MATAYO 20 - Bukuit Ne Tilil

Kalewenet agobo meek eng' mbareetap sabibuk

¹ “Amu kergei pounatetap kipsengwet ak chiitap ko po koot, ne kimusta karon koguur meek kobwa mbareennyi ne po sabibuk.

² Ye kingo kagoyanjin ak meechooto kogoochi dinarit agenge eng' peetuut agenge, koyookto koba mbareennyi.

³ Ki manda ko neegit sait somok ak kogeer alak kotonondos eng' ye mi ole keyae mung'aaret ama tinyei poisyet.

⁴ Ak ki leenji icheek, ‘Oba ak okweek oboisye eng' mbareetap sabibuk si agoonok ne nyolu.’ Ak ki pa anyun.

⁵ Ki manda kogeny ko neegit sait lo ak eng' sait sogool, ak ki yai ko uu nooto.

⁶ Ki manda kogeny olo po sait taman ak agenge, ak konyoor alak kotonondos. Ki leenji icheek, ‘Kalya si otonone oli peetuut komugul amotinye poisyo?’

⁷ Kowolji `pichooto ineendet kole, ‘Amu ma kuurech chii.’ Koleenji, ‘Oba ak okweekoboisye eng' mbareetap sabibuk.’

⁸ “Ye kingo ek koskoleny, komwachi chiitap ko po mbareetap sabibuk kiboityondennyi ne oo koleenji, ‘Guur meek si kobiit igoochi melekwekwak, itaune ne po let agoi ne po tai.’

⁹ Ye kingo pwa icheek che kiga kiguur ko neegit sait taman ak agenge, konyoor chii tugul dinarit agenge.

¹⁰ Ara ye kingo pwa che po tai, koleen nyooru che siirei; ago kinyoor ak icheek dinarit agenge chii tugul.

¹¹ Ye kingo taach, kong'unyng'ung'ji chiitap ko po koot,

¹² koleenji, ‘Kabois chu po let sait agenge kityo, ak kairogenech pichooto acheek che kagibirtegei peetuut komugul eng' asiista ne ng'waan.’

¹³ Ago ki wolji ineendet age eng' icheek koleenji, ‘Chorwani, ma ayaun kiy ne ya; kama kiyanjine tuwai dinarit agenge?

¹⁴ Nam neng'ung', ak iwe oreng'ung'. Magennyu agoochi chiichito po let ko uu ye kagoonin.

¹⁵ Tos ma nyoljino ayai ne amache eng' tuguukyuk? Anan amin ng'etkong', amu aa ayiep?’ ”

¹⁶ “Egu anyun che po let che po tai, ak egu che po tai che po let.”

Komwaei Jeso agobo meennyi

¹⁷ Ye kitogostoi Jeso kowendi Jerusalem, komut kasubikyik chooto taman ak aeng' koba taban icheegei, ak koleenji icheek eng' ooreet,

¹⁸ “Ogeero, kitogosyini Jerusalem, ak kinde Weeriitap chii eunegap tisiik che eecheen ak siriik. Kirwookyin ineendet kome,

¹⁹ ak kigoito kochurachur Pororyosyek, ak kebire kipchoritiit ak kogartaat eng' kimurtoiyot. Eng' peetuutap somok king'eeti ineendet.”

Soomutyetap kametap Johana

²⁰ Ki nyoonji anyun ineendet kametap weeriigap Zebedayo kobooto weeriikyik, ak kogutung'ji, ak kosoom ineendet kiy.

²¹ Ak kiteebe koleenji, “Imache nee?” Kowol kole, “Ng'at ile kotebee age eng' weeriichuchuk aeng' eung'ung' ne po tai, ak age eung'ung' ne po kaataam eng' laitornateng'ung'.”

²² Ago ki wol Jeso kole, “Mongen ne osoome. Omuuchi okweek oee kigombet ne neegit aee?” Kowolji icheek ineendet kole, “Kimuuchi.”

²³ Koleenji `Jeso icheek, “Oee iman kigombennyu, ago ketebee eunnyu ne po tai ak eunnyu ne po kaataam koma nenyu agoito, ago po icheek chooto Ki kochopchi kotabaanji Abba.”

²⁴ Ye kingo kas niito chuun tamanu, konereekyi chooto aeng' tupcho.

²⁵ Ago kiguur Jeso icheek ak koleenji, “Ongen ole pounee tegeet pounigap Pororyosyek, ak kolaitoranjin `kiptainik icheek.

²⁶ Ma uu nooto eng' okweek. Ago age tugul ne machei koek ne oo eng' kwenung'wong' koek kiboityondeng'wong';

²⁷ ak age tugul ne machei koek ne po tai eng' kwenung'wong' koek otwogindeng'wong';

²⁸ agot ko uu nooto ko ki ma nyo Weeriitap chii keboisyechi, ago si kobois, ak kogoito saboondanyi koek kiit ne kityage che chaang'.”

Keyatyin koonyek kipkoratinik aeng'

²⁹ Kingo mandoi Jeso ak kasubikyik eng' Jeriko, kosubi ineendet tuiyet ne oo.

³⁰ Ki mi kipkoratinik aeng' che ki tebyei eng' ooreet taban, ye kingo kas kole siirtoi Jeso, kowaakyo icheek ak kole, “Kiptaiyat, Weeriitap Daudi, rirenech!”

³¹ Ki kergong' tuiyet pichooto kole kosiisyo; ago kites kowaach kole, “Kiptaiyat, ee weeriitap Daudi, rirenech!”

³² Ki tonon Jeso ak koguur icheek, ak koteebe koleenji, “Omache ayaiywok nee?”

³³ Kowol kole, “Kiptaiyat, kimache keyatwech konyekyok.”

³⁴ Kirirge Jeso ak kitwa konyekwak. Kigeerto sainooto ak koosup ineendet.