MARIKO 2 - Bukuit Ne Tilil

Kosoobi `Jeso chii ne ki meat poor

¹ Kingo pata peetuusyek che chaang' ak koweek kogeny Kapernaum, kogasak keele miitei kaa.

² Ki iyumgei piik che chaang' kot koma ng'et poroin, agot eng' kurgat; ak ki amndochin icheek ng'olyoot.

³ Ki pwa piich ang'wanu koganabu chii ne ki meat poor.

⁴ Ago ye ki mata komuuch komutyi ineendet amu tuiyet, kong'aany komasak eng' paragutap koot eng' ole ki mi ineendet. Kingo kayaatak parak, kochoorta itoogut ne kirue chiichooto ki meat poorto.

⁵ Kingo keer Jeso kayanennywa, koleenji chiichooto kimeat poorto,“Weeri, kagenyoun kaat tengekwogiguk.”

⁶ Ago ki miitei olooto siriik alak che kitebyei ak kobwaati eng' mugulelwekwak koleen,

⁷ “Amu nee si komwaei chiichi ko uu ni? Ang' kagowech! Ng'oo ne imuuchi konyochi chii kaat tengekwogik kobatee Kamuktaindet ineegei?”

⁸ Ki nai anyun Jeso eng' saboondanyi kole ka ibwaati ko uu nooto icheegei, koleenji, “Kalya si obwaat tuguuchu eng' mugulelwekwok?

⁹ Nee ne nyumnyum, kemwachi chiichi meat poorto keleenji, ‘Kagenyoun kaat tengekwogiguk’; anan keleenji, ‘Ng'eet, ip itogung'ung', ak iwendote?’

¹⁰ Ago si onai ole tinyei Weeriitap chii kimnateet eng' ng'wony konyochi kaat tengekwogik.” Koleenji anyun chiichooto ki meat poorto,

¹¹ “Amwaun aleenjinin, ng'eet, ip itogung'ung' ak iwe koong'ung'.”

¹² Ki ng'eet anyun ak koip itogunnyi, ak komanda eng' taitap piik tugul koek kwong'eet eng' tugul ak kolas Kamuktaindet kole, “Tom kegeere ne uu niito!”

Koguurei Jeso Lawi

¹³ Ki wo Jeso kogeny tabandap araraita; ak ki pwa tuiyet komugul ye mi ineendet, ak ki ineet icheek.

¹⁴ Ye kisiirtoi, kogeer Lawi weeriitap Alphayo kotebyei eng' ole kitaage aisuruut, ak koleenji ineendet, “Isubwo.” Ak king'eet ak koosup ineendet.

¹⁵ Ye ki amisyei eng' kootap Lawi, ko ki mi ak icheek taagigap aisuruut che chaang' ak kiptengeginik kotebyei kobooto Jeso ak kasubikyik: amu ki chaang' che ki isupi ineendet.

¹⁶ Kingo keer siriigap Pharisaik koamisyei ineendet kobooto kiptengeginik ak taagigap aisuruut, koleenji kasubikyik, “Lyon si koamisyei ak koeisei ineendet kobooto taagigap aisuruut ak kiptengeginik?”

¹⁷ Ye kingo kas Jeso koleenji icheek, “Ma machei che chamegei chepkerichot kobatee icheek che myandos. Ki ma anyo aguur che tiliileen, ago ki anyo agobo kiptengeginik.”

Teebut agobo karugutetapkei

¹⁸ Ki irugutegei kasubigap Johana ak che po Pharisaik, ak ki pwa piich koleenji ineendet, “Lyon si korugutegei kasubigap Johana ak kasubigap Pharisaik ago ma irugutegei kasubiguk?”

¹⁹ Kowolji `Jeso icheek koleenji, “Imuktoi ano korugutkei che kogiguurchin katunisyet ye ta komi sandet kobooto icheek? Kota komi sandet kobooto icheek koma imuuchi korugutkei.

²⁰ Ago pwoonei peetuusyek che keistoe sandet icheek, korugutkei anyun eng' peetuunooto.

²¹ “Ma mi chii ne napchin akwot ne leel ngoryeet ne oos, si ma kereer `ne leel ne oos ak kotesak ole kagereer.

²² Ama miitei chii ne indoi divaik che leelach lolotinwek che oosen; ngot yai ko uu nooto, kogereeri divaik che leelach lolotinwek, ak kobeet divaik kobooto lolotinwek. Kindoi divaik che leelach lolotinwek che leelach.”

Ng'olyoo agobo Sabato

²³ Kibunei ineendet mbareenigap peek eng' peetuutap sabato, ak ye kibendi kotoi kasubikyik kobutoot mesisyegap peek.

²⁴ Ak ki leenji `Pharisaik ineendet, “Keero, kalya si koyai eng' peetuutap sabato kiit ne eetaat eng' ng'atuutik?”

²⁵ Ak ki leenji icheeget, “Tos kitom osoman kiit ne ki yai Daudi ye ki ma kotinyei kiy, ak ki amei rubo ineendet ak che ki mi tugul?

²⁶ Ki wo kootap Kamuktaindet, ye ki tisiindet ne oo Abiathar, ak koam magatiinik che itabaanatiin, che eetaat eng' ng'atuutik keele ma ki amei, kobatee tisiik icheegei, ak kogoochi che ki mi tugul.”

²⁷ Ak ki leenji `ineendet icheek, “Ki kiyai sabato agobo chii, ak ma ki yai chii agobo sabato.

²⁸ Ara anyun Weeriitap chii ko kiptaiyat agot ne po sabato.”