MATAYO 17 - Bukuit Ne Tilil

Waletapkei ne po Jeso

¹ Kingo pata peetuusyek lo komut Jeso Petero, Jakobo ak Johana ng'eetap kam, ak ki indochi icheek kolaany tulweet ne kooi, koba uwak icheegei.

² Kiwalak ineendet eng' tainnywa, ak ki iluu togeennyi ko uu asiista, ak kileelagitu ngoroikyik ko uu lapkeiyet.

³ Eng' sainooto ko ki took eng' tainnywa Musa ak Elijah, kong'alaaljindos kobooto ineendet.

⁴ Ki wolji `Petero Jeso koleenji, “Kiptaiyat, myee eng' acheek ye kimi yu. Ngichame, amuuchi ateech eng' oli keryosyek somok, neng'ung' age, po Musa age ak po Elijah age.”

⁵ Kingo ta kong'alaali, ogeero, kouur icheek pooldet ne iluu: ak ogeero, ki mang'une kutit pooldet, kole, “Ni ko Weeriinnyu, chamanennyu, ineendet ne agasegei miising'; ogas okweek ineendet.”

⁶ Ye kingo kas kasubik, kobutyo kot koit togoochikwak ng'wony, koiyweis miising'.

⁷ Ki nyo Jeso ak kotwa icheek ak koleenji, “Ong'eetyee, amoiyweisye.”

⁸ Kingo yoot met, koma keer chii kobatee Jeso ineegei.

⁹ Ye kita kochoorugei eng' tulweet, kong'at Jeso icheek koleenji, “Amomwachi chii kaboorunoniito agoi tuun kogagobata kong'eet Weeriitap chii eng' che ki pek.”

¹⁰ ki teebee kasubikyik ineendet kole, “Amu nee anyun si komwaei siriik kole nyoonei Elijah korook kondou?”

¹¹ Kowol Jeso kole, “Iman indou Elijah, ak koweech tuguuk tugul;

¹² ago amwaiwok ale kigonyo Elijah, ak ki ma nai icheek ineendet, ago ki yachi ineendet kiy age tugul ne kimach. Agot ko uu nooto tuun nyalili Weeriitap chii agine eng' eunekwak.”

¹³ Konai anyun kasubik kole ki ng'alaaljin icheek agobo Johana Kabatisanindet.

Kisoobi weeriit ne amei iywek

¹⁴ Ye kingo kagobwa ole mi tuiyet, konyonji ineendet chiito ak kogutung'ji, ak kole,

¹⁵ “Kiptaiyat, rireegei weeriinnyu, amu amei iywek, ak nyalili miising'. Ibutyin konyil ak konyil ma anan ko peek.

¹⁶ Ak koamutyi kasubiguk, ago ma imuuch kosoop ineendet.”

¹⁷ Ki wol Jeso kole, “Ee ibinda ne ma tinyei kayaneet ak komaasat, atebye ak okweek kot kotyanit? Amuitoi kot kotyanit agobo okweek? Imutwaa ineendet.”

¹⁸ Ki kergong' Jeso oindet, ak komanda eng' ineendet ak kosap weerooto sainooto.

¹⁹ Ki pwanji anyun `kasubik Jeso eng' taban ak koteebe kole, “Kalya si ma kimuuch acheek keon komanda?”

²⁰ Ki leenji, “Amu otinye kayaneet ne ming'in. Amwaiwok iman ale ndotinye kayaneet ne tee keswootap karadali, ta ngo mwachi tulwooni oleenji, ‘Inakte ui oliin,’ konaktoi; ak ta ma mi kiy ne ma imugaksei eng' okweek.”

²¹ Ago ma mandoi ne uu ni kobatee eng' saaet ak karugutetapkei.

Kosip komwau Jeso agobo meennyi

²² Ye kingo ta kobeniei icheek eng' Galilaya, koleenji `Jeso icheek, “Kindoi Weeriitap chii eunegap piik;

²³ ak kobar `icheek ineendet, ak king'eet kogeny eng' peetuutap somok.” Ak ki aragenso icheek anyun miising'.

Konunetap Shekel

²⁴ Ye kingo kagoit Jeso ak kasubikyik Kapernaum kobwonji taagigap kebebertap shekel ak kole, “Magoonu kaneetindeng'wong' kebebertap shekel?”

²⁵ Ak kole, “Ee, yaei nooto.” Ye kingwo ko Petero, kosip kong'alaalji `Jeso ineendet koleenji, “Ibwaati nee, inyee, Simion? Laitorinik che po ng'wony konyoorunee ng'oo aisuruut anan kodi? Eng' weeriikwak anan eng' piik alak?”

²⁶ Kingo wol Petero kole, “Eng' toek,” koleenji `Jeso ineendet, “Nooto anyun ityagatin weeriik.”

²⁷ Si ma kinach icheek, iwe araraita ak iwiirchi ndoanet, ak injiryo ne kamong' ne tai, inam; ak ye kaiyat kutinnyi, inyooru shekel nam nooto, ak igoite agobo anee ak inyee.