MARIKO 10 - Bukuit Ne Tilil

Kaneetisyet Jeso agobo peesyet

¹ Ki ng'eet anyun eng' olooto, konyo tabanwegap Judea ak pitetap Jordan. Ki iyumjigei ineendet tuiyosyek kogeny, ak ko uu ye ki cham koyaei ko ki ineet icheek.

² Ki pwanji ineendet `Pharisaik, koteebe ineendet koyomei kole, “Tos chamdaat eng' ng'atuutik koon chii osotyonnyi?”

³ Ak ki wolji `Jeso koleenji, “Nee ne king'ataak Musa?”

⁴ Ak ki le icheek, “Ki cham Musa kesir sireet ne po peesyet, si koon kwo.”

⁵ Ago ki leenji `Jeso icheek, “Kisirwak ng'atuutyonooto Musa amu uuindap mugulelwekwok.”

⁶ Ago kobooch taunetap yaetap ng'wony, ko ki yai Kamuktaindet icheek muren ak kobogoryo.

⁷ Amu ng'olyoondoni kobagaaktoi chii kwanda ak kamet, ak konamgei ak osotyonnyi;

⁸ ak koek chooto aeng' poorto agenge: si ma ko aeng', ago egu poorto agenge.

⁹ Chooto anyun che kagotuiyo Kamuktaindet, ko mat kobesyo chii.

¹⁰ Ak kiteebe kasubikyik ineendet kogeny eng' ko, agobo ng'olyoondonooto.

¹¹ Ak ki leenji icheek, Chii age tugul ne oonei osotyonnyi, ak kotun age, ko kabaigei.

¹² Agot kobogoryot agine ngo pagaakta manong'otyondennyi, ak kotun chiito age, ko kabaigei.

Jeso ak lagok che mengechen

¹³ Ak ki kimutyi ineendet lagok che mengeechen, si kobiit kotwa icheek: ago ki kergong' kasubikyik icheek.

¹⁴ Ago ye kingo keer Jeso, konyit, ak koleenji icheek, Ochamji lagok che mengech kobwanjo; amoete icheek: amu po laitornatetap Kamuktaindet che uu chu.

¹⁵ Amwaiwok iman ale, Chii age tugul ne mataachei laitornatetap Kamuktaindet ko uu lakweet ne ming'in, koma itei olooto matiny.

¹⁶ Ak kiganap icheeget eng' eunekyik, ak koberuur, kogonoor eunekyik icheek.

Nyoorunetap Saboondap koigeny

¹⁷ Ak ye kiwendi eng' ooreet, kolabatyi chiito age ineendet ak kogutung'ji, ak koteebe kole, “Kaneetindoni myee, ayai nee si anyoor saboondo ne po koigeny?”

¹⁸ Ak ki leenji `Jeso ineendet, “Kalya si iguureno ne myee? Ma mi chii ne myee, kobatee agenge, ineendet Kamuktaindet.

¹⁹ Ingen inyee ng'atuutik: ‘Amerumisye; Amoipkei; Amechoorse; Amebaoryanji lembech; Ameng'aalse; Teech kwandang'ung' ak kamenng'ung'.’ ”

²⁰ Ago ki leenji, “Kaneetindoni, ki ariip tuguuchuuto tugul kobooch ko aa ming'in.”

²¹ Ki keer anyun `Jeso ineendet ak kocham, ak koleenji, “Ta ko rartaat kiit agenge eng' inyee; ui, ialde tuguuk tugul che itinye, ak igoochi kibananook, si inyooru mogornateet eng' kipsengwet: ak inyoo isubwo.”

²² Ago ki kereer met agobo ng'olyoondonooto, ak kwo eng' arageneet: amu ki tinyei ineendet tuguuk che chaang'.

²³ Ak ki keer Jeso komoswek tugul, ak koleenji kasubikyik, “Pichiy ne tya koit laitornatetap Kamuktaindet che tinyei mogornatosyek!”

²⁴ Ak ki kwong'yo kasubikyik eng' ng'aleekyik. Ago ki wol Jeso kogeny, koleenji, “Lagochu, pichiy ne tya eng' icheek che tiegei mogornatosyek koit laitornatetap Kamuktaindet!

²⁵ Nyamnyum eng' tambeesyet kochut kondap sindanut, kosiir komong'ji mogoryot laitornatetap Kamuktaindet.”

²⁶ Ak ki kwong'yo icheek miising', ak koleenji, “Ara ng'oo anyun ne imuuchi konyoor saruunet?”

²⁷ Ak kingo keer `Jeso icheek, kole, “Ma imugaksei eng' piik, ago ma uu nooto eng' Kamuktaindet; amu imugaksei tuguuk tugul eng' Kamuktaindet.”

²⁸ Ki toi anyun Petero koleenji, “Keero, kigebagaakte tuguuk tugul ak ki kisubun.”

