MARIKO 12 - Bukuit Ne Tilil

Kalewenet agobo mbareet ne po sabibuk

¹ Ak ki toi kong'alaalji icheek eng' kalewenaik kole, “Ki minji chiito age sabibuk mbareet, ak kong'oot, ak kobal keriinget ole kiruruung'e sabibuk, ak koteech koot ne kooi, ak komanakyi meek, ak kwo emet age.

² Ak kingo it peetuusyegap kesisyet, koyookto otwogindet kwo ole mi meek, si kobiit konyoorunee meechooto logoek che po mbareetap sabibuk.

³ Ak ki nam ineendet ak kobir, ak koon kwo puch.

⁴ Ak ki iyookyi kogeny otwogindet age; ak kibir metinnyi, ak koteweer.

⁵ Ak ki iyookto age; ak kobar ineendet: ak ki iyookto alak che chaang'; kobir alak, kobar alak.

⁶ Kita kotinyei anyun agenge, nooto weeriinnyi ne chamat: ki iyookto ineendet eng' let kwo ole mi icheek, kole, ‘Teechei weeriinnyu.

⁷ Ago ki ng'alaalso meechooto icheegei, koleen, Niito ne namei tuguuk; obwa, kebar ineendet, si kindii tuguuk.’

⁸ Ak ki nam ineendet ak kobar, ak kowiirta komanda eng' mbareet ne po sabibuk.

⁹ “Yaei nee anyun chiitap ko po mbareet ne po sabibuk? Nyoonei anyun kobarei meechooto, ak komanakyi meek alak mbaranooto po sabibuk.

¹⁰ Tom osoman siruutichu; ‘Koita ne ki eesyo teegik, ki kiyai nooto koek metitap luuita.

¹¹ Ki punu ng'olyoondoni Kiptaiyat, ak ko kwang'ut eng' konyekyok?’ ”

¹² Ak ki cheeng'ei ole namdoi ineendet; ago ki iywei tuiyet; amu ki nai kole kamwa kalewenoni agobo icheek: ak ki pagaakta ineendet ak koba.

Teebutyet agobo Caesarea

¹³ Ak ki iyookyi Pharisaik alak ak che po Herodik, si korate ng'aleekyik.

¹⁴ Ak kingo pwa, koleenji ineendet, Kaneetindoni, kingen keele ii po iman, ameiti chii age tugul: amu megeere itoondap chii, ago ineeti iman ooreetap Kamuktaindet: Tos chamdoi ng'atuutik kigoochi kodi Caesarea, anan ma chamdoi?

¹⁵ Kigoite anan acha? Ago ki nai ineendet chombilennywa, ak koleenji icheek, Kalya si otyema? Oibwa dinarit ageer.

¹⁶ Ak ki ipchi. Ak ki leenji icheek, Po ng'oo itooni ak sirooni? Ak koleenji, “Po Caesarea.”

¹⁷ Ak ki leenji `Jeso, “Ogoochi Caesarea tuguuk che po Caesarea, ak ogoochi Kamuktaindet tuguuk che po Kamuktaindet.” Ak ki kwong'yo miising' agobo ineendet.

Teebutyet agobo ng'eetyeet

¹⁸ Ak ki pwanji ineendet `Sadukaik, che mwaei kole, ma mi ng'eetyeet, ak koteebe ineendet, kole,

¹⁹ Kaneetindoni, ki sirwech Musa kole, “Ngo me ng'eetap kametap chii, ak kobagaakta osotyonnyi, ama sich lakwa, kondii ng'eetap kamet osotyondonooto, si kobiit kolalji maat ng'eetap kamet.

²⁰ Ki mi weeriik tisabu che ki tupcho: ak kiitunis weeriit ne oo, kome ama sich lakwa;

²¹ ak ki indi agine ne po aeng', kome ama sich lakwa; ak ki igei nooto agine ne po somok:

²² ak ma pitunee tugul tisap lakwa. Let kome agine kobogoryondonooto.

²³ Tuun eng' ng'eetyeet kobunjin ng'oo eng' `icheek osotyondonooto? Amu kiga kobunji chooto tisap.”

²⁴ Ak ki leenji `Jeso icheek, “Ma nooto ne ki koonok oleel, amu mongen siruutik, anan kimnateetap Kamuktaindet?

