LUKA 9 - Bukuit Ne Tilil

Koyooktoi `Jeso kasubikyik chooto taman ak aeng'

¹ Ki kuur anyun taman ak aeng' koyumgei, ak kogoochi kimnateet ak pounateet koboi oik tugul, ak kosoop che myandos.

² Ak ki iyookto koamda laitornatetap Kamuktaindet, ak kosoop che myandos.

³ Koleenji, “Amoip kiy ne po pandang'wong', agot kirokto, anan lolet, anan magatyat, anan fedhaisyek; amoibote sumotik aeng'.

⁴ Ak koot age tugul ne omong'jini, otebee olooto agoi obe.

⁵ Ak alak tugul che mataachak, ye omande eng' nganasanooto, olelekte temburyek eng' keelyekwok si koek paornateet agobo icheek.”

⁶ Koba anyun kobunoot nganasook, koamdaati logoiywek che myach, ak kosaaboti eng' oldo tugul.

Kaimetapkei ne po Herod

⁷ Ak ki kas anyun kirwoogindet Herod tuguuk tugul che ki koyaak: ki iimgei miising', amu kimwaei alak kole, kagong'eet Johana eng' che ki pek;

⁸ ak kileen alak, kogotook Elijah: koleen alak, kong'eet age eng' maotik chu ki po keny.

⁹ Ak ki le Herod, “Ki atil metitap Johana; ago ng'oo anyun chiichi, ne agase tuguuk che uu chooto agobo ineendet?” Ak ki cheeng' kole kogeer ineendet.

Kebaei piik eliphuusyek muut

¹⁰ Ak ye kingo week che kiyooktoi, komwachi ineendet tuguuk che kogoyai. Ak ki imut icheek koba taban icheegei agoi nganaseet ne kiguure Bethsaida.

¹¹ Ago kingo nai tuiyosyek koosup: ak kitaach icheeget, ak kong'alaalji agobo laitornatetap Kamuktaindet, ak ki isoop icheek che kimachei kisoop.

¹² Ak ye kimachei koimen, kobwa anyun tamanu ak aeng' koleenji ineendet, Ileenji tuiyet koba, si koit nganasook ak emet, si konyoor ole ruitos, ak amitwogik: amu kimi surkwen.

¹³ Ago ki leenji icheek, “Ogoochi okweek amitwogik.” Ak ki le, “Ma kitinye kiy kobatee magatiinik muut ak njireenik aeng'; kobatee keebe kealji amitwogik pichu tugul.”

¹⁴ Amu ki olo po murenik eliphuusyek muut. Ak ki leenji kasubikyik, Ochop kotep ng'wony ak ingobeate konom.

¹⁵ Ak ki yai anyun ko uu nooto, ak ki chop tugul kotep ng'wony.

¹⁶ Ak ki nam magatinichooto muut ak injirenichooto aeng', ak ki inyal kipsengwet, ak koberuur, ak kotonaton; ak kogoochi kasubik si kobiit kogoochi kabuureito.

¹⁷ Ak ki amis, kot kobiyong'so: ak ki kiyum katuganik che ki ng'et eng' kererutik, ak ki ek kereboonik taman ak aeng'.

Kong'aanyei Petero kole Jeso ko Kristo

¹⁸ Ak ye ki saaei ineegei, ko ki mi kasubik kobooto ineendet: ak kiteebe icheeget koleenji, “Mwaei tuiyosyek kole aa ng'oo?”

¹⁹ Ak ki wolji icheek koleenji, “Leen Johana Kabatisanindet; koleen alage, Elijah; koleen alak, kagong'eet maotyot age eng' chu ki po keny.”

²⁰ Ak ki leenji icheek, “Ago oleen okweek aa ng'oo?” Ak ki wol Petero kole, “Ii Kristo ne po Kamuktaindet.”

