MATAYO 27 - Bukuit Ne Tilil

Kimutu Jeso taitap Pilato

¹ Ye kingo kagoeech, korwooch tisiik tugul che eecheen ak poisyegap pichooto, korwookyi ole partoi Jeso.

² Ki rat ineendet, koomut ak ipkogoochi Pilato pounindet.

Meetap Judas

³ Ye kingo keer Judas anyun kole kagirwookyi Jeso, komwa ndara ak koweekyi tisiik che eecheen ak poisyek fedhaisyechooto sosom.

⁴ Ki mwa kole, “Kaalel amu kaang'wekte korotiik che ma tinyei tengek.” Ago ki wol icheek kole, “Tiing'enech nee ng'aleeguk? Rar inyegei.”

⁵ Ki wiirchi fedhaisyechooto Hekaluut, komanda ak kwo kogeetkei.

⁶ Ak ki nam tisiik che eecheen fedhaisyechooto ak kole, “Ma chamdaat eng' ng'atuutyet kituiyo chu ak konunoigap Hekaluut amu po koroti.”

⁷ Ki irwooch ak kotil koboisyee fedhaisyechooto koale mbareetap cheptereniot si koek ole kitupchin toek.

⁸ Amu nooto anyun ko ki kiguuree mbaranooto mbareetap korotiik agoi rani.

⁹ Ki isulda anyun ne ki kagimwa eng' maotyot Jeremiah keele, “Ki ip icheek fedhaisyek sosom, alyetap ineendet ne kiga kigaamanji, ne kigaaman piigap Israel,

¹⁰ ak ki igoito icheek koale mbareet ne po cheptereniot ko uu ye ki kang'ata Kiptaiyat.”

Koteepseen `Pilato Jeso

¹¹ Ki tonon Jeso anyun eng' taitap pounindet ak kiteebe pounindet koleenji, “Ii Laitoryatap Yahudik?” Koleenji Jeso, “Kaimwa.”

¹² Ago ye kingo taam ineendet tisiik che eecheen ak poisyek, ko mawol kiy.

¹³ Komwachi anyun Pilato ineendet koleenji, “Megase ole tee paornateet ne paoryanjinin pichu?”

¹⁴ Ago mawolji kiy, agot ng'olyoo agenge kot kokwong' miising' pounindet.

Barabbas anan Jeso?

¹⁵ Ki cham kotyakyin pounindet tuiyet kimonjororyot agenge ne kacham icheek eng' peetuutap igoorto.

¹⁶ Eng' kasarata, kogimitei kimonjororyot age ne kinaat kot ne ki kiguure Barabbas.

¹⁷ Ye kingo kagoyumgei anyun, koleenji Pilato, “Ng'oo ne omache atyakwok? Barabbas anan Jeso ne kiguure Kristo?”

¹⁸ Ki ingen kole kagigoito ineendet eng' ng'etkonda.

¹⁹ Ye kingo ta kotononjin kirwooget, koyookyi osotyonnyi ng'olyoo kole, “Ameite kiy chiichoo ma tinyei leluut, amu kaanyooru nyalilwogik che chaang' rani eng' karwotitoet agobo ineendet.”

²⁰ Kisaisai tisiik che eecheen ak poisyek tuiyosyek kole kosoom kityaach Barabbas ak kebar Jeso.

²¹ Ki leenji pounindet icheek kogeny, “Omache atyakwok ng'oo eng' chu aeng'?” Kole icheek, “Barabbas.”

²² Koleenji Pilato, “Alyonji anyun Jeso ne kiguure Kristo?” Kole icheek tugul, “Ingigartaat ineendet!”

²³ koteebee koleenji, “Amu nee? Kayai nee ne ya?” Ago ki polyo miising' koleen, “Ingigartaat!”

²⁴ Ye kingo keer Pilato kole mata komuuch koyai kiy ago ki neegit kotoigei chemargeet, konam peek ak koun eunekyik eng' taitap tuiyet koleen, “Ma tinyei leluut agobo korotiigap chiichi po iman. Orarati okweegei.”

²⁵ Ki wol piik tugul kole, “Ingotebenech korotiikyik ak lagokyok.”

²⁶ Ki ityakyi Barabbas ak ye kingo kagobir `Pilato Jeso, kogoito ineendet kigartaat.

Kochotei `kiplugotinik Jeso

²⁷ Ki imut anyun kiplugotinigap pounindet Jeso kwo Praitorium, ak koyumjigei ineendet kiplugotinik tugul.

²⁸ Ki ireegune ngoroikyik ak kolaakyi sambut ne piriir.

²⁹ Kitaa ngatyetap katook ak konde metinnyi. Ki inde tegat eunnyi ne po tai ak ko kutung'so eng' tainnyi ak kochotei koleen, “Kigatin, Laitoryatap Yahudik!”

³⁰ Kising'ilji ineendet ak konam tegat kokwere metinnyi.

³¹ Ye kingo kagochot ineendet, koreegune sambut ak kolaakyi ineendet ngoroikyik, yeityo komut kwo kigartaat.

Kigartati Jeso

³² Ye ki mi kobendi, konyoor chiitap Kurene ne kiguure Simion ak kobirchi ineendet kola kimurtoiyondennyi.

³³ Ye kingo it ole kiguure Golgota, ne kaguiyennyi ko emetap terta,

³⁴ kogoochi ineendet siki koe che ki kiburukto tuguuk che ng'woneen, ak ye kingo chamcham, koeesyo koe.

