MARIKO 15 - Bukuit Ne Tilil

Komi Jeso taitap Pilato

¹ Ak yeityo ko kaech kotet ng'aleek tisiik che eecheen kobooto poisyek ak siriik, ak kapkirwooget komugul, ak korat Jeso, ak komut kwo, ak kogoochi Pilato.

² Ak kiteebe Pilato kole, “Tos ii Laitoryatap Yahudik?” Ak ki wolji koleenji, “Kaimwa.”

³ Ak ki itaam `ineendet tisiik che eecheen eng' tuguuk che chaang'.

⁴ Ak kiteebe Pilato kogeny, kole, “Mewolu kiy? Keero tuguuk che chaang' che kagotaamjin pichu.”

⁵ Ago mata kowol ng'olyoo Jeso, kot kokwong' Pilato.

Kirwookyin Jeso kome

⁶ Ki cham kotyakyin Pilato piik kimonjororyot agenge eng' peetuutap igoorto, ne kagosoom icheek ineendet.

⁷ Ak ki mi chiito age ne ki kiguure Barabbas, ne ki rataat kobooto icheek che kichaamsei, icheeget che kiga rumis eng' chaamsonooto.

⁸ Ki togosta tuiyet ak kotoi kosoom ineendet koyachi ko uu ye cham koyaei kotugul.

⁹ Ak ki wolji Pilato icheek, koleenji, “Tos omache atyakwok Laitoryatap Yahudik?”

¹⁰ Amu kiga nai kole, ki igoito tisiik che eecheen ineendet amu ng'etkong'.

¹¹ Ak ki cheer tisiik che eecheen tuiyet kole, kityakyi Barabbas.

¹² Ak ki wol Pilato kogeny kole, “Aite nee anyun chiichi oguure Laitoryatap Yahudik?”

¹³ Ak ki polyo icheek kogeny, kole, “Igartaat ineendet eng' kimurtoiyot.”

¹⁴ Ak ki leenji Pilato icheek, “Kalya, koyai yaityet nee?” Ago ki polyo icheek miising' kole, “Igartaat ineendet eng' kimurtoiyot.”

¹⁵ Ak kimach Pilato kobaibai tuiyet, kotyakyi anyun Barabbas, ak kogoito Jeso, ko kagobire kipchoritiit, si kobiit kigartaat.

Kochotachoti `asigarik Jeso

¹⁶ Ak ki imut kiplugotinik ineendet kwo kapkirwook oriit, ne kiguure Praitorium; ak kiguur kiplugotinik tugul kobwa.

¹⁷ Ak ki ilaakyi ngoryeet ne aruus ne piriir, ak kila ngatyetap katook, ak konde metinnyi;

¹⁸ ak ki toi kogat ineendet kole, “Kigatin, Laitoryatap Yahudik!”

¹⁹ Ak kikwer metinnyi eng' tegat, ak kosing'ilji, ak kogutuny kolas ineendet.

²⁰ Ak kingo kagochotachot ineendet, koreegune ngoryeet ne aruus ne piriir, ak kolaakyi ngoroikyik. Ak ki imut kwo saang' kogartaat eng' kimurtoiyot.

Kigartati Jeso

²¹ Ak kibirchi chiito ne kisiirtoi, Simion ne po Kurene, kwandap Aleksanda ak Rupo, kobunu kooret age, koip kimurtoiyotap Jeso.

²² Ak kimut ineendet kwo oldo ne kiguure Golgota, ye kiguure kora, emetap terta.

²³ Ak ki igoochi divaik che purugot ak tuguuk che uu igomoik: ago ma taach.

²⁴ Ak kogartaat, ak kopchechigei ngoroikyik, ak koseer parbareek, konai ne tee ne ibei chii tugul.

²⁵ Ak ki igartaat ineendet, ko kaek sait somok.

²⁶ Ak ki kisirchi ng'aleegap kataamset agobo ineendet metinnyi parak keele, “Laitoryat ne po Yahudik.”

²⁷ Ak ki igartaat rebiik aeng' kobooto ineendet; age eng' eunnyi ne po tai, ak age eng' eunnyi ne po kaataam. [

²⁸ Ak ki isulda anyun sireet ne mwaei kole, Ak ki kiit ineendet kobooto kiptengeginik.]

²⁹ Ak ki churochur che ki siirtoi, koliligoti metowekwak, ak koleen, “Haa! Inyee ne ing'eme Hekaluut, ak iteech eng' peetuusyek somok,

³⁰ sarugei, ak ichooruge eng' kimurtoiyot.”

³¹ Ak ki churochur ineendet ko uu nooto tisiik che eecheen ak icheek, kobooto siriik kole, “Ki kosar alak; ma imuuchi kosargei.

³² Ingochoorgei nguno Kristo, Laitoryatap Israel, eng' kimurtoiyot, si kobiit kegeer ak kiyan.” Ak kigengenie ineendet ak icheek che kiga kigartaat kobooto ineendet.

Meetap Jeso

³³ Ak kingo it sait lo, koimenit emet komugul agoi sait sogool.

³⁴ Ak eng' sait sogool kotwek Jeso eng' kutit ne oo kole, “Eloi, Eloi, lama sabaktani?” Ye kiweech keleen, “Kamuktaindet nenyu, Kamuktaindet nenyu, kebagaakta amu nee?”

³⁵ Ak kingo kas alak eng' che kitonondos eng' ye neegit, kole, “Ogeero, kuurei Elijah.”

³⁶ Ak ki labat chiito age, konyiit siki sponjit ak konde tegat, ak kogoochi koe, ak kole, ingotebi ko uu nooto. “Ongegeer ngo nyoonei Elijah kochoor konyo ng'wony.”

³⁷ Koriir anyun Jeso eng' kutit ne oo, ak kochamda sabennyi kwo.

³⁸ Ki kereer angeet ne kiga kioiye Hekaluut kween kobooch parak agoi ng'wony.

³⁹ Ak kingo keer chemogetap kiplugotinik pogol, ne kitononi eng' ye neegit ineendet, kogoitoi sabennyi kwo ko uu nooto kole, “Iman ko Weeriitap Kamuktaindet chiichi.”

⁴⁰ Ak ki mi ak icheek kobogorisyek che kigeerei eng' ye loo: ki mi eng' icheeget Maria Magdalene, ak Maria kametap Jakobo ne ming'in ak ne po Joses, ak Salome;

⁴¹ che ki isubi ak koboisyechin ineendet ye ki mi Galilaya; kobooto kobogorisyek alak che chaang' che kitogosu Jerusalem kobooto ineendet.

Tubeetap Jeso

⁴² Ak kingo ek koskoleny, amu ki Chobeet, ki nooto peetuut ne indoune sabato,

⁴³ konyo Joseph ne po Arimatea, chiito ne konyitot ne po kapkirwook ne ki igeni agine laitornatetap Kamuktaindet; ak kwo kap Pilato eng' nyiganateet kosoom muustap Jeso.

⁴⁴ Ak ki kwong' Pilato amu kagagome: ak koguur chemogetap kiplugotinik pogol koteebe ngo kagome keny.

⁴⁵ Ak kingo kagonai eng' kiptaiyandanooto, kogoochi anyun Joseph muusto.

⁴⁶ Ak ki al angeet ne po katanit, ak kochoor ineendet ak kotaae anganooto po katanit, ak konde kererit, ne kiga kebal eng' koita ne oo; ak kimilji koita kogeree kurgeetap kererit.

⁴⁷ Ak kigeerei Maria Magdalene ak Maria kametap Joses ole kaginde ineendet.