MATAYO 22 - Bukuit Ne Tilil

Kalewenet agobo igoortap katunisyet

¹ Ki ng'alaalji Jeso icheek kogeny eng' kalewenaik, koleenji,

² “Kiyanie pounatetap kipsengwet laitoryat anum ne ki yachi weeriinnyi igoortap katunisyet.

³ Ki iyookto otwogikyik koguur icheek che kiga kemwachi agobo igoortap katunisyet; ago ma cham kobwa.

⁴ Ki iyookto kogeny otwogik alak kole, ‘Omwachi icheek che kiga keguur oleenji kachobok amitwogik. Kageeny eiik ak alak che akwaen, ak chobootiin tuguuk tugul; obwa igoortap katunisyet.’

⁵ Ago ma iit ng'aleekyik ak ki pa ortinwekwak, kwo age mbareennyi, kwo age poisyennyi ne po mung'aaret,

⁶ ko che ki ng'et konam otwogikyik, konyaliil ak kobar.

⁷ Ki nereech anyun laitoryat. Ki iyookto lugosyekyik kobar rumichooto ak kobeel nganasennywa.

⁸ Ki mwachi anyun otwogikyik koleenji, ‘Choboot igoortap katunisyet, ago ma nyoljin kobwa icheek kiga kemwachi.

⁹ Oba anyun ole pesyechin ortinwek, ak oguurchi igoorto tugul che konyooru.

¹⁰ Ki pa anyun otwogichooto ortinwek ak koyum tugul che kinyoor, che myach ak che yaach, ak ki nyi toek kootap katunisyet.

¹¹ “Ago ye kingo mong' laitoryat kogeer toek, kogeer chiito ne ki ma ilaach ngoryeetap katunisyet;

¹² ak ki leenji, ‘Chorwani, kenyonunde ano ko metinye ngoryeetap katunisyet?’ Ak ki nam kuut, ma twek.

¹³ Ki leenji anyun laitoryat kiboitiinik, ‘Orat ineendet eunek ak keelyek, ak owiirchi saang' ole mi mesundeito; olooto ole mi riirek ak nyeetap kelek.’

¹⁴ Amu kiguurei che chaang', ago ki leweni che ng'ering'.”

Teebut agobo kodi

¹⁵ Ki pa anyun Pharisaik ak korwooch ole namdoi ineendet eng' ng'aleekyik.

¹⁶ Ki iyookto kasubikwak kobooto che po Herodik koba ole mi ineendet, koleenji, “Kaneetindoni, kingen keele ii po iman, ak ineeti ooreetap Kamuktaindet eng' iman, ameiti chii tugul; amu megeere togoochigap piik.

¹⁷ Mwaiwech anyun, Ibwaati nee inyee? Tos chamdaat eng' ng'atuutik kigoochi kodi Caesarea anan achicha?”

¹⁸ Ago ki nai Jeso yaityennywa, ak kole, “Okweek chombilichu, amu nee si otyema?

¹⁹ Oboorwo fedha ne po kodi.” Ak ki ipchi dinarit.

²⁰ Ak kiteebe icheek koleenji, “Itoondap ng'oo ni, ak po ng'oo siruutyet?”

²¹ Kowol kole, “Po Caesarea.” Koleenji ineendet anyun icheek, “Ogoochi Caesarea tuguuk che po Caesarea; ak ogoochi Kamuktaindet tuguuk che po Kamuktaindet.”

²² Ye kingo kas icheek niito, kokwong'yo; ki pagaach ineendet ak koba ooreenywa.

Teebut agobo ng'eetyeet

²³ Ki pwanji ineendet peetuunooto Sadukaik, che mwaei kole ma mi ng'eetyeetap che ki kobek; ak koteebe ineendet kole

²⁴ “Kaneetindoni, ki mwa Musa kole, ‘Ngo me chii ama tinyei lagok, kondi ng'eetap kam osotyondonooto ak kolalji maat ineendet.’

²⁵ Ki mi kwenunnyo murenik tisabu che kitupcho; kiitunis ne po tai ak kime ama sich lakwa. Kondi osotyonnyi ng'eetap kamet.

²⁶ Ki yai ko uu nooto ne po aeng' agine ak ne po somok, agoi ne po tisap.

²⁷ Kingo keskei tugul, kome agine kobogoryondonooto.

²⁸ Eng' ng'eetyeet anyun, ko tuun punjin ng'oo osotyondonooto eng' chooto tisap? Amu kiga kotun tugul ineendet.”

²⁹ Ki wolji Jeso koleenji, “Oleele, amu mongen siruutik anan kimnateetap Kamuktaindet.

³⁰ Eng' ng'eetyeet ko tuun ma mi piik che itunisyei anan che igoitoi kitun, ago tuun kergeitu icheek ak malaikaisyek eng' kipsengwet.

³¹ Ak agobo ng'eetyeetap piik che ki kobek koma osoman ne kimwaiwok Kamuktaindet kole,

³² ‘Aa Kamuktaindet ne po Abraham, ne po Kamuktaindet Isak ak Kamuktaindet ne po Jakobo?’ Ineendet ko Kamuktaindet ma ne po che ki kobek, ago che saptos.”

³³ Ak ye kingo kas tuiyosyek, kokwong'yo agobo kaneetisyennyi.

Ng'atuutyet ne oo eng' tugul

³⁴ Ye kingo kas Pharisaik kole kagoyai `ng'aleegap Jeso Sadukaik konamak kuut, koyumgei

³⁵ ak koteebe age eng' icheek ne ki ng'amotyotap ng'atuutik, kole kotyem ineendet.

³⁶ Kile, “Kaneetindoni, ngoro ng'atuutyet ne oo eng' Ng'atuutik?”

³⁷ Ak ki wolji koleenji, “Cham Kiptaiyat Kamuktaindet ne Toroor neng'ung' eng' muguleldang'ung' komugul, eng' saboondang'ung' komugul ak eng' ng'omnateng'ung' komugul.

³⁸ Niito ng'atuutyet ne oo ak ko ne po tai.

³⁹ Ak ne po aeng' ne kergei ak niito ko ni, ‘Cham chiitap kokweng'ung' ko uu ole ichamdoige.’

⁴⁰ Tononie Ng'atuutik tugul ak maotik, ng'atuutichu aeng'.”

Teebut agobo Kristo

⁴¹ Kingo ta koyumigei Pharisaik, koteebe Jeso icheek ng'olyoo,

⁴² kole, “Obwaati nee okweek agobo Kristo? Weeriitap ng'oo ineendet?” Kowol icheek kole, “Weeriitap Daudi.”

⁴³ koteebee icheek koleenji, “Lyon anyun Daudi eng' kamugetap Kabuuset ne Tiliil, si koguuree ineendet ‘Kiptaiyat,’ koleen,

⁴⁴ ‘Ki leenji Kiptaiyat Kiptaiyandennyu, Tebee eunnyu ne po tai, agoi ande puuniguk keldebesaigap keelyeguk.’

⁴⁵ Ngot koguure anyun Daudi ineendet Kiptaiyat, ko weeriinnyi eng' nee?”

⁴⁶ Ki ma imuuch age tugul kowolji ineendet ng'olyoo, ak kobooch peetuunooto agoi ko mata kogany chii koteebe ineendet ng'olyoo kogeny.