MATAYO 25 - Bukuit Ne Tilil

Kalewenet agobo pergeinik taman

¹ “Ki yanie anyun pounatetap kipsengwet pergeinik taman che ki ip taisyekwak ak koba kotorookta sandetap katunisyet.

² Ki perberen muutu eng' icheek ak ki utaatiin muutu.

³ Ye kingo ip che perber taisyekwak, koma ipto icheek mwanik;

⁴ ago ki ip che utaatiin mwanik eng' chuboisyekwak kobooto taisyekwak.

⁵ Ak ye kita kogaegei sandet, kobirto met tugul ak koruiyo.

⁶ Ago ki piit waagaat kemoi kween, ‘Ogeero! Kagoit sandet! Omong'u otorooch ineendet.’

⁷ Ki ng'eetyo anyun pergeinichooto tugul, kochop taisyekwak.

⁸ Ak ki leenji anyun che perber che utaatiin, Onagech mwanikwok; amu machei komisogis taisyekyok.

⁹ Ago ki wolji che utaatiin, koleenji, ‘Abeere mayamech acheek ak okweek: kaigai obe ole mi che aldoi, ak oaljige.’

¹⁰ Ak kingo ta kobendi koalisyei, koit sandet; ak komong'ji anyun che chobootiin igoortap katunisyet ak ineendet: ak ki kiger kurgeet.

¹¹ Ak eng' let kobwa pergeinik chugai ak icheek, ak kole, ‘Kiptaiyat, Kiptaiyat, yaatwech.’

¹² Ago ki wol kole, ‘Amwaiwok iman ale, mangenok.’ ”

¹³ Nooto anyun oriipse, amu mongen peetuut anan sait.

Kalewenet agobo talendaisyek

¹⁴ “Amu uu ye wendi chii emet age, koguur otwogikyik ak kogoochi tuguukyik.

¹⁵ Ki igoochi age talendaisyek muut, kogoochi age aeng', kogoochi age agenge, age tugul ko uu kamugennyi; ak kwo pandanyi.

¹⁶ Ki wo anyun ineendet ne kitaach talendaisyek muut ak kwo koboisyee, ak kinyoor talendaisyek alak muut.

¹⁷ Ki yai ko uu nooto agine ne kitaach aeng' ak kinyoor aeng' alak.

¹⁸ Ago ineendet ne kitaach agenge kogiwo kobal ng'wony ak kounyee yooto fedha ne po kiptaiyandennyi.

¹⁹ “Ye kingo pata peetuusyek che chaang', konyo kiptaiyatap otwogichooto, ak koiit kobooto icheeget.

²⁰ Ak ki nyo ineendet ne kiga taach talendaisyek muut koibu talendaisyek muut alak ak kole, ‘Kiptaiyat, ki igoono talendaisyek muut; keero, ki anyooru talendaisyek muut alak.’

²¹ Ki leenji kiptaiyandennyi, ‘Ki iyai ne myee, otwogindoni myee ak ne kiyani; koiegu ne po iman eng' tuguuk che ng'ering', kandein ibou tuguuk che chaang'; mong'ji anyun poiboiyetap kiptaiyandeng'ung'.’

²² “Ak ki nyo agine ne kiga taach talendaisyek aeng' ak kole, ‘Kiptaiyat, ki igoono talendaisyek aeng', keero, ki anyooru talendaisyek alak aeng'.’

²³ Ki leenji kiptaiyandennyi, ‘Ki iyai ne myee, otwogindoni myee ak ne kiyani; koiegu ne po iman eng' tuguuk che ng'ering', kandein ibou tuguuk che chaang'; mong'ji anyun poiboiyetap kiptaiyandeng'ung'.’

²⁴ “Ki nyo agine ne kiga taach talendait agenge ak kole, ‘Kiptaiyat, ki angenin ale, ii chii ne kolgol, igese eng' ole ma igoolji, ak iyumi eng' ole ma ilechi;

²⁵ ara ki aiywei, ak ki awe auny talendaing'ung' eng' ng'wony. Keero, ee, nam anyun nooto ne neng'ung'.’

²⁶ “Ago ki wolji kiptaiyandennyi ak koleenji, ‘Otwogindoni ya ak ko choriren! Ki inai ile agese eng' ole ma agool ak ayumi eng' ole ki ma alechi?

²⁷ Kiga nyoljin anyun indeiywo fedhaisyekyuk ole tesoksei, ak ye aweege ataach chechuuk kobooto che kitesak.

²⁸ Orebee anyun ineendet talendait, ak ogoochi ineendet ne tinyei talendaisyek taman.

²⁹ Amu age tugul ne tinyei, kigoochin si kosich che chaang'; ago ineendet ne ma tinyei, kerebee agot ne tinyei.

³⁰ Otoorchin anyun otwogindet ne ma tilei kiy mesundeito ne po saang', ole egu riirek ak nyeetap kelek.’

Peetuutap Kirwooget

³¹ “Ye nyo Weeriitap chii eng' toroornatennyi, kobooto malaikaisyek tugul, kotebee anyun ng'echereetap toroornatennyi.

³² Tuun kiyumji tainnyi pororyosyek tugul, ak kokwei icheek koobeesyo ko uu ye ibestos mestowot keechiirek ak ng'oroorek,

³³ ak konde keechiirek eunnyi ne po tai ak ng'oroorek eng' kaataam.

³⁴ “Yeityo komwachi `Laitoryat icheek che mi eunnyi ne po tai koleenji, ‘Obwa, okweek che oberuurotin che oo po Abba, onam laitornatet ne kigechobwok kobooch ko kagilumda ng'wony;

³⁵ amu ki ama rubeet ak ki ogoono aam, ki ama melel ak ki onaga aee, ki aa too ak ki otaacha;

³⁶ ki ami aach ngor ak ki olaaksewo, ki amyani ak ki obwa ogeero, ki ami korgoreet ak ki orutecho.’

³⁷ Kowolji anyun che po imanda koleenji, ‘Kiptaiyat, ki kigeerin au koamin rubeet ak kebain, anan koamin melel ak kinagin iee?

³⁸ Ak ki kigeerin au ko ii too ak ketaachin, anan imi aach ngor ak kilaakseun?

³⁹ Ak ki kigeerin au imyani anan eng' korgoreet ak kerutochin?’

⁴⁰ Ak kowolji Laitoryat koleenji, ‘Amwaiwok iman ale, ko uu ye ki oyachi agot agenge eng' chu mengeech, eng' tupchosyechuchuk, ko ki oyaiywo.’

⁴¹ “Koleenji anyun icheek che mi murot kaataam, ‘Oba eng' ole ami, okweek che oo chubootiin, oba maat ne po koigeny ne kigechopchi chesawilyet ak malaikaisyekyik;

⁴² amu ki ama rubeet ak ki ma ogoono aam, ki ama melel ak ki ma onaga aee,

⁴³ ki aa too ak ki ma otaacha, ki ami aach ngor ak ki ma olaaksewo, ki amyani ak eng' korgoreet ak ki ma obwa ogeero.’

⁴⁴ “Kowol anyun icheek kole, ‘Kiptaiyat, ki kigeerin au koamin rubeet anan melel, anan ko ii too, anan imi aach ingor, anan imyani, anan imi korgoreet, ama kiboisyeun?’

⁴⁵ Kowolji anyun kole, ‘Amwaiwok iman ale, ko uu ye ma oyachi agenge eng' chu mengech eng' tugul, koma oyaiywo.’

⁴⁶ Ak pendi chu ole mi nyalilda ne po koigeny; ago pendi che po imanda ole mi saboondap koigeny.”