Komwaei Jeso agobo meennyi ak ng'eetyeennyi

²¹ Ago ki itigon icheek, ak kong'at koleenji, amomwachi chii ng'olyoondoniito;

²² kole, “Kanyolji Weeriitap chii konyalil eng' tuguuk che chaang', ak koeesyo poisyek ineendet ak tisiik che eecheen ak siriik, ak kebar, ak king'eet eng' peetuutap somok.”

²³ Ki mwachi tugul koleenji, “Ngo machei chii age tugul kosubwo, ko ingoeesyogei, ak koip kimurtoiyondennyi peetuut age tugul, ak kosubwo.

²⁴ Amu age tugul ne machei kosar saboondanyi kobeeti; ak age tugul ne ibeeti saboondanyi agobo anee, ko nooto ne saru.

²⁵ Amu keljin nee chii, ngo nyoor ng'wony komugul ak kobeetkei anan kerebe saboondanyi?

²⁶ Amu age tugul ne ililanjino ak ng'aleekyuk ko tuun ililanjin agine Weeriitap chii chiichooto, ye tuun nyoonei eng' toroornatennyi, ak ne po Kwanda, ak ne po malaikaisyek che tiliileen.

²⁷ Ago amwaiwok iman ale, miitei alak eng' che tonondos eng' yuto che ma koi chamcham meet matiny, kot kogeer laitornatetap Kamuktaindet.”

Waletapkei ne po Jeso

²⁸ Ak kingo keskei olo po peetuusyek sisiit, kobooch ngo mwa ng'aleechooto, komut Petero ak Johana ak Jakobo, kotogosta tulweet koba kosa.

²⁹ Ak ye kita kosaaei, kowalak itoondap togeennyi, ak koleelagitu ngoroikyik kot koliil piich.

³⁰ Ak ogeero, ki ng'alaalyo ak `ineendet piik aeng'u; ki Musa ak Elijah;

³¹ che ki kotook eng' liilindo, ak kiga ng'alaal agobo meennyi ne kimachei kosulda eng' Jerusalem.

³² Ak kiga pirto met Petero kobooto icheeget che ki mi ak ineendet: ago ye kingo kos, kogeer liilindanyi, ak pichooto aeng' che kitonondos kobooto ineendet.

³³ Ak ye kimachei koobeesyo ak ineendet, koleenji Petero Jeso, Kaneetindoni, myee amu kimi yuto: si keteech keryosyek somok; neng'ung' age, ko po Musa age, ko po Elijah age: kimwaei ama nai kiit ne mwaei.

³⁴ Ak ye kita komwaei tuguuchuuto, konyo pooldet, ak kotuch icheeget: ak ki iyweis ye kingo chut pooldet.

³⁵ Ak ki mong' kutit eng' pooldet, ak kole, “Ni Weeriinnyu, ne ki alewen; ogas ineendet.”

³⁶ Ak ye kingo pata kutinooto, kotook Jeso ineegei. Ak kosiisyo anyun, ama mwachi chii eng' peetuusyechooto kiit age tugul ne kiga kogeer.

Kisoobi weeriit ne tinyei tamirmiryet ne murwon

³⁷ Ak peetuut ne ki isubi peetuunooto, ye kingo choorugei eng' tulweet, kotuiyo ak ineendet tuiyet ne oo.

³⁸ Ak ogeero, kibol chiito age eng' tuiyet, kole, “Kaneetindoni, asaain ale, riiree weeriinnyu; amu ki kisich ineegei:

³⁹ ak keero, namei ineendet tamirmiryet, ak koma tyanit kowaach; ak kobirabirto kot kobun pugat kutinnyi, konyalili miising' ama chamei komanda.

⁴⁰ Ak koariirchi kasubiguk ale koon; ago ma imuuch.”

⁴¹ Ak ki wolji Jeso koleenji, “Ee ibini ma tinyei kayaneet ak komaasat, atebye kobootok, ak amuitoi agobo okweek kot kotyanit? Imutu weeriing'ung' konyo yu.”

