LUKA 3 - Bukuit Ne Tilil

Amndaetap Johana

¹ Ak eng' kenyiit ne po taman ak muut ne po laitornatetap Tiberia Caesarea, ye ki pounindet ne po Judea Pontio Pilato, ak Herod ko ki kirwoogindet ne po Galilaya, ak ki kirwoogindetap Iturea ak Trakoniti Philipu ng'eetap kametap Herod, ak ki Lusania kirwoogindet ne po Abilene,

² eng' peetuusyek che po tiseinateet ne oo ne po Anas ak Caiaphas, koityi anyun ng'olyootap Kamuktaindet Johana weeriitap Zekariah eng' surkwen.

³ Ak ki nyo komoswek tugul che po tabanwegap Jordan, koamdooti kabatisanetap siguunet agobo nyoetap kaat ne po tengekwogik;

⁴ ko uu ye ki kisir eng' bukuitap ng'aleegap maotyot Isaiah, keele, “Kutitap chii ne ititeni eng' surkwen koleen, ‘Ochop ooreetap Kiptaiyat, olitiit ole punooti.

⁵ Tuun kilong'u atebweet age tugul, ak tuun kiribribi tulweet age tugul ne oo ak ne ming'in, ak tuun kilititi che kunuuren, ak kichaboi ortinwek che sing'ortot;

⁶ ak tuun keerei piik tugul yetunetap Kamuktaindet.’ ”

⁷ Ki mwachi anyun tuiyosyek che kibendi ole mi ineendet, si kobatisan, koleenji, “Ee okweek lagogap erenook che tinye ng'wonet, ng'oo ne kagoteeiywok omweune nereeknateet ne tuun nyoonei?

⁸ Oii anyun logoek che nyoljin siguunet, amotau omwa eng' mugulelwekwok ole, ‘Kitinyei kwandanyo Abraham’; amu amwaiwok ale, eng' koichu komuuchi Kamuktaindet kong'eetyi Abraham lagok.

⁹ Agot nguno ko kaginde aiywet tigitigap keetiik: nooto anyun, keetit age tugul ne ma iyei logoek che myach, keebei, ak kewiirchi ma.”

¹⁰ Ak kiteebe ineendet tuiyosyek kole, “Ki yai nee anyun?”

¹¹ Ak ki wolji icheek koleenji, “Ineendet ne tinyei sumotik aeng', kogoochi ne ma tinyei; ak ingoyai ko uu nooto agine ne tinyei amitwogik.”

¹² Ak ki pwa ak icheek taagigap aisuruut si kibatisan, ak koleenji ineendet, “Kaneetindoni, ki yai nee?”

¹³ Ak ki mwachi `icheek koleenji, “Amomage piik tuguuk che siirei che ki king'at.”

¹⁴ Ak kiteebe kiplugotinik ak icheek koleenji, “Ki yai nee anyun acheek?” Ak ki leenji, “Amomu chii age tugul, anan orebe chii kiy; ago ingoyamak melekwekwok.”

¹⁵ Ak kingo ta koogeni piik kiit ne piitu, ak kogereeri met eng' mugulelwekwak piik tugul agobo Johana, koleen ngo tos Kristo ineendet;

¹⁶ kowolji Johana icheek tugul koleenji, “Abatisanook eng' peek iman; ago nyoonei ineendet ne kiim kosiiro, ne ma nyoljino atyach anoogap kweonikyik. Ibatisanook ineendet eng' Kabuuset ne Tiliil ak maat.

¹⁷ Tinyei keibet eng' eunnyi, ak kotiliili komyee rwanyut, ak koyumji nganuuk chogennyi; ago peelei meteteek eng' maat ne ma misoksei.”

¹⁸ Ki amji anyun piik logoiywek che myach kobooto katigonutik alak che chaang'.

¹⁹ Ago ye kingo kagoger kong' Johana kirwoogindet Herod agobo Herodias, osotyotap ng'eetap kam, ak agobo tuguuk tugul che yaacheen che kiga koyai Herod,

²⁰ kotesyi niito anyun chuun tugul, nooto kogiger Johana eng' korgoreet.

Kabatisaneet ne po Jeso

²¹ Ak ye kingo kagibatisan piik tugul, ak ko kagibatisan Jeso agine, ak ye ki saaei, koyaatak kipsengwet,

²² ak kochoorchigei ineendet Kabuuset ne Tiliil, eng' kergeindap cheptuget, ak komang'une kutit kipsengwet kole, “Inyeendet ko ii Weeriinnyu chamanennyu; agasenengei.”

Kaaroret agobo ooreetap Jeso

²³ Kingo tau Jeso koneetisyei, ko ki neegit kenyiisyek sosom, (koleen icheek abeere) weeriitap Joseph, weeriitap Heli.

²⁴ Heli ko ki weeriitap Matat, weeriitap Lawi, weeriitap Melki, weeriitap Janai, weeriitap Joseph,

²⁵ weeriitap Matatia, weeriitap Amos, weeriitap Nahum, weeriitap Esli, weeriitap Nagai,

²⁶ weeriitap Maat, weeriitap Matatia, weeriitap Semein, weeriitap Josek, weeriitap Joda,

²⁷ weeriitap Joanan, weeriitap Resa, weeriitap Zerubabel, weeriitap Shealtiel, weeriitap Neri,

²⁸ weeriitap Melki, weeriitap Adi, weeriitap Kosam, weeriitap Elmadam, weeriitap Er,

²⁹ weeriitap Jose, weeriitap Elieser, weeriitap Jorim, weeriitap Matat, weeriitap Lawi,

³⁰ weeriitap Simion, weeriitap Judah, weeriitap Joseph, weeriitap Jonam, weeriitap Eliakim,

³¹ weeriitap Melea, weeriitap Mena, weeriitap Matata, weeriitap Nathan, weeriitap Daudi,

³² weeriitap Jesse, weeriitap Obed, weeriitap Boaz, weeriitap Salmon, weeriitap Naasson,

³³ weeriitap Aminadab, weeriitap Armi, weeriitap Hesron, weeriitap Peres, weeriitap Judah,

³⁴ weeriitap Jakobo, weeriitap Isak, weeriitap Abraham, weeriitap Tera, weeriitap Nahor,

³⁵ weeriitap Serug, weeriitap Reu, weeriitap Peleg, weeriitap Eber, weeriitap Shelah,

³⁶ weeriitap Kainan, weeriitap Arphaksad, weeriitap Shem, weeriitap Noah, weeriitap Lamek,

³⁷ weeriitap Methuselah, weeriitap Enok, weeriitap Jared, weeriitap Maalaleel, weeriitap Kainan,

³⁸ weeriitap Enos, weeriitap Set, weeriitap Adam, weeriitap Kamuktaindet.