³⁵ Kingo kagogartaat ineendet, kopchechigei ngoroikyik eng' seretap parbareek,

³⁶ ak kotep ng'wony koriip ineendet eng' olooto.

³⁷ Ki inde paragutap metinnyi kataamset ne ki kisir keele, “Ni ko Jeso Laitoryatap Yahudik.”

³⁸ Ki kigartaat ineendet ak rebiik aeng' eng' yooto, age eng' euut ne po tai ak age eng' euut ne po kaataam.

³⁹ Kichurachur ineendet che kisiirtoi ak koleglegoti metowekwak

⁴⁰ koleen, “Inyee ne ing'eme Hekaluut ak iteech eng' peetuusyek somok, sarugei! Ngo ii Weeriitap Kamuktaindet, ichoorugei eng' kimurtoiyot.”

⁴¹ Kichurachur ko uu nooto ak icheek tisiik che eecheen kobooto siriik ak poisyek koleen,

⁴² “Ki sar alak; ama imuuchi kosargei. Ineendet Laitoryatap Israel; ingochoorgei nguno eng' kimurtoiyot, si kiyan ineendet.

⁴³ Imang'u Kamuktaindet; ingosar ineendet nguno ngot komachei amu ki le, ‘Aa Weeriitap Kamuktaindet.’ ”

⁴⁴ Kichurochur ak icheek ko uu nooto rebiik che kiga kigartaat kobooto ineendet.

Meetap Jeso

⁴⁵ Ki imenit anyun emet komugul kong'etee sait lo agoi sait sogool.

⁴⁶ Ye kingo olo po sait sogool, koguurso Jeso eng' tuugeet ne oo kole, “Eli, Eli, lama sabaktani?” Nooto ko, “Kamuktaindet nenyu, Kamuktaindet nenyu, kalya si ibagaakta?”

⁴⁷ Kingo kas alak eng' icheek che kitonondos eng' olooto, kole icheek, “Kuurei chiichi Elijah.”

⁴⁸ Eng' yooto kolabat age eng' icheek kwo konem sponjit ak konyiit siki, ak konde tegat ak kogoochi koe.

⁴⁹ Ki mwa chuun alak kole, “Omete, ongegeer ngo nyoonei Elijah si kosar ineendet.”

⁵⁰ Ki kuurso Jeso kogeny eng' kutit ne oo, ak kogoito saboondanyi.

⁵¹ Ogeero, ki kereer angeet ne ki kioiye Hekaluut koek aeng' kobooch parak agoi ng'wony, ak kobetogis rwandosyek.

⁵² Ki yaatagis kereeriisyek ak ki king'eet poorwegap piik che chaang' che tiliileen che ki ruitos.

⁵³ Kingo kagong'eet Jeso, komong' pichooto ak icheek eng' kereeriisyekwak komong'ji nganaseet ne tiliil ak koboorchigei che chaang'.

⁵⁴ Ye kingo keer chemogetap kiplugotinik pogol ak icheeget che ki mi kobooto ineendet koriibei Jeso potaneetap ng'wony, ak tuguuk che kayaagiis, koywei miising' ak kole, “Iman Weeriitap Kamuktaindet chiichi.”

⁵⁵ Ki mi eng' olooto kobogorisyek che chaang' che kigeerei eng' ye loo, che kiga isubot Jeso kobooch Galilaya koboisyechinoti ineendet.

⁵⁶ Ki Maria Magdalene age eng' kobogorisyechooto kobooto Maria kametap Jakobo ak Joses, ak kametap weeriigap Zebedayo.

Konoretap poortap Jeso

⁵⁷ Kingo kagoek koskoleng', konyo mogoryot kobun Arimatea ne keguure Joseph ne ki kasubindetap Jeso agine.

⁵⁸ Ki wo chiichooto ole mi Pilato, kwo kosoom poortap Jeso; ak ki ng'at Pilato anyun kole kigoochi.

⁵⁹ Ki ip Joseph poorto ak kotaae angeetap katanit ne tiliil,

⁶⁰ ak konde kererinnyi ne leel ne kiga kobal eng' rwandet. Kimilji koita ne oo kurgeetap kererit kogeree yeityo kwo.

⁶¹ Ki mi yooto Maria Magdalene ak Maria age kotebyei eng' taitap kererit.

Mageetap keriip kererit

⁶² Eng' peetuut ne ki isubi, ko kaibata peetuutap chobeet, koyumgei tisiik che eecheen ak Pharisaik eng' taitap Pilato

⁶³ ak koleenji, “Kiptaiyat, kibwaati keele ki mwa kaberberindonooto kota kosabei kole, ‘Ye ibata peetuusyek somogu, ang'eete kogeny.’

⁶⁴ Ng'at anyun keriip kererit komyee agoi peetuut ne po somok, si ma pwa kasubikyik kochoor ineendet ak koip, ak komwachi piik koleenji, ‘Kagong'eet ineendet eng' che ki kobek,’ si koyait kaberberisyet ne po let kosiir ne po tai.”

⁶⁵ Koleenji Pilato icheek, “Otinye riibiik, obechigei ak oriip komyee ko uu ye omuuchi.”

⁶⁶ Koba anyun ak ribiik koriip kererit; king'ooch koita ak koriip kererit komyee.