LUKA 7 - Bukuit Ne Tilil

Kayaneetap kiptaiyatap pogol

¹ Ak kingo kagogesyi ng'aleekyik tugul iitiigap piik, kwo anyun Kapernaum.

² Ki mi chemogetap kiplugotinik pogol, ne ki tinyei otwogindet ne ki chamei kot, ak kimyani otwogindonooto ne ki neegit kome.

³ Ak ye kingo kas agobo Jeso, koyookto ineendet poisyegap Yahudik, koba komwachi konyo kosoop otwogennyi.

⁴ Ak ye kingo it icheeget ole mi Jeso, kosaisai ineendet miising', koleenji, “Nyoljin ineendet iyachi ko uu nooto:

⁵ amu chamei pororyennyo, ak kiteekwech ineendet sinagoginnyo.”

⁶ Kwo anyun Jeso kobooto icheeget. Ak ye ki ma kota ko loo eng' koyooto, koyookto kiptaiyandanooto choronokyik koba ole mi ineendet ak koleenji, “Kiptaiyat, amata iimge: amu anee, koma aa chiito ne nyolu inyoo koonnyu:

⁷ nooto anyun, agot anee, koma aiitkei ale nyolu anyoonjin: ago mwaa ng'olyoot kityo, ak kosap otwogindennyu.

⁸ Agot anee, nganda aa chii ne kiboiywa, atinye kiplugotinik che abou, ak ngaleenji ni, Ui, kowendi; ak ngaleenji age, Nyoo, konyonei; ak ngaleenji otwogindennyu, Yai ni, koyaei.”

⁹ Ak ye kingo kas Jeso ng'aleechuuto, kokwong' agobo ineendet, ak kiwelelgei ak koleenji tuiyet ne ki isubi ineendet, “Amwaiwok ale, tomo anyooru kayaneet ne oo ne tee ni, achicha, agot eng' Israel.”

¹⁰ Ak kingo week anyun che kiga kiyookto, koba kaa, konyoor otwogindonooto ko kagosap.

King'eeti weeriitap mosoget eng' Nain

¹¹ Ak ye kingo kagobata peetuunooto, kwo nganaseet ne kiguure Nain; ak ki pa kasubikyik kobooto ineendet ak tuiyet ne oo.

¹² Ak ye kiga riikta ormariichetap nganaseet, ogeero, ki kisutei muusto, ne ki weeriit ne ki ii kamet ineegei, ak ki kwony ne ki kasiirtoe manong'otyot chebyosonooto: ak ki mi kobooto ineendet piik che chaang' che po nganaseet.

¹³ Ak ye kingo keer `Kiptaiyat ineendet, koriiree, ak koleenji, “Amat iriir.”

¹⁴ Ak kiriikta ye neegit ak kotwa kiit ne ki kisute ineendet: ak kitononso anyun che kisutei. Ak ki leenji `Jeso ineendet, Neranani, kamwaun ale, Ng'eet.

¹⁵ Ak ki ng'eet anyun ne koga kome, ak kotoi kong'alaal. Ak ki igoochi kamet.

¹⁶ Ak ki iyweis tugul: ak kolas Kamuktaindet kole, “Kagong'eet eng' kwenunnyo maotyot ne oo: ak, Kagorutoochi `Kamuktaindet piikyik.”

¹⁷ Ak ki yom ng'olyoondoniito agobo ineendet Judea komugul, ak korotinwek tugul che kiyiem olooto.

Jeso ak Johana kabatisanindet

¹⁸ Ak ki mwachi `kasubigap Johana ineendet tuguuchuuto tugul.

¹⁹ Ak kiguurchigei Johana aeng' che po kasubikyik ak koyookto koba ole mi Kiptaiyat, koteebe kole, “Tos inyeendet ni nyoonei, anan kigeni age?”

²⁰ Ak ye kiga it piik ole mi ineendet, koleenji, “Kagoyokwech Johana Kabatisanindet kebwa ole imi, kole, ‘Tos inyeendet ne nyoonei, anan kigeni age?’ ”

²¹ Eng' sainooto kosoop che chaang' che ki tinyei myanwogik ak korotwek ak tamirmirik che yaacheen; ak ki igoochi kipkoratinik che chaang' kogeerto.

²² Kowolji koleenji, “Oba omwachi Johana tuguuk che kaogeer ak che kaogas; kigoochin kipkoratinik kogeerto, ak pendoti che koing'waldos, kitiliili che tinyei mogondosaik, ak kastoi che ming'otin, king'eeti che ki kobek, ki amjin kibananook logoiywek che myach.

²³ Ak paibai age tugul ne ma nyoorunena kanagut.”

²⁴ Kingo kagoba che kiga koyookto Johana, kotoi komwachi tuiyosyek agobo Johana, kole, “Ki omande surkwen ogeer nee? Tegat ne itumdumi usoonet?

