MARIKO 13 - Bukuit Ne Tilil

Sip kemwau agobo ng'emisyetap Hekaluut

¹ Ak ye kimandoi eng' Hekaluut, koleenji age eng' kasubikyik, Kaneetindoni, keero, kie uu koichu ak kie uu teeksoni!

² Ak ki leenji `Jeso ineendet, “Tos igeere teeksosyechu eecheen? Matun ng'etu koita agenge eng' paragutap age, ne ma ki wiirchin ng'wony.”

Kaimutik ak nyalilwogik

³ Ak kingo tebyei ng'wony eng' tulweetap mseituni ye tokyindos ak Hekaluut, koteebe ineendet Petero ak Jakobo ak Johana ak Andrea komi icheegei, kole,

⁴ “Mwaiwech, yaaksei tuguuchuuto auiyo? Ak nee kaboorunet ne tuun ibooru kole kariik kosulda tuguuchuuto tugul?”

⁵ Ak ki toi `Jeso koleenji, “Oriipkei si ma ibeetook chii.

⁶ Pwoonei tuun che chaang' eng' kainennyu, koleen, ‘Aa ineendet!’ ak kobeet che chaang'.

⁷ Ak ye tuun ogas agobo lugoosyek ak ng'aleek agobo paretapkei, ko moaragense: kanyool koek ko uu nooto; ago tomo koit kagesunet.

⁸ Amu setyin pororyet age pororyet age, ak setyin laitornatet age laitornatet age; ak kobiit potaneetap ng'wony eng' oldinwek che teerchiin; ak kobiit rubosyek. Tuguuchuuto ko taunetap ng'waninwek.

⁹ “Ago oriipkei okweek: amu tuun kimutyinok kapkirwook; ak kebirok eng' sinagogisyek; ak oteleli eng' taitap pounik ak laitorinik agobo anee, si koek paornat eng' icheek.

¹⁰ Ak kanyool keamji korook logoiywek che myach pororyosyek tugul.

¹¹ Ak ye tuun kimutak kapkirwook, ak kindeak eunegap piik, ko mat ogereer met agobo kiit ne tuun omwae: ago kiit age tugul ne ki koonok eng' sainooto, ko nooto ne omwae: amu ma okweek che ong'alaali, ago Kabuuset ne Tiliil.

¹² Ak kong'wekta `chii ng'eetap kamet kebar, ak kong'wekta `kwanda lakweennyi; ak kong'eetyi `lagok sigiikwak, ak kogoito kebar.

¹³ Ak kowechok piik tugul amu kainennyu: ago ne muitoi agoi let, kesaru nooto.

Ng'emisyet

¹⁴ “Ago ye tuun ogeer kiit ne kiwechei ne po ng'emisyet kotonone ole ma nyoljin kotonone (ingoguiyo ne somani), ingomwechi anyun che mi Judea tuloonook:

¹⁵ ama choortagei chii ne mi koot parak anan kwo ko, si kobiit konem kiy eng' koonnyi:

¹⁶ amat koweek chii ne mi mbar kwo koip ngoryennyi.

¹⁷ Pwo eng' icheek che chiioo ak che tinyei lagok che reritos eng' peetuusyechooto!

¹⁸ Ak osaa si ma tuun yaak chooto eng' peetuusyek che po kaititindo.

¹⁹ Amu egu nyalilda eng' peetuusyechooto, ne kitom koegu ko uu nooto kobooch taunetap yaetap ng'wony ne ki yai Kamuktaindet, agoi nguno, ama kobiitu ko uu nooto kogeny agoi.

²⁰ Ak nda ki ma til Kiptaiyat peetuusyek konwagitu, ta ma kisaru chii: ago kitil peetuusyek amu che lewenotin che ki lewen.

²¹ “Ak ngo leenjok chii eng' peetuusyechooto, ‘Ogeero! Mi Kristo oli!’ anan, ‘Ogeero! Miitei olo!’ ko mat oyan.

²² Amu ng'eetos Kristoisyek che po lembech, ak maotik che po lembech, ak koboortoi kaboorunoik ak kwang'utik, si kobeet, agot che kigelewen nda imugaksei.

²³ Ago oriipkei: ogeero, kasip amwaiwok tuguuk tugul.

Nyonunetap Weeriitap Chii

²⁴ “Ago eng' peetuusyechooto, ko kagobata nyalilata, koimenit asiista, kama kooluu arawet,

²⁵ ak kororok kecheik eng' kipsengwet, ak kotumdumgei kimnatosyek che mi kipsengwet.

²⁶ Eng' sainooto kogeer anyun Weeriitap chii konyonei eng' poolik kobooto kimnateet ne oo ak liilindo ne oo.

²⁷ Yeityo koyookto malaikaisyek, ak koyum lewenikyik, kobun usoonaik ang'wan, kobunu tabandap ng'wony agoi tabandap kipsengwet.

Kanyool keriipkei

²⁸ “Oneetkei kalewenetap mogoywet: ye kang'arng'aritu mooriikyik, ak kong'atyo sogeek, onai ole kariik kesisyet;

²⁹ uu nooto ak okweek ye ogeer kosuldoi tuguuchu, onai ole kagoriik ineendet, mi kurgotik.

³⁰ Amwaiwok iman ale, Masiirtoi ibini, ama isulda tuguuchuuto tugul.

³¹ Siirtoi kipsengwet ak ng'wony, ago ma siirtoi ng'aleekyuk.

Ma ingen chii peetuut anan saait

³² “Ago ma mi chii ne naei agobo peetuunooto anan sainooto, agot malaikaisyek che mi kipsengwet, agot Weeriit, kobatee Kwanda ineegei.

³³ Oriipse anyun, ogenisye ak osaae: amu mongen ye egune.

³⁴ Uu chii, ne ki pagaach koonnyi, ak koruto emet age, ak kogoochi otwogikyik kimnateet, chii age tugul ak poisyennyi, ak kong'at riibindet koriipso.

³⁵ Oriipse anyun: amu mongen ye itu chiitap ko po koot, ngo lagat, anan kemoi kween, anan ye iteei kipsoiywet, anan karon;

³⁶ si ma cheak ak konyoorwok oruitosi.

³⁷ Ak ng'olyoot ne amwaiwok okweek amwachini tugul, ale: Oriipse.”