²⁵ Amu ye tuun ng'eetyo icheek komong' eng' che ki pek, koma itunisyei, ama kituni; ago tebyei ko uu malaikaisyek eng' kipsengwet.

²⁶ Ago agobo piik che ki kobek keele tuun ng'eetos, ko tomo osoman eng' bukuitap Musa, eng' ole ki mi keetit ne lalei, ko uu ye ki mwachi `Kamuktaindet ineendet, koleenji, ‘Aa Kamuktaindet ne po Abraham, ak aa Kamuktaindet ne po Isak, ak aa Kamuktaindet ne po Jakobo?’

²⁷ Ineendet koma Kamuktaindet ne po che ki kobek, ago po che saptos; olele miising'.”

Ng'atuutyet ne oo

²⁸ Ak ki nyo age eng' siriik, ak kogas koteebegei, ak kingo nai kole kawolji icheek komyee, koteebe ineendet, kole, “Nee ng'atuutyet ne po tai eng' tugul?”

²⁹ Kowolji Jeso koleenji, “Ne po tai ko ni, ‘Ogaso ee Israel; Kiptaiyat Kamuktaindet ne Toroor nenyo ko Kiptaiyat agenge.

³⁰ Ak cham Kiptaiyat Kamuktaindet ne Toroor neng'ung' eng' muguleldang'ung' komugul, ak eng' saboondang'ung' komugul, ak eng' ng'omnateng'ung' komugul, ak eng' kimnateng'ung' komugul.’

³¹ Ne po aeng' ko ni, ‘Cham chiitap kokweng'ung' ko uu ole ichamdoigei. Ma miitei ng'atuutyet age ne oo kosiir chu.’ ”

³² Ak ki leenji siriindet, Iman, Kaneetindoni, kaimwa komyee, ile, ineendet ko agenge; ama mi age kobatee ineendet:

³³ ak ngo cham ineendet eng' muguleldo komugul, ak eng' kaguiyet komugul, ak eng' kimnateet komugul, ak ngo cham chiitap kokwet ko uu ole chamdogei, kosiirei nooto kagoochinoik tugul che kibeelei ak tiseiywek.

³⁴ Ak kingo keer Jeso kole kawol eng' ng'omnateet, koleenji, “Ma ii loo eng' laitornatetap Kamuktaindet.” Ak mata kogany chii koteebe ng'olyoo age tugul.

Teebutyet agobo Kristo

³⁵ Ak ye ki ineetisyei Jeso eng' Hekaluut, komwa kole, “Lyon si komwaei siriik koleen Kristo ko weeriitap Daudi?

³⁶ Ki mwa Daudi ineendet eng' Kabuuset ne Tiliil, kole, Ki mwachi Kiptaiyat Kiptaiyandennyu, kole, ‘Tebee eunnyu ne po tai, agoi ande puuniguk keldebesaigap keelyeguk.’ ”

³⁷ “Kuuree Daudi ineendet Kiptaiyat; koegundoi ano anyun weeriinnyi?” Ak ki epchin iit tuiyet ne oo ineendet eng' poiboiyet.

Kanyool keriibegei siriik

³⁸ Ak eng' kaneetisyennyi, koleenji, “Oriibegei siriik, che chamei kobendat kolaachi ngoroik che kooen, ak kagatosyek eng' ole kiyae mung'aaret,

³⁹ ak ng'echerok che po tai eng' sinagogisyek, ak oldinwek che po tai eng' igoorwek:

⁴⁰ ak korebe icheek mosoogik kooriikwak, ak kosaaei saautik che kooen kong'aalsei; nyooru pichu kirwooget ne oo kosiir.”

Kagoochinet ne po mosoget

⁴¹ Ak kitep kotokyigei ole kiyumjin tuguuk che kigoitoi, kogeer ole indoitoi tuiyet sendeisyek ole kiyumjin: ak ki inde mogoreek alak sendeisyek che chaang'.

⁴² Ak ki nyo mosoget age ne kibanania, ak konde sendeisyek aeng', che aechin ak chepkondet agenge.

⁴³ Ak kiguur kasubikyik anyun kobwa ole mi ineendet ak koleenji, Amwaiwok iman ale, Kagonde mosogani panan che siirei che kagonde piik tugul che indoi tuguukwak ole kiyumjin:

⁴⁴ amu kagonde icheek tugul che po chaang'indap tuguukwak; ago kagonde ineendet che po panandanyi, tugul che katinyei, agot che kosabe.