MATAYO 13 - Bukuit Ne Tilil

Kalewenet agobo kolindet

¹ Ki wo Jeso peetuunooto komanda eng' koot ak kwo kotebee ngeguutap araraita.

² Ki iyumjigei ineendet tuiyosyek che eecheen kot koit kolaany moingetap peek ak kotep ng'wony, ak ki ng'et tuiyet komugul eng' ngeguut.

³ Ki mwachi icheek tuguuk che chaang' eng' kalewenaik koleenji, “Ogas o! Ki wo kolindet koleeta

⁴ ak kingo ta koletoi, kobutyi kesweek alak tabandap ooreet, ak ki pwa toriitik ak koam.

⁵ Ki ibutyi alak ole mi koik, ole ki ma kotinyei ng'ung'unyek che chaang' ak ne matyaniit kobiityo amu ki ma kotya ng'ung'unyek.

⁶ Kingo chor asiista, kolalyo ak koresyo amu ki ma kotinyei tigitik.

⁷ Ki ibutyi kesweek alak ole ki mi katook, ak ki piityo katook ak kogiich.

⁸ Ki ibutyi alak ng'ung'unyek che myach, ak koiyo logoek, alak pogol, alak tamanwogik lo, ak alak sosom.

⁹ Ineendet ne tinyei itiik che kastoi, kogas.”

Kalewenaik

¹⁰ Ki pwa kasubik ak koleenji, “Kalya si ing'alaalji icheek eng' kalewenaik?”

¹¹ Kowolji koleenji, “Kagegoonok onai ung'ootik che po pounatetap kipsengwet, ago ma kigoochi icheek.

¹² Amu age tugul ne tinyei, ko tuun kigoochin si konyoor che chaang' kosiir; ago age tugul ne ma tinyei, kereben agot che katinyei.

¹³ Ang'alaaljini eng' kalewenaik amu nganda keertoi koma keerei kiy, ak nganda kastoi, koma kasei kiy anan koguiyo.

¹⁴ Isuldaat eng' icheek maonateetap Isaiah ne leen, ‘Eng' kaseet ko tuun ogase, ago moguitosi, ak eng' keeret ko tuun ogeere, ago mobestosi agot kitigin.

¹⁵ Amu kwalilenotin mugulelwegap pichu, ak ma kastoi komyee iitiikwak, ak ki kogeer konyekwak, si ma keer eng' konyekwak, anan kogas eng' iitiikwak, anan koguiyo eng' mugulelwekwak, si koweek kogeny ak asoop icheek.’

¹⁶ “Ago iberuurotin konyekwok, amu keertoi, ak iitiikwok, amu kastoi.

¹⁷ Amwaiwok iman ale, ki machei maotik che chaang' ak piigap imanda kogeer tuguuk che ogeere, ago ki ma keer; ak kimachei kogas ng'aleek che ogase, ago ki ma kas.

Kalewenetap Kolindet

¹⁸ “Ogas anyun okweek kalewenet ne po kolindet.

¹⁹ Ye kasei chii age tugul ng'olyootap laitornatet ama iguiyo, ko nyoonei anyun ineendet ne ya ak korebee ne kagagelechi muguleldanyi. Niito ne ki kilechi tabandap ooreet.

²⁰ Nooto ne ki kilechi ole mi koik, ko ineendet ne kasei ng'olyoot ak kotaach eng' poiboiyet,

²¹ ago amu ma tinyei tigitik ineendet, ko tebyei ne matya, ak ye kanyo nyalilda anan usiisyet agobo ng'olyoot, kinach anyun ineendet.

²² Nooto ne ki kilechi ole mi katook, ko ineendet ne kasei ng'olyoot ak kogiich kererwegap met che po ng'wony, ak kaberberisyet ne po mogornateet, si mai.

²³ Ne ki kilechi ng'ung'unyek che myach, ko ineendet ne kasei ng'olyoot ak koguiyo, ne yiei logoek iman, alak pogol, alak tamanwogik lo, ak alak sosom.”

Kaneetisyet agobo Chemulbai

²⁴ Ki mwachi kalewenet age koleenji, “Kergei pounatetap kipsengwet ak chiito ne ki koolji kesweek che myach mbareennyi,

²⁵ ago ye kita koruitos piik, konyo punyondennyi ak kogoolji chemulbainik ole mi peek, ak kwo.

²⁶ Ago ye kingo piityo minutik, ak koi peek, kotook ak icheek chemulbainik.

²⁷ Ki pwa otwogik che po chiitap koot ak koleenji, ‘Kiptaiyat, ki ma igoolji kesweek che myach mbareeng'ung'? Ki pun ano chemulbainik?’

²⁸ Kowolji koleenji, ‘Kiyaei nooto puunyoot.’ Koleenji otwogik, ‘Tos imache keebe kitutote?’

²⁹ Ago ki leenji, ‘Achicha, si ma ye otuti chemulbainik, otutunde peek.

³⁰ Ingobiityo tugul agoi kesisyet, ak eng' peetuutap kesisyet, ang'at kesik si koyum korook chemulbainik ak korat ratuutik si kebeel, yeityo koyumji chogennyu peek.’ ”

Kalewenet agobo keswoot ne ming'in

³¹ Ki mwachi kalewenet age koleenji, “Kergei pounatetap kipsengwet ak keswootap karadali, ne ki ip chiito ak komiinji mbareennyi.

