une kutitap Kamuktaindet ne Toroor.’ ”

⁵ Yeityo komut chesawilyet ineendet kwo nganaseet ne tiliil; ki imut kwo kimonjogut ne po Hekaluut,

⁶ ak koleenji, “Ngo ii Weeriitap Kamuktaindet, iwiirchigei ng'wony; amu siraat kole, ‘Iyogu malaikaisyekyik agobo inyee: Ak kotaachin eng' eunekwak, si ma rus koita keeldong'ung'.’ ”

⁷ Ki leenji Jeso, “Siraat kogeny kole, ‘Meyoom Kiptaiyat Kamuktaindet ne Toroor neng'ung'.’ ”

⁸ Ki imut kogeny `chesawilyet ineendet kwo tulweet ne kooi miising', ak koboorchi laitornatosyek tugul che po ng'wony, ak telunateet ne po chooto,

⁹ ak koleenji, “Agoonin tuguuchu tugul, ngibutya iloswa.”

¹⁰ Ki leenji Jeso anyun, “Istegei, Setani; amu siraat kole, ‘Ilasu Kiptaiyat Kamuktaindeng'ung', ak iboisyechi ineendet ineegei.’ ”

¹¹ Ki pagaach chesawilyet anyun ineendet; ak ogeero, ki pwa malaikaisyek si koboisyechi.

Kowendi Jeso Galilaya

¹² Ye kingo kas Jeso kole kigerat Johana, kwo ineendet Galilaya.

¹³ Ki wo eng' Nazareth ak kwo kotebee Kapernaum, ne mi ye neegitee araraita, eng' tabanwek che po Zebulun ak Naphtali;

¹⁴ si kosulda ne ki kamwa maotyot Isaiah kole,

¹⁵ “Emetap Zebulun ak emetap Naphtali, ooreet ne neegit araraita, Jordan pitoniin, Galilaya ne po Pororyosyek,

¹⁶ Piik che ki tebee mesundeito ko ki kogeer lapkeiyet ne oo, ak icheek che ki tebee koreet ne po urwetap meet, ko ki kochoorchigei lapkeiyet.”

¹⁷ Kobooch yooto kotoi Jeso koamda, kole, “Osigu, amu kagoriik pounatetap kipsengwet.”

Koguure `Jeso kasubikyik che tai

¹⁸ Ak ye kiwendotee ngeguutap araraita ne po Galilaya, kogeer piik aeng' che tupcho, Simion ne kiguure Petero, ak Andrea ng'eetap kamet, kowiirchin regereiywot ne kiname njireenik araraita; amu ki ramiigap njireenik.

¹⁹ Ak koleenji, “Obwa osubwo, si ayaak oegu ramiigap piik.”

²⁰ Ak eng' yooto, kobagaach regereiywekwak ak koosup ineendet.

²¹ Ki ye kingo ta kowendi eng' olooto, kogeer piik aeng' alak che tupcho, Jakobo weeriitap Zebedayo, ak Johana ng'eetap kamet, komiitei moingetap peek kobooto Zebedayo kwandanywa, konabei regereiywekwak; ak koguur icheek.

²² Ak ki pagaach moinget ak kwandanywa, ak koosup ineendet.

Koneetisye ak kosoobi piik Jeso

²³ Ak kiwendoti Jeso eng' Galilaya komugul, koneetisyoti eng' sinagogisyekwak ak koamdaati logoiywek che myach che po laitornatet, ak kosabooti che tinyei korotwek alak tugul ak myanwogik alak tugul eng' piik.

²⁴ Ara kiyesta ng'aleek agobo ineendet eng' Syria komugul, ak ki kimutyi `ineendet piik tugul che myandos, che ki nam korotwek ak ng'waninwek che teerchiin, che ki tinyei oik, che kitanuitos ak che ki meiyotiin poorwek; ak ki isoop icheek.

²⁵ Ak ki isup ineendet tuiyosyek che eecheen che ki punu Galilaya ak Decapolis ak Jerusalem ak Judea ak Jordan pitoniin.