MALAKI 3 - Bukuit Ne Tilil

¹ Ogeero, ayoogu chiinyu, kayooktoin si kochop ooreet eng' tainnyu. Ak nyoonei matiny hekalunnyi `Kiptaiyat ne ocheeng'e. Nyoonei kayooktoin ne po arorutyet ne oboiboitune, mwaei Kamuktaindet ne Toroor ne po lugoosyek.

² Ago ng'oo ne imuuchi komuita eng' peetuutap nyonunennyi? Ak ng'oo ne tononi ye katook? Uu ineendet maat ne ki tiliilisye, ak ko uu sabunitap mwetiik;

³ ak kotep ng'wony ko uu kitong'iin ak ko uu katiliilindetap fedha. Itiliili `inee ooreetap Lawiik ak kotiliil icheek ko uu ye kitiliili thahabu ak fedha; si kogoochi Kamuktaindet ne Toroor kagoochinoik eng' imanda.

⁴ Si kochamak anyun kagoochinetap Judah ak ne po Jerusalem eng' taitap Kamuktaindet ne Toroor ko uu eng' peetuusyek ak eng' kenyiisyek che po keny.

⁵ Ak arikyok eng' kirwooget, ak achepchebi agoon paornateet agobo inyee aegu, arwookyi icheek che ma iywea: pooniik, che ibegei, piik che iyastos eng' lembechek, icheek che sastoe otwogindet ne kisirei eng' melektanyi, che sastoe kwony ne ki kosiirtoe manong'otyot ak ne ma tinyei sigiik, ak ne imaasi toondet, mwaei Kamuktaindet ne Toroor ne po lugoosyek.

Kebeberwegap taman ak kagoochinoik alak

⁶ Aa Kamuktaindet ne Toroor, ma walaksei, ko uu nooto okweek, ee weeriigap Jakobo, koma kigeswok.

⁷ Ki omaste kobooch peetuusyegap kwanisyekwok, omete kayomisutikyuk ama oriip. Oweekyage anyun, si aweekyogei, mwaei Kamuktaindet ne Toroor ne po lugoosyek. Ago oteebe ole, “Kiweegundoige ano?”

⁸ Tos chorei chii Kamuktaindet? Ago ochoora. Ago oteebe ole, “Ki kichoorten ano?” Ki ochor kebeberwegap taman ak kagoochinoik.

⁹ Kichubok eng' chubeet, amu ochoora, agot pororyoni komugul.

¹⁰ Oibu kebeberwek tugul che po taman kobwa choge, si kobiit amitwogik eng' koonnyu, ak otyema anyun eng' nooto, mwaei Kamuktaindet ne Toroor ne po lugoosyek, si ogeer ngo ma yaatwok tirisyogap kipsengwet ak aroong'wok perurto kot koma komi ole ondoi.

¹¹ Ak agerwok kong' ne amisyoti, si ma ng'em ruroteetap emeng'wong'; ama koosu keetiikwok che po sabibuk kotomo koit peetuusyek, mwaei Kamuktaindet ne Toroor ne po lugoosyek.

¹² Ak koguurenok pororyosyek tugul piik che poiboi, amu oegu emet ne ki chamei kot, mwaei Kamuktaindet ne Toroor ne po lugoosyek.

¹³ Kigouegitu ng'aleekwok che ki omwaitaena, mwaei Kamuktaindet ne Toroor. Ago oteebe ole nee ne ki kemwaitaenen?

¹⁴ Ki omwa ole, “Ma tilei kiy ngeot Kamuktaindet. Tos ki kogelwech nee ye ki ngeriip kayomisutikyik ak kebendatee taitap Kamuktaindet ne Toroor ne po lugoosyek keriiryoti?

¹⁵ Ak nguno keguure menotik piik che poiboi, ee, yaigap yaityo koma poorei kityo, ago ngo tyem Kamuktaindet ak kochilildos.”

¹⁶ Ki ng'alaaljigei anyun che iywei Kamuktaindet ne Toroor. Ki ep iit Kamuktaindet ne Toroor kogas ak ki kisir eng' tainnyi bukuitap kabwaatet agobo icheek che iywei Kamuktaindet ne Toroor ak kobwaati kainennyi.

¹⁷ Ak mwaei Kamuktaindet ne Toroor ne po lugoosyek kole, “Punjino icheek, eng' peetuut ne ayae icheek koek kinnyu ne nenyu aneege; ak ariiree icheek ko uu ye riiree chii weeriinnyi ne poisyechin.

¹⁸ Yeityo oweege ak obesye chiito ne po iman ak kiptengekyot, obesye ineendet ne otei Kamuktaindet ak ne maotei.”