MATAYO 11 - Bukuit Ne Tilil

Ng'olyootap Johana kabatisanindet

¹ Ak ye kingo kagong'at `Jeso kasubikyik taman ak aeng' kogees, kwo eng' olooto koneetisyot ak koamdoi eng' nganasookwak.

² Ak kingo kas Johana eng' korgoreet poisyosyek che po Kristo, koyooktoe ng'olyoo aeng' eng' kasubikyik,

³ ak koteebe ineendet kole, “Tos ii ineendet ne nyoonei, anan kiganye age?”

⁴ Ak ki wolji Jeso koleenji, “Oba pandang'wong', ak omwachi Johana tuguuk che ogase ak che ogeere:

⁵ keertoi che koryotiin, ak kobendoti che salamonik, kitiliili che tinyei mogondosaik, ak kastoi che ming'otin, ak king'eeti che ki kobek, ak keamjin kibananook logoiywek che myach.

⁶ Ak paibai age tugul ne ma nyoorunena kanagut eng' ui tugul.”

⁷ Ak ye kita kobendi chu pandanywa, kotoi Jeso komwachi tuiyosyek agobo Johana koleenji, “Ki omande surkwen ogeer nee? Tegat ne itumdumi usoonet?

⁸ Ki omande ogeer nee? Chiito ne ilaachi ngoroik che tangusen? Ogeero, icheek che ilaachi ngoroik che tangusen komi kooriigap laitorinik.

⁹ Ago kilya si omande? Si kobiit ogeer maotyot? Ee, amwaiwok ale, siirei ineendet maotyot.

¹⁰ Niito ko ineendet, ne ki kisir keele, ‘Keero, ayooktoi kiboityondennyu kondoenen, ne chobei oreng'ung' eng' taing'ung'.’

¹¹ Amwaiwok iman ale, tom kobiit ne siirei Johana Kabatisanindet eng' che ki sich kobogorisyek: ago ineendet ne ming'in miising' eng' pounatetap kipsengwet ko oo kosiir ineendet.

¹² Ak kobooch peetuusyek che po Johana Kabatisanindet agoi nguno korwochin piik pounatetap kipsengwet, ak namei piik che koroomen eng' kimnateet.

¹³ Amu ki maotenso maotik tugul ak Ng'atuutik agoi koit peetuusyegap Johana.

¹⁴ Ak ngo chame otaach ko uu nooto, ko Elijah niito, ne nyoonei.

¹⁵ Ineendet ne tinyei iitiik che kastoe, kogas.

¹⁶ “Ago aroge nee ibini? Kergei ak lagok che tebyei eng' ole kiyae mung'aaret, che kuurei siritoikwak,

¹⁷ ak kole, ‘Kigeguutwak ndurerusyek, ak ki ma oureren; ki kiteeye ak ki ma oriirye.’

¹⁸ Amu ki nyo Johana ak ki ma amis anan koeeiso, ak kole piik, ‘Tinyei oindet’.

¹⁹ Ki nyo Weeriitap chii koamis ak koeeiso, ak kole piik, Ogeero, chiito ne kipkeiya, ak eeindetap divaik, chorweetap taagigap aisuruut ak kiptengeginik. Ak naat utaatyet keele po iman eng' poisyonikyik.”

Nganasook che matinyei kayanet

²⁰ Ki toi anyun koger kong' nganasook che ki kiyae poisyonikyik che po kamuktaet, che chaang' kosiir, amu ki ma sik.

²¹ Pwo! Wee Korazin! Pwo! Wee Bethsaida! Amu nda kiga kiyai eng' Tyro ak Sidon poisyonik che po kamuktaet che ki kiyai eng' okweek, ta kiga kosik keny, kolaach kuniok ak koiilegei oreek.

²² Ago amwaiwok ale, kaigaitu tuun Tyro ak Sidon eng' peetuutap kirwooget, kosiirok.

²³ Ak inyee, Kapernaum, ko tos kitoroorin agoi kipsengwet? Ichoortoige agoi ye mi che ki kobek: amu nda kiga kiyai eng' Sodom poisyonik che po kamuktaet che ki kiyai eng' inyee, kota mi agoi rani.

²⁴ Ago amwaiwok ale, tuun kaigaitu emetap Sodom eng' peetuutap kirwooget, kosiirin.

Obwanjo asi amung'wok

²⁵ Eng' peetuusyechooto kowol Jeso kole, “Amwaun kongoi, we Abba, Kiptaiyatap kipsengwet ak ng'wony, amu ki iung'e tuguuchu che utaatiin ak che ng'oomeen, ak ki ing'aang'ji manyurunik;

²⁶ ee, Abba, amu ki icham inyee ko uu nooto.

²⁷ Ki kogoono tuguuk tugul Abba: ama mi ne ingen Weeriit, kobatee Kwanda; ama mi ne ingen Kwanda kobatee Weeriit, ak chii age tugul ne chamei Weeriit kong'aang'jin.

²⁸ “Obwanjo, okweek tugul che oiimige, ak che olae mileet ne nyigiis si amuung'wok.

²⁹ Otiiny kaat choginnyu ak oneetenage; amu aa tala ak aming'inige eng' muguleldo: si osich kamuung'et eng' saboonwekwok.

³⁰ Amu nyumnyum choginnyu, ak wisis milennyu.”