MATAYO 18 - Bukuit Ne Tilil

Ooindo ne po iman

¹ Ki pwanji `kasubik Jeso eng' sainooto ak koteebe kole, “Ng'oo anyun ne oo eng' tugul eng' pounatetap kipsengwet?”

² Ki kuur lakweet ne ming'in ak kotonon eng' kwenunnywa,

³ ak kole, “Amwaiwok iman ale, ngot ko mowalage ak oige lagok che mengeech, ko moite pounatetap kipsengwet.

⁴ Nooto anyun age tugul ne iming'inegei ko uu lakwani ming'in, ko oo nooto eng' tugul eng' pounatetap kipsengwet.

⁵ Ak age tugul ne taachei lakweet ne ming'in ne uu ni eng' kainennyu ko kataacha.

Tyemuutik

⁶ “Ago age tugul ne inachi age eng' chu mengech iyana, ko kaigai eng' ineendet kirooch kaatinnyi koitap pai ne oo, ak kechoorchi rireetap araraita.

⁷ Pwo ng'wony amu kanagutik! Pwoonei kanagutik iman; ago pwo eng' chiichooto punu kanagutyet!

⁸ “Ngo nachin eung'ung' anan keeldong'ung', itil ak iwiirte. Kaigai eng' inyee imong'ji saboondo ii po mugung' anan ii po keelok kosiir itinye eunek aeng' anan keelyek aeng' ak kewiirchin maat ne po koigeny.

⁹ Ak ngo nachin kondang'ung', ibalu ak iwiirte. Kaigai eng' inyee imong'ji saboondo ii po kong'ak kosiir itinye koonyek aeng' ak kewiirchin Gehenna, ye mi maat.

Keechiiryet ne kigabet

¹⁰ “Oriip si mosas age eng' chu mengech; amu amwaiwok ale malaikaisyekwak eng' kipsengwet ko keerei kotugul togeetap Abba ne mi kipsengwet.

¹¹ Amu ki nyo Weeriitap chii kosar ne kiga kobet.

¹² Oleen nee okweek? Ngo tinyei chii keechiirek pogol, ak kwo age kobetot, ko tos ma pagaaktoi chuun tamanwogik sogool ak sogool che mi tuloonook, ak kocheeng'at ne kagobetot?

¹³ Ak ngo nyoor, amwaiwok iman ale, poiboitu agobo nooto kosiir chuun tamanwogik sogool ak sogool che ma petyo.

¹⁴ Ko uu nooto anyun koma mageetap Kwandang'wong' ne mi kipsengwet, kolus age eng' chu mengech.

Kegere kong' ne kaleel

¹⁵ “Ngo chalwogenjin ne otupche, iwe, iboorchi lelutyennyi omi tuwai okweegei. Ngo kasin, ko kagogelun ne otupche.

¹⁶ Ago ngo ma kasin, imut agenge anan aeng' alak, si kogimit ng'olyoot age tugul eng' kutusweegap paorinik aeng' anan somok.

¹⁷ Ngo eesyo kogas icheek, imwachi kaniset; ak ngo eesyo kogas iit kaniset agine, iingoigei eng' inyee kipsagarin ak taagindetap aisuruut.

Che etan ak che chamaatin

¹⁸ “Amwaiwok iman ale, tuguuk alak tugul che orate eng' ng'wony keratei eng' kipsengwet, ak tuguuk alak tugul che otyachi eng' ng'wony kityaachi eng' kipsengwet.

¹⁹ Amwaiwok kogeny, ale, ngo yanjin aeng'u eng' okweek eng' ng'wony agobo kiy age tugul ne soomei, koyachin Abba anyun ne mi kipsengwet.

²⁰ Amu ole katuiyechi aeng'u anan somok eng' kainennyu, ami kwenunnywa eng' olooto.”

Nyoetap kaat

²¹ Ki nyo anyun Petero ak koteep kole, “Kiptaiyat, nyolu anyochi kaat ne kitupche konyil ata ye kachalwogenjo? Agoi konyil tisap?”

²² Kowolji Jeso kole, “Ma mwaun ale, konyil tisap; ago, agoi tamanwogik tisap konyil tisap.

²³ Nooto anyun kiyanie pounatetap kipsengwet laitoryat anum, ne machei koiityi tuguuk otwogikyik.

²⁴ Ye kingo toi koiit, kimutyi agenge, ne kibesen talendaisyek eliphuusyek taman.

²⁵ Ak amu ki ma kotinyei kiy ne yaaktae, kong'at kiptaiyandennyi kealda ineendet, osotyonnyi, lagokyik ak tugul che ki tinyei, si koyaaktae pesendo.

²⁶ Ki ibutyi ng'wony anyun otwogindonooto kosaisai ineendet kole, ‘Kiptaiyat, muitaiwo kitigin, si ayaagun tugul.’

²⁷ Koriree kiptaiyandanooto inee, ki ityaach ak konyochi kaat eng' pesendo.

²⁸ “Ago kimanda otwogindonooto kai, ak konyoor age ne kiboisyei tuwai, ne kigabesen inee dinarisyek pogol. Ki nam ineendet kaatit ak kole, ‘Yaakwo che ki ibesena.’

²⁹ Ki ibutyi ng'wony anyun ne kiboisyei tuwai, kosoom ineendet, kole, ‘Muitaiwo kitigin, si ayaagun.’

³⁰ Ago ki eesyo; ak ki wo kotoorchi ineendet korgoreet, agoi koyaak tugul che kiga pesen.

³¹ “Ye kingo keer anyun che kiboisyei tugul tuguuk che kagoyaagiis, koaragenso miising' ak koba komwachi kiptaiyannywa tuguuk tugul che kagoyaagiis.

³² Ki kuur anyun kiptaiyandennyi ineendet konyo ak koleenji, ‘Ee otwogindet ne kipyaitwet, ki anyoun kaat eng' pesenooto tugul, amu ki isooma.

³³ Tos ki ma nyoljin iriiree ne oboisyei tuwai, ko uu ye ki ariirenen?’

³⁴ “Eng' nereeknateet koging'at kiptaiyandennyi kigoochi ineendet kergong'yet ne ng'waan, agoi koyook tugul che kiga pesen.

³⁵ Yaiywok ko uu nooto agine Abba ne po kipsengwet, ngo monyochi kaat age tugul eng' mugulelwekwok ne otupche.”