MARIKO 1 - Bukuit Ne Tilil

Amdaetap Johana kabatisanindet.

¹ Taunetap logoiywek che myach che po Jeso Kristo, Weeriitap Kamuktaindet.

² Ko uu ye ki kisir eng' maotyot Isaiah keele, “Keero, ayooktoi kiboityonnyu kondoenen, ne chobei oreng'ung';

³ tuugeetap chii ne kuursei eng' surkwen koleen, ‘Ochop ooreetap Kiptaiyat, olitiit ole punooti.’ ”

⁴ Ki nyo Johana kobatisanisyei eng' surkwen ak koamdoi kabatisanet ne po siguunet agobo nyoetap kaat ne po tengekwogik.

⁵ Ak ki pwanji `piik ineendet kobunu emet komugul ne po Judea ak meng'iigap Jerusalem tugul; ak ki ibatisan icheek eng' aineetap Jordan, kong'aanyei tengekwogikwak.

⁶ Ki ilaachi Johana sambut ne po tambeesik ak ki rategei pireneetap muito, ki amei ineendet chereng'enyinik ak kumigap timiin.

⁷ Ak ki amda kole, “Isubwo ineendet ne kiim kosiiro, ak ma nyoljino ang'uruuk atyach anoogap kweonikyik.

⁸ Ki abatisanak eng' peek; ago ibatisanook ineendet eng' Kabuuset ne Tiliil.”

Kabatisaneetap Jeso

⁹ Ki nyo anyun Jeso eng' peetuusyechooto kobunu Nazareth ne po Galilaya, ak ki ibatisan Johana ineendet eng' Jordan.

¹⁰ Yeityo kogatogos eng' peek, kogeer kipsengwet kogayaatak ak kochoorchigei ineendet Kabuuset ne Tiliil ko uu cheptuget.

¹¹ Ak ki mong' tuugeet eng' kipsengwet kole, “Ii Weeriinnyu chamanennyu, agasenengei.”

¹² Ak koma tyanit komut Kabuuset ne Tiliil ineendet kotokyi surkwen.

¹³ Ki tebi ineendet eng' surkwen peetuusyek artam koyomei Setani; ak kitebyei ak tyong'ik che po timiin; ak ki poisyechin ineendet malaikaisyek.

Kotau `Jeso poisyet

¹⁴ Kingo kagenam Johana, konyo Jeso Galilaya, koamdooti logoiywek che myach che po Kamuktaindet,

¹⁵ koleen, “Kagosulda peetuusyek, ak kagoriik laitornatetap Kamuktaindet; osigu, ak oyan logoiywek che myach.”

¹⁶ Ye kiwendi Jeso kobunei tabandap araraita ne po Galilaya, kogeer Simion ak tupchennyi Andrea kowiirchin araraita regereiywot ne kinamee njireenik, amu ki ramiigap njireenik.

¹⁷ Koleenji `Jeso icheek, “Obwa osubwo si ayaak oegu ramiigap piik.”

¹⁸ Ak ki pagaakta regereiywekwak ak koosup ineendet.

¹⁹ Ak ye ki pa kitigin, kogeer Jakobo weeriitap Zebedayo ak tupchennyi Johana, che ki mi eng' moingennywa kochobei regereiywek.

²⁰ Ki kuur `ineendet icheek; ak ki pagaakta kwandanywa Zebedayo komi moinget kobooto otwogik, ak koosup ineendet.

Chii ne ki tinyei tamirmiryet ne murwoon

²¹ Ki pa anyun Kapernaum; ak ye kibetut ne po sabato, ko ki wo ineendet sinagogit oriit ak koneetis.

²² Ki kwong'yo icheek eng' kaneetisyennyi, amu ki ineeti icheek ko uu chii ne tinyei kimnateet, ama ko uu siriik.

²³ Ki mi sainooto eng' sinagoginnywa chii ne ki tinyei tamirmiryet ne murwoon, ak kiwaach,

²⁴ kole, “Kiting'egei nee ak inyee, Jeso ne po Nazareth? Kenyo ing'emech? Angenin ale, ii Ne Tiliil ne po Kamuktaindet.”

²⁵ Ago ki kergong' `Jeso ineendet koleenji, “Siis, ak imang'une ineendet!”

²⁶ Ak kibirabirto ineendet ak kowaachei eng' kutit ne oo, yeityo komanda oindonooto murwoon eng' ineendet.

²⁷ Ki tang'any tugul, ak koteebeegei icheegei kole, “Nee ni? Leel kaneetisyoni! Ng'atei eng' kimnateet agot tamirmirik che murwonen ak ko kasei iit ineendet.”

²⁸ Kong'eetee yooto ko kinaak inee eng' komoswek tugul che po Galilaya.

Kosoobi `Jeso piik che chaang'

²⁹ Ye kingo mong' eng' sinagogit, koba kootap Simion ak Andrea, kobooto Jakobo ak Johana.

³⁰ Ki myani kametap kwondap Simion kolalee maat ak kiruei, ak ki kimwachi Jeso eng' chokyinet agobo ineendet.

³¹ Ki nyo ak konam eunnyi, ak kong'eet ineendet. Kisoop ineendet ak kotoi kobois koboisyechi icheek.

³² Kingo ek koskoleny, ko karorokto asiista, kimutyi tugul che ki myandos ak icheeget che ki tinyei oik.

³³ Ak ki iyumgei nganaseet komugul eng' kurgat.

³⁴ Ki isoop che chaang' che ki myandos eng' myanwek che teerchiin, ak koon komanda oik che chaang'. Ki ma chamji oik kong'alaal amu ki ingen oichooto ineendet.

Koamdoi Jeso eng' Galilaya

³⁵ Eng' karon kogairir emet, kong'eet ineendet komanda saang' ak kwo surkwen kosa.

³⁶ Ki isup `Simion ak icheek che ki mi tugul.

³⁷ Kingo nyoor ineendet, koleenji, “Cheeng'in piik tugul.”

³⁸ Kowolji koleenji, “Ongetestai keebe agoi nganasook che rubei si kobiit aamda eng' olooto kora; amu ki anyoon agobo nooto.”

³⁹ Ki wo koyom Galilaya komugul, koamdooti ak ko oonei oik eng' sinagogisyekwak.

Kitiliili chii ne ki tinyei mogondos

⁴⁰ Ki nyoonji ineendet `chii ne ki tinyei mogondosaik kosoomei ak kogutunyi koleenjin, “Ngot icham, imuuchi itiliilo.”

⁴¹ Kiriree ineendet ak koyogoito eunnyi kotwa ak koleenji, “Tiliiliitu!”

⁴² Eng' yooto, kogisaapcho mogondosaik ak kotiliilit chiichooto.

⁴³ Ki kergong' ineendet ak kotyakta kwo;

⁴⁴ koleenji, “Memwachi chii kiy, ago ui iboorchigei tisiindet ak igoite konunotyotap katiliileng'ung' ko uu ye ki ng'at Musa, si koek paornat eng' icheek.”

⁴⁵ Ago kimanda inee ak kotoi komwaitaat ak kobarastaat ng'olyoondonooto kot ko mata komuuch kowendoot Jeso eng' nganaseet kegeeroti, ago kitebote kewaniin kityo. Ki pwanji `ineendet piik kobun komoswek tugul.