LUKA 23 - Bukuit Ne Tilil

Komi Jeso taitap Pilato

¹ Ki ng'eetyo anyun tuiyet komugul, ak komutyi ineendet Pilato.

² Ak ki toi anyun kotaam ineendet, kole, “Ki kinyooru chiichi komaasi pororyennyo, ak koetei kigoochi Caesarea kodi, ak komwaei ineendet kole, ‘Aa Kristo laitoryat.’ ”

³ Ak kiteebe ineendet Pilato, kole, “Ii laitoryatap Yahudik?” Ak ki wolji kole, “Kaimwa.”

⁴ Ak ki leenji Pilato tisiik che eecheen ak tuiyosyek, “Ma anyoorchi lelutyet chiichi.”

⁵ Ago ki isimji miising', kole, Ki inde chaamset piik, koneetoti eng' Judea komugul, kotoune Galilaya agoi koit oli.

Komi Jeso taitap Herod

⁶ Ago kingo kas Pilato ng'olyoondonooto, koteep kole, “Tos Galiilindet chiichi?”

⁷ Ak kingo nai kole po pounateet ne po Herod, koyookto kimutyi Herod, ne ki mi agine Jerusalem peetuusyechooto.

⁸ Kingo keer Herod Jeso, kobaibait miising': amu kimachei kobooch keny kogeer ineendet, amu kiga kogas tuguuk che chaang' agobo ineendet; ak kimachei kogeer kwang'utyet age koyaak eng' ineendet.

⁹ Ak kiteepse ineendet eng' ng'aleek che chaang'; ago ma wolji kiy.

¹⁰ Ak kitonondos tisiik che eecheen ak siriik, ak kotaam ineendet eng' kimnateet.

¹¹ Ak ki iming'in ineendet Herod ak asigarikyik, ak kochombil, ak kolaakyi ngoryeet ne karaaran miising' ak koweekyi Pilato kogeny.

¹² Ak ki ek choronoi Herod ak Pilato eng' peetuunooto: amu kita kosurtos icheegei eng' tai.

Pilato, Barabbas ak Jeso

¹³ Ki kuur anyun Pilato tisiik che eecheen ak pounik kobooto piik kobwa tugul,

¹⁴ ak ki leenji icheek, “Komutwaa chiichi ak komwa ole imaasi piik: ak ogeero, kaateebe aneendet eng' taing'wong', ak ma anyoorchi chiichi lelutyet eng' ng'aleechooto otaame ineendet:

¹⁵ achicha, agot Herod agine; amu kaweekwech ineendet; ak ogeero, ma yai kiy ineendet ne nyoljin meet.

¹⁶ Nooto anyun, abire ineendet, ak yeityo atyach.”

¹⁷ Amu ki ng'atuutyet kotyakyi agenge eng' peetuutap igoorto.

¹⁸ Ago ki polyo tugul, kole, “Iste chiichi, ak ityakwech Barabbas:”

¹⁹ ne kiga kitoorchi korgoreet, amu chaamset ne ki yai eng' nganaseet, ak rumisyet.

²⁰ Ak ki ng'alaalji Pilato icheeget kogeny, komachei kotyach Jeso;

²¹ ago ki polyo icheek, kole, “Igartaat eng' kimurtoiyot, igartaat ineendet eng' kimurtoiyot.”

²² Ak ki mwachi icheek ne po somok, koleenji, “Kalya, nee yaityet ne ki yai chiichi? Ma anyoorchi ng'olyoot ineendet ne nyoljin kome: nooto anyun abire ineendet si atyach.”

²³ Ago ki tes kobolyo miising', komachei kole kigartaat. Ak ki iterteeris kutusweekwak.

²⁴ Ak kitil anyun Pilato kirwooget koyaak ko uu ye kimach icheek.

²⁵ Ak ki ityaach ineendet ne kiga kitoorchi korgoreet agobo chaamset ak rumisyet, ne kagagosoom icheek; ago ki igoito `ineendet Jeso si kobiit koyachi ko uu ye kimachei.

Kigartati Jeso

²⁶ Ak kingo ta komuti ineendet, konam Simion, Kurenindet, ne ki punu kooret age, ak kosutyi kimurtoiyot, si kobiit koip kosubi Jeso.

²⁷ Ak ki isubi tuiyet ne oo ne po piik, kobooto kobogorisyek che ki iteiyoti ak koriirchinoti ineendet.

²⁸ Ago kiweleljigei Jeso icheek koleenji, “Tiibiigap Jerusalem, amorirye agobo anee, ago oriirchigei, ak lagokwok.

