MATAYO 1 - Bukuit Ne Tilil

Ibinwegap keny che po ooreetap Jeso

¹ Kaarooretap ooreetap Jeso Kristo, weeriitap Daudi, weeriitap Abraham.

² Ki sich `Abraham Isak, kosich `Isak Jakobo, kosich `Jakobo Judah ak che tupcho.

³ Ki sich `Judah Phares ak Zara eng' Tamar, kosich `Phares Hesron, kosich `Hesron Ram.

⁴ Ki sich `Ram Aminadab, kosich `Aminadab Naasson, kosich `Naasson Salmon.

⁵ Ki sich `Salmon Boaz eng' Rahab, kosich `Boaz Obed eng' Ruth, kosich `Obed Jesse,

⁶ kosich `Jesse Laitoryat Daudi. Ki sich `Daudi Solomon eng' chepyoset ne ki po Uriah,

⁷ kosich `Solomon Rehoboam, kosich `Rehoboam Abijah, kosich `Abijah Asa.

⁸ Ki sich `Asa Jehoshaphat, kosich `Jehoshaphat Joram, kosich `Joram Uzziah.

⁹ Ki sich `Uzziah Jotham, kosich `Jotham Ahaz, kosich `Ahaz Hezekiah.

¹⁰ Ki sich `Hezekiah Manasseh, kosich `Manasseh Ammon, kosich `Ammon Josiah.

¹¹ Ki sich `Josiah Jekoniah ak che tupcho, eng' egosyek che ki kagimut piik koba Babilon.

¹² Kingo kagimut koba Babilon, kosich `Jekoniah Shealtiel, kosich `Shealtiel Zerubabel.

¹³ Ki sich `Zerubabel Abiud, kosich `Abiud Eliakim, kosich `Eliakim Asor.

¹⁴ Ki sich `Asor Zadok, kosich `Zadok Akim, kosich `Akim Eliud.

¹⁵ Ki sich `Eliud Eleazar, kosich `Eleazar Matan, kosich `Matan Jakobo.

¹⁶ Ki sich `Jakobo Joseph manong'otyotap Maria ne kisich Jeso ne kiguure Kristo.

¹⁷ Ki ek ibinwek tugul taman ak ang'wan kobooch Abraham agoi Daudi; ak kobooch Daudi agoi kamutet ne ki kimut piik koba Babilon ko ki ek ibinwek taman ak ang'wan; ak kobooch ngap kimut piik koba Babilon agoi Kristo ko ki ek ibinwek taman ak ang'wan.

Sigeetap Jeso

¹⁸ Ki uu ni sigeetap Jeso Kristo: Ye kingo kagogosyin Joseph kotungei ak Maria kametap Jeso, kotomo kotuiyo, kotook keele managaat ineendet eng' Kabuuset ne Tiliil.

¹⁹ Amu ki chii ne po imanda Joseph sandennyi, kotet Joseph kobagaakta Maria eng' ung'oot amu ki ma mach koteweer eng' taitap piik.

²⁰ Ago ye kingo ta kobwaati tuguuchu, ogeero, ki mong'ji ineendet malaikaiyatap Kiptaiyat eng' karwotitoet kole, “Joseph weeriitap Daudi, ameiywei imutyigei Maria koek osotyondeng'ung' amu managaat ineendet eng' Kabuuset ne Tiliil.

²¹ Tuun sichei ineendet weeriit ak iguure kainennyi Jeso, amu ineendet ne tuun saru piikyik eng' tengekwogikwak.”

²² Koyaak tuguuchu tugul si kobiit kosulda ne ki kamwa Kiptaiyat eng' maotyot kole,

²³ “Ogeero, manachi pergeiyat ak kosich weeriit, ak keguure kainennyi Immanuel,” ne ye kiweech ko ni, “Mi Kamuktaindet kobootech.”

²⁴ Ki ng'eet Joseph eng' rwondonyi ak koyai ko uu ye ki kang'at malaikaiyatap Kiptaiyat, ak ki imutyigei koek osotyonnyi

²⁵ nga ma riikyi ineendet kot kosich weeriit, ak koguuree kainennyi Jeso.