MARIKO 3 - Bukuit Ne Tilil

Chii ne meat euut

¹ Ki wo sinagogit kogeny, ak ki mi chii ne meat euut.

² Ki riibe `icheek kogeer ngo tos isoop chiichooto eng' peetuutap sabato si kobiit kogikyi ineendet leluut.

³ Ak ki leenji chiito ne meat euut, “Tonon eng' kween.”

⁴ Koleenji anyun icheek, “Tos chamdoi ng'atuutik keyai ne myee anan ne ya eng' peetuutap sabato? Tos chamdoi kisoop chii anan kebar?” Ago ki siisyo icheek.

⁵ Ki tooben icheeget konereechi eng' ng'wanindo ne oo amu uuindap mugulelwekwak, ak koleenji chiichooto, “Chuul euut!” Ki chuul anyun, ak ki myeiit eunnyi.

⁶ Ki manda koba saang' eng' kasarata Pharisaik ak Herodik kotet agobo ole imuuch kobarta ineendet.

Kosubi `Tuiyet Jeso

⁷ Ki pa Jeso ak kasubikyik kotokyigei araraita, ak ki isup `ineendet tuiyet ne oo kobun Galilaya.

⁸ Ki pwa kora tuiyosyek kobun Judea, Jerusalem, Idumea, pitetap Jordan, ak komoswegap Tyro ak Sidon ye kingo kas agobo tuguuk che eecheen che ki yai ineendet.

⁹ Ki mwachi kasubikyik kochopchi moingetap peek ne ming'in amu chaang'indap piik; si ma chiil `piik ineendet

¹⁰ amu kiga kosoop che chaang' kot koit komach age tugul ne ki tinyei kaimut kole ta tiny ineendet.

¹¹ Eng' ui tugul ye kingo keer tamirmirik che murwonen ineendet, ko ki ibutos eng' tainnyi koteitos koleen, “Inyee ko ii Weeriitap Kamuktaindet!”

¹² Ki kergong' icheek kole si ma ng'ang'nda ineendet.

Lewenetap kasubikyik chooto taman ak aeng'

¹³ Ki wo kotokyigei tulweet ak koguur chooto kimachei ineendet, ak ki pwa icheek kobwonji ineendet.

¹⁴ Ki lewen taman ak aeng', che chooto ki yai koek che kiyooktoi, ak kole tamangap kotebi ak ineendet ak koyookto koba koamdaat,

¹⁵ ak konyoor kimnateet ne onen oik.

¹⁶ Ki lewen chooto taman ak aeng', ak kogoochi Simion kainet Petero,

¹⁷ kogoochi Jakobo weeriitap Zebedayo ak Johana ne tupcho ak Jakobo kainet koguure Boanerges ne kaguiyennyi ko Weeriigap tuleet,

¹⁸ ak Andrea, Philipu, Bartolomayo, Matayo, Thomas, Jakobo ne po kap Alphayo, Thadeo, Simion kanaanindet

¹⁹ ak Judas Iskaryot nooto king'wekta ineendet.

Keleen ya met Jeso

²⁰ Ki wo kaa, ak ne matyanit ko ki iyumgei tuiyet kogeny kot ko mata komuuch agot koamis.

²¹ Ye kingo kas piikyik, koba komut ineendet amu kimwae koleen, “Kagoyait met.”

²² Ki mwa siriik che ki punu Jerusalem kole, “Tinyei ineendet Beelsebul, ak oonei oik eng' kimnateetap ne oo ne po oik.”

²³ Kingo kagoguur icheek, kong'alaalji eng' kalewenaik, “Imuktoi ano Setani koon Setani?”

²⁴ Ngo pcheak pororyet inegei, koma imuuchi pororyonooto kotonon.

²⁵ Ak ngot kopcheak koot, koma imuuchi koyooto kotonon.

²⁶ Ngo ng'eet Setani koboryegei ak kopcheak, koma imuuchi kotonon, ago kagoit let eng' ineendet.

²⁷ Ma imuuchi chii kochut kootap chii ne kiim ak korebe tuguukyik, ngot ko marat korook chiichooto kiim si koibe anyun tuguuk.

²⁸ “Amwaiwok iman ale, kinyochin kaat weeriigap piik tengekwogikwak tugul ak ng'aleek alak tugul che yaacheen che mwaei.

²⁹ Ago age tugul ne inachi Kabuuset ne Tiliil, koma koi kinyochi kaat koigeny, ago tebee ng'oogisto koigeny.”

³⁰ Amu ki mwa kole “Tinyei tamirmiryet ne murwoon.”

Kametap Jeso ak che tupcho

³¹ Ki pwa kamet ak che tupcho ak kotononso eng' saang', ak ki kiyookto keguur ineendet.

³² Ki mi tuiyet ko kayiem ineendet, ak ki kileenji, “Keero, mi saang' kamenng'ung' ak che otupche kocheeng'in.”

³³ Ak ki wolji icheek kole, “Ng'oo kamennyu ak che kitupche?”

³⁴ Ki keer `icheek che kitebyei ng'wony ko kayiem ineendet ak kole, “Ang'chu kamennyu ak tupchosyekyuk!

³⁵ Amu chii age tugul ne yaei mageetap Kamuktaindet, ko nooto weeriit ne ketupche ak chepto ne kitupche ak kamennyu.”