MATAYO 19 - Bukuit Ne Tilil

Kaneetisyet agobo peesyet

¹ Ye kingo kagogees Jeso ng'aleechu, kwo eng' Galilaya agoi tabanwegap Judea, Jordan pitoniin;

² Ki isup ineendet tuiyosyek che eecheen; ak ki isoop icheek eng' olooto.

³ Ki pwanji ineendet `alage eng' Pharisaik ak kotyem kole, “Tos chamdaat eng' ng'atuutik koon chii osotyonnyi agobo kiy age tugul?”

⁴ Kowolji kole, “Tom osoman, ole ineendet ne ki yai icheek eng' taunet ko ki yai muren ak kobogoryo,”

⁵ ak ki le, “Amu niito anyun ko pagaktoi mureno kwanda ak kamet ak konamgei ak osotyonnyi; ak koek tuwai poorto agenge?

⁶ Si ma ko aeng' ago poorto agenge. Nooto anyun, che ki kotuiyo Kamuktaindet, komat koobeesyo chii.”

⁷ Ki leenji anyun pichooto ineendet, “Kilya anyun si kong'at Musa kole kigoochin sireet ne po peesyet ak koon kwo?”

⁸ Ki mwachi icheek koleenji, “Ki chamwok Musa oon osotikwok amu uuindap mugulelwekwok, ago ki ma ko uu nooto kobooch taunet.

⁹ Amwaiwok ale, chii age tugul ne oonei osotyonnyi, ama eng' ng'olyootap sokseet, ak kotun age, ko kabaigei, ak ineendet ne ituni ne kigeon ko kabaigei.”

¹⁰ Koleenji kasubikyik ineendet, “Ngot ko uu nooto ateptap muren ak osotyonnyi, koma nyolu kitunis.”

¹¹ Ago ki leenji `ineendet icheek, “Temenee piik tugul kotaach kaneetisyoni, kobatee icheek che kigoochin.

¹² Amu miitei sirorinik che ki kisich ko uu nooto kobooch mootinwegap kametwagikwak; miitei piik che ki kimooch; ak miitei piik che ki imoigei agobo pounatetap kipsengwet. Ineendet ne imuuchi kotaach ni, kotaach.”

Koberuuri `Jeso lagok

¹³ Ki kimutyi anyun lagok che mengech, si kobiit kogonoor eunekyik icheek ak kosa. Ago ki kergong' kasubik icheek.

¹⁴ Ki le Jeso, “Ochamji lagok che mengech kobwanjo, amoete icheek, amu po che uu chuuto pounatetap kipsengwet.”

¹⁵ Ye kingo konoor eunekyik icheek, kwo eng' olooto.

Teebutyet agobo saboondap koigeny

¹⁶ Ki nyoonji chii ak kole, “Kaneetindoni, nee kiy ne myee ne kanyool ayai si anyoor saboondap koigeny?”

¹⁷ Ak ki leenji ineendet, “Kalya si iteebena agobo nooto myee? Mi agenge ne myee. Ngimache imong'ji saboondo, inam ng'atuutik.”

¹⁸ Ki leenji ineendet, “Che uu nee?” Kowolji Jeso kole: “Amerumisye; Amoipkei; Amechoorse; Amebaoryanji lembech;

¹⁹ Teech kwandang'ung' ak kamenng'ung'; ak, cham chiitap kokwet ko uu ye ichamdoige.”

²⁰ Koleenji murenonooto, “Ki ariip tuguuchu tugul; ta ko ng'etunot nee eng' anee?”

²¹ Koleenji `Jeso ineendet, “Ngimache iegu ne ititaat, iwe ak ialde che itinye, ak igoochi kibananook, si inyooru mogornateet eng' kipsengwet; yeityo inyoo ak isubwo.”

²² Ago ye kingo kas murenonooto mwaonooto, kwo eng' kaimetapkei, amu ki tinyei tuguuk che chaang'.

²³ Ki leenji `Jeso kasubikyik, “Amwaiwok iman ale, uui eng' mogoryot komong'ji pounatetap kipsengwet.

²⁴ Kogeny amwaiwok ale, nyamnyum eng' tambeesyet kochut kondap sindanut, kosiir komong'ji mogoryot laitornatetap Kamuktaindet.”

²⁵ Ye kingo kas kasubik ng'olyoondonooto, kokwong'yo miising' ak kole, “Ng'oo anyun ne imuuchi konyoor saruunet?”

²⁶ Ago ki keer Jeso icheek ak koleenji, “Ma imugaksei ni eng' piik, ago imugaksei tuguuk tugul eng' Kamuktaindet.”

²⁷ Ki wolji Petero anyun koleenji, “Keero, kigebagaakte tuguuk tugul, ak ki kisubun. Kinyooru nee anyun acheek?”

²⁸ Ki leenji `Jeso icheek, “Amwaiwok iman ale, eng' kalelitetap tuguuk tugul, ye tuun tebee Weeriitap chii ng'echereetap toroornatennyi, okweek che koosubwo ko tuun otebee ak okweek ng'echerok taman ak aeng' che po laitornatet, orwookyini ortinwek taman ak aeng' che po Israel.

²⁹ Ak age tugul ne ki kobagakta kooriik, anan ng'eetap kametwagik, anan chepkametwagik, anan kwanda, anan kamet, anan lagok, anan mbareenik, agobo kainennyu, kotaachei konyil pogol, ak koboor eng' saboondap koigeny.

³⁰ Ago che chaang' che po tai ko tuun egu che po let; ak che po let ko tuun egu che po tai.