²⁵ Ago ki omande ogeer nee okweek? Chiito ne ilaachi ngoroik che tangusen? Ogeero, icheeget che ilaachi ngoroik che po lelesta, ak che meng'iisyei eng' talbisto, komiitei kooriigap laitorinik.

²⁶ Ago ki omande ogeer nee? Maotyot? Ee, amwaiwok ale, siirei maotyot.

²⁷ Niito ne ki kisir agobo ineendet, keele, ‘Ogeero, ayooktoi kiboityondennyu kondoenen, ne chobei oreng'ung' eng' taing'ung'.’

²⁸ Amwaiwok ale, eng' che ki sich kobogorisyek koma mi ne oo ne siirei Johana: kobatee ineendet ne ming'in eng' laitornatetap Kamuktaindet ko oo kosiir ineendet.”

²⁹ Ak ye kingo kas piik tugul, kobooto taagigap aisuruut, koiityi imanda Kamuktaindet, amu kiga kibatisan eng' kabatisanetap Johana.

³⁰ Ago ki eesyo Pharisaik ak ng'amotigap Ng'atuutik, kirwoogutigap Kamuktaindet, ma makyigei, amu ki ma ibatisan ineendet icheeget.

³¹ Ak ki le Kiptaiyat, “Aroge nee piigap ibini, ak kergei ak nee?

³² Kergei ak lagok che tebyei eng' ye mi ole keyae mung'aaret, ak koguuregei; koleen, ‘Kigegutwak ndurerusyek, ak ma oureren; ki kiriirchok, ak ma oriirye.’

³³ Amu ki nyo Johana Kabatisanindet ama am magatya anan divaik; ak omwae anyun ole, ‘Tinyei oindet.’

³⁴ Ki nyo Weeriitap chii koamis ak koeeiso; ak omwae ole, ‘Ogeero, kipkeiya chiichi, ak eeindetap divaik, chorweetap taagigap aisuruut ak kiptengeginik!’

³⁵ Ak naat utaatyet keele po iman, eng' lagokyik tugul.”

Ki ileen Jeso mwanigap kamanuut

³⁶ Ak ki mach age eng' Pharisaik kole koamis ak ineendet. Ak ki wo kootap Pharisaindonooto, ak kotep ng'wony koamis.

³⁷ Ak ogeero, kobogoryot age ne ki mi nganaseet, ne ki kiptengekyo; ye kingo nai kole, tebyei ng'wony Jeso koamisyei eng' kootap Pharisaindonooto, koip chuboit ne mi mwaita ne nyamdut,

³⁸ ak ki tonon eng' let ole neegitee keelyekyik, koriirei, ak ki toi kosachi peegap kong' keelyekyik, ak kouuse suumeekyik, ak kong'utut keelyekyik ak koilee mwaata.

³⁹ Ak ye kingo keer nooto Pharisaindonooto ne kiguurei ineendet, komwa eng' oriitinnyi, kole, “Nda ka maotyo chiichi, ta kagonai kole ng'oo kobogoryondoni katwa ineendet ak chii ne uu nee, kole kiptengekyot.”

⁴⁰ Ak ki wolji Jeso ineendet koleenji, “Simion, atinye ng'olyoot ne amache amwaun.” Ak ki le, “Kaneetindoni, mwaa anyun.”

⁴¹ Kole, “Ki mi pesendoindet anum ne ki tinyei pesenikyik aeng': kibesen age dinarisyek pogol muut, ak kibesen age konom.

⁴² Ak ye ki ma kotinyei kiy ne yaakyin, konyochi kaat icheek tuwai. Ng'oo anyun eng' icheek tuwai ne chamei ineendet kosiir?”

⁴³ Kowol Simion kole, “Aleen ineendet ne ki kinyochi kaat che chaang'.” Ak ki leenji, “Kairwooch komyee.”

⁴⁴ Ak kingo weleljigei kobogoryot, koleenji Simion, Igeere kobogoryondoni? Kaanyo koong'ung' ama inaga peek aune keelyekyuk: ago kagosachi keelyekyuk peekyik po kong' kobogoryondoni, ak kouuse suumeekyik.

⁴⁵ Ma ing'ututa; ago ineendet, kobooch ngap anyoo, kotomo kobagaakta kong'utut keelyekyuk.

⁴⁶ Ma iilee metinnyu mwaita: ago kagoiile inee keelyekyuk mwaita ne nyamdut.

⁴⁷ Nooto anyun ne kamwaun ale, kagenyochi kaat tengekwogikyik, che ka chaang'; amu chamei miising': ago ineendet ne kinyochin kaat kitigin, kochamei agine kitigin.

⁴⁸ Koleenji kobogoryondonooto, “Kagenyoun kaat tengekwogiguk.”

⁴⁹ Ak ki toi icheeget che ki miitei amisyet kobooto ineendet, komwa eng' oriitinnywa, kole, “Ng'oo ni kot konyochi kaat piik tengekwogik?”

⁵⁰ Ak ki leenji kobogoryot, “Kagosaruun kayaneng'ung'; ui eng' kaalyeet.”