LUKA 4 - Bukuit Ne Tilil

Konyooru Jeso yoomseet

¹ Ak ki week Jeso kobunu Jordan ko nyiitaat Kabuuset ne Tiliil, ak ki imut Kabuuset ne Tiliil kwo surkwen

² ak kotebi peetuusyek artam koyomei chesawilyet. Ak ma am kiy eng' peetuusyechooto: ak ye kingo keskei peetuusyechooto, koam rubeet.

³ Ak ki leenji chesawilyet, “Ngo ii Weeriitap Kamuktaindet, ing'at kooi koek magatyat.”

⁴ Ak ki wolji `Jeso ineendet koleenji, “Ki kisir keele, ‘Ma sabei chii eng' magatyat ineegei.’ ”

⁵ Ak ki imut anyun yoomindet kotogosta, kwo koboorchi laitornatosyek tugul che po ng'wony eng' sainooto.

⁶ Ak ki leenji anyun chesawilyet ineendet, Agoonin kimnatoni tugul, ak telunatennywa tugul; amu ki kigoono; ak agoochini age tugul ne amakyini.

⁷ Ngot iloswa anyun, eng' tainnyu, kobunjinin tugul.

⁸ Ak ki wolji Jeso koleenji, “Ki kisir keele, ‘Ilasu Kiptaiyat Kamuktaindet ne Toroor neng'ung', ak iboisyechi ineendet ineegei.’ ”

⁹ Ki imut anyun ineendet Jerusalem, kwo kotonone kimonjogutap Hekaluut, ak koleenji, “Ngo ii Weeriitap Kamuktaindet, iwiirchigei ng'wony eng' yu,

¹⁰ amu ki kisir keele, ‘Iyogu malaikaisyekyik agobo inyee, si koriibin,’

¹¹ ak kogeny, ‘Eng' eunekwak kotaachin, si ma rus koita keeldong'ung'.’ ”

¹² Ak ki wolji Jeso koleenji, “Ki kimwa keele, ‘Meyoom Kiptaiyat Kamuktaindet neng'ung'.’ ”

¹³ Ak ye kingo kes chesawilyet yoomseet age tugul, kobagaakta ineendet ne matya.

Jeso eng' Nazareth

¹⁴ Koweek anyun Jeso Galilaya eng' kimnateetap Kabuuset ne Tiliil: ak ki yom logoiywek korotinwek tugul agobo ineendet eng' ole neegitee olooto.

¹⁵ Ak ki ineetisyei eng' sinagogisyekwak, ak ki ilas `ineendet piik tugul.

Ke eesyoi Jeso eng' Nazareth

¹⁶ Ki nyo anyun Nazareth, ole kinerchin: ki wo sinagogit, eng' peetuutap sabato, ko uu ye ki cham kowendi, ak kotonon si kobiit kosoman.

¹⁷ Ak ki kigoochi ineendet bukuit ne mamanat ne po maotyot Isaiah. Ak ki ng'aany bukuit, konyoor ole ki kisir keele,

¹⁸ Mi Kabuusetap Kiptaiyat kobooto, Ami ki ila si kobiit aamji kibananook logoiywek che myach: Ki iyookwo si kobiit aamji luulenik katyaget, Asi kobiit kogeerto kipkoratinik, Ak atyach che ki kiguoten.

¹⁹ Si kobiit aamda kenyiit ne chamat eng' Kiptaiyat.

²⁰ Ak ki maman bukuit, ak koweekyi kogeny kiboityot, ak kotep ng'wony: ak ki ichiilji kong' `ineendet piik tugul che ki mi sinagogit.

²¹ Ak ki toi koleenji pichooto, Kagosulda rani siruutyoni eng' iitiikwok.

²² Ak kibaoryanji tugul ineendet ak kokwong'yo eng' ng'aleek che po myeeindo che kamang'une kutinnyi: ak ki le icheek, Tos ma weeriitap Joseph niito?

²³ Ak ki wolji icheek koleenji, “Iman omwaiwo kalewenoni, ‘Isaapkei inyee, chepkerichot!’ Ak omwae ole, ‘Yai chooto ak icheek eng' yu eng' emoning'ung', tuguuk tugul che ki kegas keele ki yaak eng' Kapernaum.’ ”

²⁴ Ak ki leenji, “Amwaiwok iman ale, ma mi maotyondo ne chamaksei eng' emennyi.

