MATAYO 23 - Bukuit Ne Tilil

Kogerei kong' `Jeso siriik ak Pharisaik

¹ Ki mwachi Jeso anyun tuiyosyek ak kasubikyik koleenji,

² “Tebee siriik ak Pharisaik ng'echereetap Musa;

³ ko uu nooto anyun, oyai kiy age tugul ne ineetook ak osup nooto; ago moyai ko uu poisyonikwak, amu ma yaei icheek tuguuk che ineeti.

⁴ Ratei icheek lautik che nyigiisen ak ko pichiien eng' laiset ak konde tigigoigap piik; ama istoi icheeget eng' mornet agenge.

⁵ Ago yaei poisyonikwak tugul si kogeer piik; amu yaei kotebesiitu lolotinwegap siruutik ak kobaroi tabanwegap ngoroikwak.

⁶ Chamei icheek ole tagunoot eng' igoorwek ak ng'echerok che eecheen eng' sinagogisyek,

⁷ chamei kagatosyek eng' ole kiyae mung'aaret, ak kogasigei ye kasei koguure piik icheek ‘Rabbi.’

⁸ Ago amongeguurenok ‘Rabbi,’ amu agenge Kanetindeng'wong', ak okweek tugul ko otupchosyek.

⁹ Amoguure chii eng' ng'wony ‘abba,’ amu agenge Kwandang'wong', ineendet ne mi kipsengwet.

¹⁰ Amocham keguurenok ‘kaneetik,’ amu agenge kaneetindeng'wong', Kristo nooto.

¹¹ Ne oo eng' kwenung'wong' koegu kiboityondeng'wong'.

¹² Age tugul ne ieetegei ko tuun kiming'ini; ak age tugul ne iming'inigei ko tuun kieeti.

Konereekyin `Jeso siriik ak Pharisaik

¹³ “Ago pwo eng' okweek, siriik ak Pharisaik, chombilik! Amu ogere piik pounatetap kipsengwet. Amu mochutei okweeget olooto, ak che machei kochut olooto ko mochamjini koba.

¹⁴ Pwo eng' okweek, siriik ak Pharisaik, chombilik! Amu oame kooriigap mosoogik ak osaae saautik che kooen eng' ng'aalseenng'wong'; nooto anyun onyooru kirwooget ne siirtoot.

¹⁵ “Pwo eng' okweek, siriik ak Pharisaik, chombilik! Amu olandoe araraita ak obun emet ocheeng'e owal chii kobunjook, ak ye kagobunjok, oyai ineendet koek lakweetap Gehenna konyil aeng' kosiirok.

¹⁶ “Pwo eng' okweek, kandoik che oo koryotiin, che omwae ole, ‘Age tugul ne iyasyee Hekaluut koma kiy; ago age tugul ne iyasyee thahabu che po Hekaluut ko pesenindet.’

¹⁷ Okweek che oo perber ak oo koryotiin! Ngoro ne oo, thahabu anan Hekaluut ne ki itiliili thahabu?

¹⁸ Ak omwae ole, ‘Age tugul ne iyasyee kaptisisyet koma kiy; ago age tugul ne iyasyee kagoochinet ne mi kaptisisyet ko pesinindet ineendet.’

¹⁹ Okweek kipkoratinik! Ngoro ne oo, kagoochinet anan kaptisisyet ne itiliili kagoochinet?

²⁰ Ara ineendet ne iyasyee kaptisisyet, koyasyee kaptisisyonooto ak tuguuk tugul che miitei yooto.

²¹ Ara ineendet ne iyasyee Hekaluut, koyasyee olooto tiliil ak ineendet ne menyei olooto.

²² Ak ineendet ne iyasyee kipsengwet, koyasyee ng'echereetap Kamuktaindet ak ineendet ne tebee yooto.

²³ Pwo eng' okweek, siriik ak Pharisaik, chombilik! Amu ogoitoi kebebertap taman ne po heduosmon, pisalik ak kamon, ak ki obagaach chooto po kamanuut che po ng'atuutik: kirwooget ak rireenetapkei ak kayaneet. Chuuto che kanyool oyai amobagaach chuun alak.

²⁴ Okweek kandoik che oo koryotiin! Ogeneni ting'wichet ak olugui tambeesyet!

²⁵ “Pwo eng' okweek, siriik ak Pharisaik, chombilik! Amu otiliili kigombet ak sanit parak, ago oriit ko nyiitaat rebisyet ak keiyandit.

²⁶ Inyee Pharisaindet ne koraat! Itiliil korook kigombet oriit, si kobiit kotiliiliit parak agine.

²⁷ “Pwo eng' okweek, siriik ak Pharisaik, chombilik! Amu oo kerge ak kereeriisyek che kigesal koleelagitu, che korooron iman parak eng' keeret, ago nyiitootiin oriit kawegap piik che ki kobek ak murwoonindo tugul.

²⁸ Ara ou nooto okweek ye otaagu ko uu piigap iman eng' taitap piik, ago oriing'wong' ko nyiitaat chombilisyet ak tengekto.

Nyoonei kergong'yet

²⁹ “Pwo eng' okweek, siriik ak Pharisaik, chombilik! Amu oteeche kereeriisyegap maotik ak olelesanjini kereeriisyegap che po imanda.

³⁰ Ak omwae ole, ‘Nda ki kimi eng' peetuusyegap kwanisyekyok, ta ki ma keyamdoi ak icheeget tumdaetap korotiigap maotik.’

³¹ Nooto obaoryanjinigei oleen oo weeriigap icheek che ki par maotik.

³² Onyiit anyun kerutyetap kwanisyekwok.

³³ Erenochu, oo lagogap erenook che ng'woneen, ochilildoi ano eng' kirwoogetap Gehenna!

³⁴ Nooto anyun ayookwok maotik, piik che ng'oomen ak siriik, che alak eng' icheek ko tuun obare ak ogartoti, ak obire kipchoritiit alak eng' icheek eng' sinagogisyekwok, ak ousoti kong'etee nganaseet age agoi nganaseet age.

³⁵ Ak tebee paragung'wong' korotiigap che po imanda tugul che kigetumda eng' ng'wony, kobooch korotiigap Abel ne ki po iman agoi korotiigap Zekariah weeriitap Barachiah, ne ki obar eng' kwenutap Hekaluut ak kaptisisyet.

³⁶ Amwaiwok iman ale, pwaanjin ibini tuguuchu tugul.

Koriirchin `Jeso Jerusalem

³⁷ “Ee Jerusalem, Jerusalem, ne parei maotik ak kolage koik icheek che ki kiyookyi! Ki amach konyil ata ayum lagoguk ko uu ye iyumi ngokyet aarekyik eng' kebebaikyik, ago ma ocham!

³⁸ Ogeero, kagebagakwok koonng'wong' koek kipkuubere.

³⁹ Amu amwaiwok ale, ma ogeera kogeny agoi omwa ole, ‘Iberuurot ineendet ne nyoonei eng' kainetap Kiptaiyat.’ ”