MATAYO 3 - Bukuit Ne Tilil

Johana Kabatisanindet

¹ Ki nyo eng' peetuusyechooto Johana kabatisanindet koamdaati eng' surkwen ne po Judea,

² koleen, “Osigu, amu kagoriik pounatetap kipsengwet.”

³ Ni ineendet ne ki kamwa maotyot Isaiah kole, “Tuugeetap chii ne kuursei eng' surkwen, koleen: ‘Ochop ooreetap Kiptaiyat, olitiit ole punooti.’ ”

⁴ Ki ilaachi Johana sambutap tambeesik, ak ki rategei pireneetap muito, ak amitwogikyik ko ki chereng'endet ak kumyatap timiin.

⁵ Ki ng'etyo anyun piigap Jerusalem ak Judea komugul, ak komoswek tugul che neegitee Jordan koba ole mi ineendet,

⁶ ak ki kibatisan icheek eng' aineet ne po Jordan, kong'aanyei tengekwogikwak.

⁷ Ago ye kingo keer che chaang' che po Pharisaik ak Sadukaik kobwonjin kabatisanennyi, koleenji, “Lagochu po erenook, ng'oo ne ki iteiywok omwee piruutyet ne nyoonei?

⁸ Oii logoek che nyoljin siguunet.

⁹ Amat obwaat ole, ‘Ki tinyei kwandanyo Abraham,’ amu amwaiwok ale, imuuchi Kamuktaindet kong'eetyi Abraham lagok eng' koichu.

¹⁰ Agot nguno ko kagiting'e aiywet tigitigap keetiik; kiebei keetit age tugul ne ma iyei logoek che myach ak kewiirchi ma.

¹¹ Abatisanook eng' peek agobo siguunet; ineendet ne isubwo ko tinyei kimnateet kosiiro, ma nyolu aipchinot kweonikyik. Ibatisanook ineendet eng' Kabuuset ne Tiliil ak maat.

¹² Tinyei eng' eunnyi keibennyi, ak kotiliili komyee rwanyut; ak koyumji nganuuk chogennyi, ak kobeele `meteteek maat ne ma imisoksei.”

Kabatisaneet ne po Jeso

¹³ Ki nyo anyun Jeso kobunu Galilaya konyo Jordan ole mi Johana, si kibatisan.

¹⁴ Ago kimachei Johana koeesyo, kole, “Kanyool ibatisana, ago kenyoonjo anee?”

¹⁵ Ago ki wolji Jeso koleenji, “Cham nguno; amu kanyoljech eng' ooreet ne uu ni kigeesu imanda tugul.” Kocham anyun.

¹⁶ Kingo kagibatisan Jeso, ye kigatogos kityo eng' peek, ogeero, ki yaatagis kipsengwet ak kogeer `ineendet Kabuusetap Kamuktaindet kochoorugei ko uu cheptuget ak kotonoon eng' paragunnyi.

¹⁷ Ak ki mang'une tuugeet kipsengwet, kole, “Ni ko Weeriinnyu, chamanennyu, agasegei ineendet.”