MATAYO 16 - Bukuit Ne Tilil

Soometap kaboorunet

¹ Ki pwa Pharisaik ak Sadukaik, ak kotyem ineendet kole koboorchi kaboorunet kobun kipsengwet.

² Ago ki wolji icheeget koleenji, “Ngo ek koskoleny, omwae oleen, ‘Moeni mutai, amu piriir parak,’

³ ak ngo ek karon omwa ole, ‘Usei ra, amu piriir ak kotulungenot parak.’ Ongen obesye ole teptoi soet parak, ago momuuchi obesye kaboorunoigap peetuusyechu.

⁴ Cheeng'ei kaboorunet ibinda ne ya, ak ne po ibeetapkei, ago ma kiboorchin kaboorunet kobatee kaboorunetap Jona.” Ki pagaakta icheek ak kwo kowechigei.

Kotechin Jeso piik

⁵ Ye kingo kagolanda pitetap araraita, kogiutye kasubik koip magatiinik.

⁶ Ki leenji `Jeso icheek, “Oep iit ak oriibegei mermereegap Pharisaik ak Sadukaik.”

⁷ Ki ng'alaaljigei icheegei ak kobwaatyigei koleen, “Abeere amu ma kiibu magatiinik.”

⁸ Ki nai Jeso kabwaatutikwak ak ki leenji, “Ee okweek che otinye kayaneet ne ming'in, kalya si ong'alaali agobo magatiinik che ma mi?

⁹ Moguitosi agoi nguno? Mobwaati magatiinik muut eng' piik eliphuusyek muut, ak mesendoigap amitwogik che tee che ki oyum?

¹⁰ Anan magatiinik tisap eng' piik eliphuusyek ang'wan, ak mesendoigap magatiinik che tee che ki oyum?

¹¹ Lyon si moguiye ole ka ma ng'alaalwok agobo magatiinik? Ago oriibegei mermereegap Pharisaik ak Sadukaik.”

¹² Ki nai anyun kole kamamwochi icheek koriibegei mermereek che kichobe magatinik, ago kaneetisyosyegap Pharisaik ak Sadukaik.

Teebutyet agobo weeriiitap Chii

¹³ Ye kingo nyo Jeso komostap Kaisarea Philippi, koteebe kasubikyik koleenji, “Mwaei piik koleen ng'oo Weeriitap chii?”

¹⁴ Kowol icheek kole, “Mwaei alak koleen Johana Kabatisanindet, koleen alage Elijah, ko alak koleen Jeremiah anan ko age eng' maotik.”

¹⁵ koteebee koleenji, “Ago oleen okweek aa ng'oo?”

¹⁶ Ki wol Simion Petero kole, “Ii Kristo, weeriitap Kamuktaindet ne sabei.”

¹⁷ Kowol Jeso kole, “Iberuurot inyee, Simion Barjona, amu mang'ang'un niito poorto anan korotiik, ago Abbannyu ne mi kipsengwet.

¹⁸ Amwaun anee ale ii Petero, ak eng' rwandani ateeche kanisennyu, ak ma neneti kimnatosyegap ye mi che ki kobek.

¹⁹ Agoonin yaateiwegap pounatetap kipsengwet, ak kiy age tugul ne irate eng' ng'wony, keratei eng' kipsengwet; ak kiy age tugul ne ityaachi eng' ng'wony, kityaachi eng' kipsengwet.”

²⁰ Ki ng'at kasubik kole amat komwachi chii kole ineendet ko Kristo.

Sip komwau Jeso agobo meennyi ak ng'eetyeennyi

²¹ Kobooch yooto anyun, kotoi Jeso koboorchi kasubikyik kole wendi ineendet Jerusalem, ak nyooru kanyaliilet ne oo eng' eunegap poisyek, tisiik che eecheen ak siriik, ak kebar, ak eng' peetuutap somok, king'eet.

²² Ki nam Petero ineendet komut taban ak kotoi koger kong' koleen, “Achicha Kiptaiyat! Ma nyoonjin niito agoi.”

²³ Ago kiweleljigei ak koleenji Petero, “Istoenongei, Setani! Ii kanagut eng' anee; amu ma ibwaati inyee tuguugap Kamuktaindet, ago ibwaati che po kipkosabei.”

²⁴ Kingo pata koleenji Jeso kasubikyik, “Ngo machei chii kosubwo, ko nyolu koeesyogei, ak kosut koip kimurtoiyondennyi, ak kosubwo.

²⁵ Amu age tugul ne machei kosar saboondanyi, kobeeti, ak age tugul ne ibeeti saboondanyi agobo anee, konyooru.

²⁶ Keljino nee ne nyooru chii, ngo nyoor ng'wony komugul, ak kobeet saboondanyi? Anan tos igoito nee chii kowale saboondanyi?

²⁷ Tuun nyoonei Weeriitap chii eng' liilindap Kwandanyi kobooto malaikaisyekyik, ak kogoochi chii age tugul ko uu poisyonikyik.

²⁸ Amwaiwok iman ale, mi alak eng' che tonondos eng' yu che ma chamchami meet kot kogeer konyonei Weeriitap chii eng' pounatennyi.”