²⁹ Amu, ogeero, pwoonei peetuusyek, che tuun leen icheek, iberuurotin che soon ak mootinwek che ma iiyo, ak kinaik che ma kireri.

³⁰ Yeityo kotoi icheek koleenji tuloonook, Oluuljech; ak koleenji tuloonook che mengech, Otuchech.

³¹ Amu ngot koyai tuguuchu eng' keetit ne tuon, koteptoi ano anyun eng' ne yaamaat?”

³² Ak ki miitei kiptengeginik aeng'u, che ki kimuti kobooto ineendet, koba kebar.

³³ Ak kingo it ye kiguure Terta, ko yooto ole ki kigartate ineendet ak kiptengeginichooto, age eng' komostap tai ak age eng' komostap kaataam.

³⁴ Ak ki le Jeso, Abba, nyochi kaat icheek; amu ma nai kiit ne yaei. Ak kipchechigei ngoroikyik, eng' seretap parbareek.

³⁵ Ak kitonondos piik kogeerei. Ak kororechi ineendet pounik kole, Kisaru alak; ingosargei ibak ngo Kristo niito, ne lewenot ne po Kamuktaindet.

³⁶ Ak kichurochur ak icheek kiplugotinik ineendet, kobwanei ye mi ineendet, kogoochin siki,

³⁷ koleen, Ngo ii Laitoryatap Yahudik, isarugei.

³⁸ Ak ki mi siruutik metinnyi parak, che mwaei koleen, NI KO LAITORYAT NE PO YAHUDIK.

³⁹ Ak kichurachur ineendet age eng' kiptengeginichooto kiga kigartaat, kole, “Tos ma ii Kristo inyee? Sarugei ak isarwech ak acheek.”

⁴⁰ Ago ki wol age, ak koger kong' kole, “Meiywei Kamuktaindet, agot inyee, ak imi kagikyinonooto?

⁴¹ Ago po iman nenyo; amu kagigoonech ko uu poisyonikyok: ago ma yai chiichi kiy ne ma nyolu.”

⁴² Ak ki le, “Jeso, ibwaata ye tuun inyone eng' laitornateng'ung'.”

⁴³ Ak ki leenji `Jeso ineendet, Amwaun iman, ale, Kitebye tuwai rani eng' Paradiso.

Komee Jeso eng' kimurtoiyot

⁴⁴ Ak ki olo po sait lo, koimenit emet komugul agoi sait sogool,

⁴⁵ ak ki ma kota kooluu asiista: ak kigereer kwenutap angeet ne kiga kioiye Hekaluut.

⁴⁶ Ak kitwek Jeso eng' kutit ne oo, kole, “Abba, kande saboondanyu euneguk: ak kingo kagomwa ni, kogoito saboondonyi.”

⁴⁷ Ak kingo keer chemogetap kiplugotinik pogol tuguuk che kayaagiis, kolas Kamuktaindet kole, “Koga po iman chiichi.”

⁴⁸ Ak kingo keer tuguuk che kayaagiis tuiyosyek tugul che kiga koyumgei si korat setyo, koweigei kolugotegei tegetik.

⁴⁹ Ak kitonondos eng' ye loo tugul che ki ingengei, ak kobogorisyek che ki isubu ineendet kobunu Galilaya, kole si kogeer tuguuchuuto.

Ketubei Jeso

⁵⁰ Ak ogeero, chiito ne ki kiguure Joseph, chiitap kapkirwook, chiito ne myee, ak ko po imanda

⁵¹ (ak ki ma kochamei chiichooto kirwoogennywa ak poisyennywa), ki po Arimatea ineendet, nganaseet ne po Yahudik, ne ki igeni agine laitornatetap Kamuktaindet:

⁵² ki wo chiichito ole mi Pilato, kwo kosoom poortap Jeso.

⁵³ Kochoor konyo ng'wony, ak kotaae angeet ne po katanit, ak konde kererit ne ki kibal rwandet, ne kitom ketupchi chii.

⁵⁴ Ak ki peetuutap Chobeet, ak kiga riik sabato.

⁵⁵ Ak ki isubu kobogorisyek, che kigabwa kobooto ineendet kobunu Galilaya, ak kogeer kererit, ak ole ki kindoitoi poortanyi.

⁵⁶ Ak ki weigei, koba kochop nyamdutik ak mwanik. Ak ki imuuny eng' peetuutap sabato ko uu ng'atuutyet.