²⁵ Ago amwaiwok iman ale, ki mi mosoogik che chaang' Israel eng' peetuusyek che po Elijah, yu kiga kiger kipsengwet kenyiisyek somok ak arawek lo, yu kiga nyo rubeet ne oo emet tugul;

²⁶ ago ma kiyookto Elijah kwo ye mi age eng' icheek, kobatee ki wo Sarepta eng' emetap Sidon agoi kootap kwony age ne kiga kosiirtoe manong'otyot.

²⁷ Ak ki mi che chaang' che ki tinyei mogondosaik eng' Israel eng' peetuusyegap maotyot Elisha; ak ki ma kisoop chii eng' icheek kobatee Naaman ineegei, Syrianindet.”

²⁸ Ak ki nyi nereegek icheek tugul eng' sinagogit ye kingo kas ng'aleechuuto;

²⁹ ak king'eetyo kotoorta ineendet komanda eng' nganaseet, ak ki imut kwo tulweet parak ole ki kiteech nganasennywa, koleen kotoortae chemng'eisut.

³⁰ Ago kisiirtoe kwenunnywa kwo.

Chii ne ki tinyei tamirmiryet ne murwon

³¹ Ak kichoorchigei anyun Kapernaum, nganaseet ne po Galilaya. Ak ki ineet piik eng' peetuutap sabato:

³² ak ki kwong'yo eng' kaneetisyennyi; amu ki tinyei kimnateet ng'olyoondennyi.

³³ Ak ki mi chii sinagogit, ne ki tinyei tamirmiryetap oindet ne murwoon; ak ki waach eng' waagaat ne oo,

³⁴ kole, “Pagaaktech! Kiting'egei nee ak inyee, Jeso ne po Nazareth? Kenyo inyee si ibarech? Kaanain inyee ale ii Ne Tiliil ne po Kamuktaindet.”

³⁵ Ak ki kergong' `Jeso ineendet ak koleenji, “Siis, ak imong'u eng' ineendet” Ak kingo kagowiirchi oindet kwenunnywa, komang'une ineendet anyun, ko mata koita kiy.

³⁶ Ak ki kwong'yo pichooto tugul, ak kong'alaaljigei icheegei kole, “Nee ng'olyoondoni? Amu kang'at eng' kimnateet ak kamuktaet tamirmirik che murwonen, si komong'.”

³⁷ Ak ki yom anyun logoiywek komoswek tugul che po emonooto agobo ineendet.

Kosaabi `Jeso piik che chaang'

³⁸ Ak ki manda eng' sinagogit ak kwo kap Simion. Ki amei kametap osotyotap Simion eseet ne koroom; ak ki saisai `piik Jeso agobo ineendet.

³⁹ Ak kotonon eng' ye neegit, ak koger kong' eseet; ki pagaakta anyun eseet ineendet: ak koma tyanit kong'eet ak koboisyechi icheek.

⁴⁰ Ak ye ki neegit kororokto asiista, komutyi piik tugul piikwak che ki myandos eng' korotwek che teerchiin: ak ki igonoor eunekyik age tugul eng' icheek, ak kosaap.

⁴¹ Komang'une anyun `oik piik che chaang', kowaachei koleen, Inyeendet ko ii Weeriitap Kamuktaindet. Koger kong' `Jeso icheeget, ma chamji kotwek, amu ki ingen icheek kole, ineendet ko Kristo.

Koamndoi Jeso eng' Judea

⁴² Ak ye kingo kagoeech, komong' eng' olooto kwo surkwen. Ki cheeng'at `tuiyosyek ineendet, koba ole mi, komach icheeget koraany ineendet kole, amat kwo kobagaakta icheek.

⁴³ Ago ki leenji icheek, Kanyolja aamda logoiywek che myach che po laitornatetap Kamuktaindet eng' nganasook alak ak icheek: amu ki kiyokwo agobo nooto.

⁴⁴ Ak ki amdaat anyun eng' sinagogisyek che po Galilaya.