³² Ming'in iman eng' kesweek tugul, ago ye kagoeet, ko oo kosiir minutik tugul che po mbar, ak egu keetit ne tebee toriitik mooriikyik.”

Kalewenet ne po laitornatetap kipsengwet

³³ Ki mwachi kogeny kalewenet age koleenji, “Kergei pounatetap kipsengwet ak mermereek che ki nam kobogoryot, ak koburukto peek che ng'ootiin che po kitongok somok, agoi kogut tugul.”

Kaneetisyet eng' kalewenaik

³⁴ Ki mwachi Jeso tuiyosyek tuguuchuuto tugul eng' kalewenaik; ki ma ng'alaalji icheek ama eng' kalewenet

³⁵ si kosulda ne ki kamwa maotyot kole: “Ayaate kutinnyu eng' kalewenaik; amwae tuguuk che ki kiuny kobooch koga kelumda ng'wony.”

Kiaroru agobo chemulbainik

³⁶ Ki pagaakta anyun tuiyosyek, ak kwo ko. Ki pwanji kasubikyik ak koleenji, “Iarorwech agobo kalewenetap chemulbainigap mbar.”

³⁷ Ki wolji kole, “Ineendet ne kileta kesweek che myach ko Weeriitap chii,

³⁸ ak mbareet ko ng'wony. Kesweek che myach ko weeriik che po laitornatet, ak chemulbainik ko weeriitap ineendet ne ya.

³⁹ Puunyoot ne ki koolei chemulbainik ko chesawilyet. Kesisyet ko kagesunetap ng'wony ak kesik ko malaikaisyek.

⁴⁰ Ko uu ye kiyumi chemulbainik ak kebeel eng' maat, ko egu ko uu nooto eng' kagesunetap ng'wony.

⁴¹ Iyooktoi Weeriitap chii malaikaisyekyik, koba koyum komang'une laitornateennyi, tuguuk tugul che inachi piich, ak icheek che yaei tengek,

⁴² ak kowiirchi maat ne oo, ole tuun mi kateeiyet ak nyeetap kelek.

⁴³ Iluu anyun che po imanda ko uu asiista eng' laitornatetap Kwandanywa. Ineendet ne tinyei iitiik, kogas.

Pounatetap kipsengwet

⁴⁴ “Kergei pounatetap kipsengwet ak kiy ne po kamanuut ne ung'aat eng' mbar ne kinyoor chii ak kouny. Ki wo kogasategei ak koalda tugul che ki tinyei si koale mbaranooto.

Kiaroru agobo chemung'araiya

⁴⁵ “Kogeny, kergei pounatetap kipsengwet ak chemung'araiya ne cheeng'ei sonoek che korooron,

⁴⁶ ak ye kingo kagonyoor sonoiyat agenge ne po alyet ne oo, kwo koalda tugul che ki tinyei ak koale sonoiyandanooto.

Kiaroru agobo regereiywot

⁴⁷ “Kora, kergei pounatetap kipsengwet ak regereiywot ne kiname njireenik, ne ki kiwiirchi araraita ak koyum injiren tugul che teerchiin.

⁴⁸ Ye kingo kagonyi, kochuut konyo ngeguut ak kotep ng'wony. Ki iyumji che myach kitongok ak kolakta che yaach.

⁴⁹ Egu ko uu nooto eng' kagesunetap ng'wony. Tuun pwoonei malaikaisyek koobeesyo che yaacheen eng' kwenutap che po imanda,

⁵⁰ ak kowiirchi maat ne lalei, ole tuun mi kateeiyet ak nyeetap kelek.”

Konorwetap tuguuk che leelach ak che po keny

⁵¹ “Kaoguiye tuguuchuuto tugul?” Kowol kole, “Ee.”

⁵² Koleenji anyun, “Ko uu nooto anyun, siriindet age tugul ne ki kineet komyee ng'aleegap pounatetap kipsengwet, ko kergei ak chiito ne po koot, ne inemu tuguuk che leelach ak che po keny eng' ole konoree tuguukyik che po kamanuut.”

Keesyoi Jeso eng' Nazaret

⁵³ Ye kingo kagogees Jeso kalewenaichu, kwo eng' olooto.

⁵⁴ Ki it nganaseennyi ne po kaa, ak konaam koneet icheek eng' sinagoginnywa kot ko kwong'yo ak kole, “Kanyoorunee ano chiichi utaatyoni ak poisyonichu kiimeen?

⁵⁵ Tos ma weeriitap musogindet ni? Ma kiguure kamet Maria ak weeriik che tupcho ko Jakobo, Joseph, Simion, ak Judas?

⁵⁶ Tos ma mi chepkametwagik tugul kobootech? Ki nyoorunee ano anyun chiichi tuguuchuuto tugul?”

⁵⁷ Ki inach icheek ng'aleekyik. Ago ki leenji `Jeso icheek, “Nyooru maotyo teegis, kobatee eng' emennyi, ak eng' koonnyi.”

⁵⁸ Ma yai kwang'utik che chaang' eng' olooto amu pistoennywa.