²⁹ Ki le Jeso, Amwaiwok iman ale, ma mi chii ne ki pagaach koot, anan ng'eetap kametwagik, anan chepkametwagik, anan kamet, anan kwanda, anan lagok, anan mbareenik, agobo anee, ak logoiywek che myach,

³⁰ ne ma nyooru konyil pogol nguno eng' peetuusyechu, kooriik, ak ng'eetap kametwagik, ak chepkametwagik, ak kametwagik, ak lagok, ak mbareenik, kobooto usiisyosyek; ak eng' peetuusyek che tuun pwoonei, saboondap koigeny.

³¹ Ago tuun egu che chaang' che po tai che po let; ak koek che po let che po tai.

Komwaei Jeso agobo meennyi

³² Ak ki mi icheek eng' ooreet kotogostoi Jerusalem; ak ki indoi Jeso: ak ki kwong'yo, ak koiyweis che ki isubi. Ak ki itabaan kogeny chooto taman ak aeng', kotoi komwachi icheek tuguuk che tuun ityin ineendet,

³³ kole, “Ogeero, kitogostoi Jerusalem; ak kindoi `Weeriitap chii eunegap tisiik che eecheen ak siriik; ak korwookyi kirwooget ne po meet, ak konde `ineendet eunegap pororyosyek;

³⁴ ak kochurochur ineendet ak kong'utyi, ak kobire kipchoritiit, ak kobar; ak ye ibata peetuusyek somogu kong'eet kogeny.”

Soometap Jakobo ak Johana

³⁵ Ak ki riikyi ineendet Jakobo ak Johana, weeriigap Zebedayo, ak koleenji, “Kaneetindoni, kimache iyaiywech kiy age tugul ne kisoomin.”

³⁶ Ak ki leenji icheek, “Omache ayaiywok nee?”

³⁷ Ak ki leenji, “Koonech ketebee, age eung'ung' ne po tai, ak age eung'ung' ne po kaataam, eng' telunateng'ung'.”

³⁸ Ago ki leenji `Jeso icheek, “Mongen kiit ne osoome. Tos omuuchi oee kigombet ne aee? Anan kibatisanenak kabatisanet ne kibatisanena?”

³⁹ Ak ki leenji, “Kimuuchi.” Koleenji anyun `Jeso icheek, “Kigombet ne aee ko tuun oee ak okweek; ak kabatisanet ne kibatisanena ko tuun kibatisanenok ak okweek nooto;

⁴⁰ ago ma anee ne igoitoi kotebee chii eunnyu ne po tai anan eunnyu ne po kaataam: ago po icheeget che kigechopchi.”

⁴¹ Ak ye kingo kas chuun tamanu, kotoi pichooto konereekyi miising' Jakobo ak Johana.

⁴² Ak kiguur Jeso icheeget kobwa ole mi, ak koleenji icheek, “Ongen ole icheeget che kiiti keele pou Pororyosyek, koyaegei koek kiptainik eng' icheek; ak chechwaak che eecheen kobou icheek.

⁴³ Ago ma uu nooto eng' okweek: ago chii age tugul ne machei koek ne oo eng' okweek, koek ne poisyewok:

⁴⁴ ak chii age tugul ne machei koek ne po tai eng' okweek, koek otwogindetap tugul.

⁴⁵ Amu ki ma nyo agot Weeriitap chii si keboisyechi, ago si kobois ineendet ak kogoito saboondanyi koek kiit ne kityage che chaang'.”

Kigoochin Bartimayo kogeerto

⁴⁶ Ak kiit anyun Jeriko: ak kingo mandae Jeriko, kobooto kasubikyik ak tuiyet ne oo, ko kitebyei eng' ooreet taban, Bartimayo, weeriitap Timayo, ineendet kipkoraatyat ne soomsei.

⁴⁷ Ak ye kingo kas kole, niito ko Jeso ne po Nazareth, kotoi kowaach ak kole, “Jeso, Weeriitap Daudi, rireena.”

⁴⁸ Ak ki kergong' che chaang' koleenji, “Siis!” Ago k ites kowaach miising' kole, “Weeriitap Daudi, rireena.”

⁴⁹ Ak ki tonon Jeso ak kole, “Oguur ineendet.” Ak ki kiguur kipkoratyandanooto, keleenji, “Paibaitu; ng'eet, kuurin ineendet.”

⁵⁰ Ak ki wiirta ngoryennyi ak koryakta kwo ole mi Jeso.

⁵¹ Ak ki wolji `Jeso ineendet koleenji, “Imache ayaun nee?” Ak kole chiito ne koraat, “Rabboni, amache ageerto.”

⁵² Ak ki leenji `Jeso ineendet, “Ui pandang'ung'; kagosaabin kayaneng'ung'.” Ak kigeerto sainooto ak koosup ineendet eng' ooreet.