MARIKO 4 - Bukuit Ne Tilil

Kalewenet agobo leetaindet

¹ Ki toi kogeny koneetis eng' tabandap araraita. Ki iyumjigei ineendet tuiyet ne oo miising' kot kolaany moingetap peek kotebee araraita, ak kotebee tuiyet tugul ngeguutap araraita.

² Ki ineet icheek tuguuk che chaang' eng' kalewenaik, ak eng' kaneetisyennyi kogileenji icheek:

³ “Oep iit! Ki wo leetaindet koleetais.

⁴ Ak ye kileetaisye, kobutyi kesweek alak ooreet taban, ak ki pwa toriitik ak koam.

⁵ Ki ibutyi alage ole mi koik, ole ki ma kotya ng'ung'unyek, ak ki piityo anyun kochook, amu ng'ering' ng'ung'unyek.

⁶ Ak kingo chor asiista, komel; ak ki yaamyo, amu ki ma kotinyei tigitik.

⁷ Ki ibutyi alage ole mi katook, ak ki piityo katook ak kogiich, si ma iiyo logoek.

⁸ Kobutyi alage ng'ung'unyek che myach ak koiiyo logoek, kieegitu ak kotesak ak ki iyo sosom ak tamanwogik lo ak pogol.”

⁹ Ak ki mwa kole, “Ne tinyei iitiik che kastoe, kogas!”

Teebutyet agobo kalewenet

¹⁰ Ye ki mi ineegei, kobwanji inee `kasubikyik tamanu ak aeng' kobooto chooto ki mi tugul ak koteebe ineendet agobo kalewenaichooto.

¹¹ Ki leenji `ineendet icheek, “Kagegoonok okweek onai ung'ootyet ne po laitornatetap Kamuktaindet, ago icheek che miitei saang', kobwanjin tuguuk tugul eng' kalewenaik;

¹² si eng' ‘keeret kogeerei ama ibestos, ak eng' kaseet kogasei ama iguitos; si ma week ak kenyochi kaat.’ ”

Koneti Jeso agobo kalewenet

¹³ Ki leenji icheek, “Ngot ko moguitosi okweek kalewenoni, ko tos onaite ano kalewenaik tugul?

¹⁴ Ineendet ne leetoi ng'olyoot ko koolsei.

¹⁵ Chu che mi tabandap ooreet ole kagilechi ng'olyoot, ak ye kagogas, konyo Setani ak konem nooto kagigoolji icheeget.

¹⁶ Ak chu ak icheek ko chooto che kagilechi ole mi koik, ak ye kagogas ng'olyoot, kotaach eng' poiboiyet.

¹⁷ Ago ma tinyei tigitik, ak tebyei peetuusyek che matya, ak ye it nyalilda anan ko usiisyet agobo ng'olyoot, kobutos ne matiny.

¹⁸ Ak alak, ko che kagilechi ole mi katook; chooto ko icheeget che kagogas ng'olyoot,

¹⁹ ak ye kait kaimutigap ng'wony, ak kaberberisyetap mogornateet, ak magutigap tuguuk alak, kogiich ng'olyoot si ma sich logoek.

²⁰ Ak chooto che kagilechi ng'ung'unyek che myach, ko icheeget che kasei ng'olyoot ak kotaach, ak koiiyo logoek sosom, ak tamanwogik lo, ak pogol.”

Lapkeiyetap tait

²¹ Ki leenji icheek, “Ma ki ibu tait ak kinde kitonget oriit anan kurereetap itoogut, ago kindoi ole tonone.

²² Ma miitei kiy ne ung'aat ne ma tuun king'aanyei, anan ng'olyoo ne po ung'oot ne ma tuun taagu.

²³ Ngo tinyei chii iitiik che kastoe, kogas.”

²⁴ Ak ki mwachi icheek koleenji, “Oriibegei tuguuk che ogase; kerutyet ne ogere ko tuun kegerunenok nooto, ak keteswook.

²⁵ Amu ineendet ne tinyei, ko tuun kigoochin; ak ineendet ne ma tinyei, ko tuun keibe agot che tinyei.”

Ole uu laitornatetap Kamuktaindet

²⁶ Ak ki mwa kole, “Uu laitornatetap Kamuktaindet chii ne leechin kesweek ng'wony,

²⁷ ak koru ak kong'eet, kemoi ak peet, ak kobiityo kesweek ak koeegitu, amaingen ole pititoi.

²⁸ Yiei ng'wony ineegei; rutu, yeityo konyo metit, yeityo koiywa peek.

²⁹ Ago ye kagoruryo peek, eng' yooto koip ineendet chepkeswet amu kait kesisyet.”

Kalewenetap keswootap karadali

³⁰ Ki le, “Kiyanie nee laitornatetap Kamuktaindet anan nee kalewenet ne kimuuchi kemwaitae?

³¹ Kergei ak keswootap karadali, ne ye kageminji ng'wony, nganda ming'in eng' kesweek tugul che mi ng'wony,

³² ko ye kagemin, ko piitei koeetu kosiir minutik tugul che po mbar, ak kosich mooriik che eecheen kot komuuch koteekyi kesonok oriit `toriitigap parak.”

³³ Ak eng' kalewenaik alak che chaang' che uu chooto, ko ki ng'alaaljin icheek ng'olyoot ko uu ye ki imuuchi kogas.

³⁴ Ak ki ma ng'alaalji icheek ama eng' kalewenet, ago ki ineet tuguuk tugul kasubikyik komi taban icheegei.

Usoonet ne oo

³⁵ Ak kingo kagoek koskoleny eng' peetuunooto, koleenji icheek, “Ongelande pitoniin.”

³⁶ Ak kingo pagaakta tuiyet, komut ineendet amu ki miitei moingetap peek. Ak ki mi moingonik alak kobooto ineendet.

³⁷ Ki ng'eet anyun usoonet ne koroom, ak kiryebei `peek che mildogei moinget kot kogineegit konyi peek moinget.

³⁸ Ki mi ineendet moinget let, korue kiit ne kitiie metit; ak ki ing'eet ineendet ak koleenji, “Kaneetindoni, mema kenech kiy ago kagibegu?”

³⁹ Kingo kaging'eet, koger kong' usoonet, ak kong'alaalji araraita kole, “Tonon! Siis!” Ki tonon anyun usoonet, ak kosiis araraita.

⁴⁰ Ki leenji icheek, “Kalya si oiyweisye? Agoi nguno ko motinye kayaneet?”

⁴¹ Ki iyweis miising' ak komwachingei koleen, “Ng'oo niito, ne kase iit agot usoonet ak araraita?”