⁴² Ak kingo ta konyonei, kowiirchi ng'wony oindet ineendet ak kobirabirto miising'. Ago ki kergong' `Jeso tamirmiryet ne murwoon, ak kosoop lakweet, ak koweekyi kwanda.

⁴³ Ak ki kwong'yo tugul agobo ooindap Kamuktaindet. Ago kingo ta kokwong'dos tugul agobo tuguuk che kayai Jeso, koleenji kasubikyik,

Komwaei Jeso kogeny agobo meennyi

⁴⁴ “Ongochut ng'aleechu iitiikwok: amu tuun kigoitoi Weeriitap chii kwo eunegap piik.”

⁴⁵ Ago ma iguiyo icheek mwaonooto; kiung'ak eng' icheeget, si ma nai: ak ki iywei koteebe ineendet agobo mwaonooto.

Ng'oo ne oo?

⁴⁶ Kotoi anyun koteebegei kole, ng'oo ne egu ne oo eng' acheek?

⁴⁷ Ak kingo nai Jeso kabwaatutigap mugulelwekwak, konam lakweet ne ming'in, ak konde ye neegit ineendet,

⁴⁸ ak ki leenji icheek, Chii age tugul ne taachei lakwani ming'in eng' kainennyu ko kataacha: ak chii age tugul ne taacha ko kataach ineendet ne ki iyookwo: amu ineendet ne ming'in eng' okweek tugul, ko nooto ne oo.

Tebutyetap Johana

⁴⁹ Ak ki wolji Johana koleenji, “Kiptaiyandani, kogigeer chii ko oonei oik eng' kaineng'ung'; ak ko ki etee, amu ma kibendoti tugul.”

⁵⁰ Ago ki leenji `Jeso ineendet, “Amoete ineendet; amu ineendet ne ma kirindook ko neng'wong'.”

Koesyoi piigap Samaria kotaach Jeso

⁵¹ Ak ye ki neegit miising' koit peetuusyek che kitaage ineendet eng' parak, ko ki iljigei kotokyi togeennyi Jerusalem;

⁵² koyookto che ibei ng'aleek koba kondoe ineendet: koba anyun, komong'ji nganaseet age ne po Samarik, ak kochopchi oldo.

⁵³ Ak ma taach ineendet, amu kiga kotokyi togeennyi Jerusalem.

⁵⁴ Ak ye kingo keer nooto kasubikyik Jakobo ak Johana, koleenji, Kiptaiyat, tos imache keng'at maat kochoorgei eng' kipsengwet, si kowong' icheeget (ko uu ye ki yai Elijah)?

⁵⁵ Ago kiweleljigei icheek, ak koger kong'.

⁵⁶ Koba anyun nganaseet age.

Che nyoljin koek kasubik

⁵⁷ Ak kingo ta kobendi eng' ooreet, koleenji chiito age, Asubun eng' oldo tugul ole iwendi.

⁵⁸ Koleenji Jeso ineendet, Tineyi lelwek keriingonik, ak kotinyei toriitik che po parak kesonok; ago ma tinyei Weeriitap chii ole indoi metinnyi.

⁵⁹ Ak ki leenji age, Isubwo. Ago ki leenji chiichooto, Kiptaiyat, chamwo awo korook atup abba.

⁶⁰ Ago ki leenji, Pagakte che pegu kotup chechwaak che pegu; ago ui inyee ak iamdaate ng'aleegap laitornatetap Kamuktaindet.

⁶¹ Kole age agine, Tuun asubun, Kiptaiyat; ago chamwo korook awo agoochi piigap koonnyu saisere.

⁶² Ago ki leenji `Jeso ineendet, Ma mi chii ne namei mogombetap tuuga, ak koguskong' kogeer let, ne nyoljin laitornatetap Kamuktaindet.