MATAYO 10 - Bukuit Ne Tilil

Kasubik taman ak aeng'

¹ Ki kuur anyun `Jeso kasubikyik taman ak aeng', yeityo kogoochi kimnateet si koon tamirmirik che murwonen, ak kosoop che myandos eng' koroito age tugul ak eng' nyalulnateet age tugul.

² Chu kainaik che po che kiyooktoi taman ak aeng': ne tai ko Simion ne kiguure Petero, ak Andrea ng'eetap kamet; Jakobo weeriitap Zebedayo, ak Johana ng'eetap kamet;

³ Philipu ak Bartolomayo; Thomas, ak Matayo taagindetap aisuruut; Jakobo weeriitap Alphayo, ak Thadeo;

⁴ Simion kanaanindet, ak Judas Iskaryot, ne king'wektoi ineendet.

Poisyetap Kasubik

⁵ Ki iyookto Jeso chuuto taman ak aeng' ak kong'at icheek koleenji, “Amobe ooreet age tugul ne po Pororyosyek anan nganaseet age tugul ne po piigap Samaria,

⁶ ago kaigai obe ole mi keechiirek che petyotiin che po kootap Israel.

⁷ Ye obendi, oamde ole, ‘Kagoriik pounatetap kipsengwet.’

⁸ Osoop che myandos, oong'et che ki kobek, otiliil che tinyei mogondosaik, oon oik. Kaonyooru puch, ogoite puch.

⁹ Amocheeng'jige thahabu, anan fedha, anan sendeisyek eng' lolotinwekwok;

¹⁰ anan lolet ne po ooreet, anan sumotik aeng', anan kweonik, anan kirokto; amu nyoljin kiboityot amitwogikyik.

¹¹ Ocheeng' chiito ne nyolu eng' nganaseet age tugul ne oo anan ne ming'in ne omong'jini, ak otebee olooto agoi obe.

¹² Ak ye obe ko, ogat.

¹³ Ak ngo nyolu koyooto, ongotebee kalyeng'wong'; ago ngo ma nyolu, ko ingoweekyogei kalyeng'wong'.

¹⁴ Ak age tugul ne mataachok anan kogas ng'aleekwok, ko ye omande eng' koyooto anan nganasanooto, olelekte temburyek eng' keelyekwok.

¹⁵ Amwaiwok iman ale, kaigaitu emetap Sodom ak Gomorah eng' peetuutap kirwooget kosiir nganasanooto.

Kanyaliilet

¹⁶ “Ogeero, ayooktook ko uu keechiirek eng' kwenutap suik; nooto anyun oegu che utaateen ko uu erenook, ak otalaitu ko uu cheptugenik.

¹⁷ Ago oriibegei piik; amu imutyinok kapkirwooget, ak kobirenok kipcharitisyek eng' sinagogisyekwak;

¹⁸ ak kimutyinok taitap pounik ak laitorinik agobo anee, si koek paornateet eng' icheek ak eng' Pororyosyek.

¹⁹ Ago ye igoitook, ko mogereer met agobo ole ong'alaaldoi anan kiit ne omwae; amu ki koonok eng' sainooto ne omwae.

²⁰ Amu ma okweek che ong'alaali, ago Kabuusetap Kwandang'wong' ne ng'alaali eng' okweek.

²¹ “Ak kong'wekta chiito ng'eetap kamet kong'wekyi meet, ak kong'wekta kwanda lakweennyi, ak kong'eetyi lagok sigiikwak, ak kogoito kebar.

²² Ak kowechok piik tugul agobo kainennyu. Ago ineendet ne muitoi agoi kagesunet kesaru.

²³ “Ago ye kiusook eng' nganasani omwechi nganaseet age; amu amwaiwok iman ale, mobendi ogesu nganasook che po Israel, ama it Weeriitap Chii.

²⁴ “Ma siirei ne kineeti kaneetindennyi, ama siirei otwogindet kiptaiyandennyi.

²⁵ Yamei kotep ne kineeti ko uu kaneetindennyi, ak kotebi otwogindet ko uu kiptaiyandennyi. Ak ngot koguure icheek chiitap ko po koot Beelsebul, kotam nee icheek che po koonnyi!

Ne nyolu kiywei

²⁶ “Moiywei anyun icheek; amu ma mi kiy ne tugoot ne ma tuun king'aanyei, ama mi kiy ne ung'aat ne ma tuun naoksei.

²⁷ Ne amwaiwok eng' mesundeito, ong'alaalde eng' lapkeiyet; ak kiit ne ogase eng' itit, omwaite eng' kooriik parak.

²⁸ Amoiywei icheek che parei poorto ago ma imuuchi kobar saboondo; ago kaigai oiywei ineendet ne imuuchi kong'em saboondo kobooto poorto eng' Gehenna.

²⁹ Ma ki aldoe toriitik aeng' che mengeechen kebebertap taman ne po dinarit? Ama ibutyin ng'wony agenge eng' icheek ama chamji Kwandang'wong'.

³⁰ Ago iitotin agot suumeek tugul che po metowekwok.

³¹ Nooto anyun amoiywei; osiire toriitik che mengeechen che chaang'.

Kibarta Jeso

³² “Nooto anyun age tugul ne ibortoa eng' taitap piik, aboortoi agine eng' taitap Abba ne mi kipsengwet.

³³ Ago age tugul ne eesyoa eng' taitap piik, aeesyoi ineendet agine eng' taitap Abba ne mi kipsengwet.

Suryosyek

³⁴ “Moleen ki anyoo aipchi ng'wony kaalyeet; ki ma anyoo aipchi kaalyeet, ago rotwetap chok.

³⁵ Amu ki anyoo atoiye chii ak kwanda, ak chepto ak kamet, ak osotyotap weeriit ak kametap weeriit:

³⁶ egu puunigap chii piikyik.

³⁷ Ineendet ne chamei kwanda anan kamet kosiiro koma nyoljino; ak ineendet ne chamei weeriit anan cheptonyi kosiiro koma nyoljino.

³⁸ Ak ineendet ne ma ibei kimurtoiyondennyi ak kosubwo, koma nyoljino.

³⁹ Ineendet ne riibei saboondanyi kobeeti; ak ineendet ne ibeeti saboondanyi agobo anee ko tuun nyooru.

Melekto

⁴⁰ “Ineendet ne taachok ko kataacha, ak ineendet ne taacha ko kataach ne ki iyookwo.

⁴¹ Ineendet ne taachei maotyo eng' kainetap maotyo konyooru melektap maotyo; ak ineendet ne taachei chii ne po iman eng' kainetap chiito ne po iman konyooru melektap chiito ne po iman.

⁴² Ak age tugul ne igoochin agenge eng' chu mengeechen agot kigombet ne po peek che kaitit kityo amu kasubiin ineendet, amwaiwok iman ale, ma petyin melektanyi matiny.”