LUKA 22 - Bukuit Ne Tilil

Ketetei kebar Jeso

¹ Ki riik anyun igoorto ne po magatiinik che ma kinde mermereek, ne kiguure Paska.

² Ak ki cheeng' tisiik che eecheen ak siriik ole partoi ineendet; amu ki iywei icheek piik.

Kong'wektoi `Judas Jeso

³ Ak kichut Setani Judas ne kiguure Iskaryot, ne ki age eng' taman ak aeng'.

⁴ Ak ki wo kong'alaal ak tisiik che eecheen ak kiptainik, ole ng'wektochindoi ineendet icheek.

⁵ Kiboiboitu anyun pichooto, ak kochamyechi kogoochi ineendet fedhaisyek.

⁶ Kocham anyun ineendet ak kocheeng' poroindo kong'wekyi ineendet icheek eng' ole ma mi piik che chaang'.

Chobeet agobo paska

⁷ Ak kiit anyun peetuut ne po magatiinik che ma kinde mermereek, peetuut ne ki kanyool koeny aarwetap paska.

⁸ Ak ki iyookto Petero ak Johana, kole, “Oba ochobwech paska, si kobiit keam.”

⁹ Ak ki leenji, “Imache keebe kechop eng' ano?”

¹⁰ Ak ki leenji icheek, “Ogeero, ye omong'ji nganaseet, kotuiyenok chiito ne ibei tereetap peek; osup ineendet agoi koot oriit ole wendi.

¹¹ Ak omwachji chiitap ko po koot, oleenji, ‘Kateebenen Kaneetindet, kole, Mi ano kootap toek, ole anyoone aame paska kobooto kasubikyuk?’

¹² Koboorwok anyun koot ne oo ne mi parak ne tetotin tuguuk: ochop eng' olooto.”

¹³ Ak ki pa anyun, ak konyoor ko uu ye kagagemwachi: ak ki chop paska.

Koamei Jeso ak kasubik paska ne po let

¹⁴ Ak ye kingo it sait, kotep ng'wony, kobooto che kiyooktoi.

¹⁵ Ak ki leenji icheek, “Eng' mageet ko koamach aam paskaini kobootok kotom anyalil;

¹⁶ amu amwaiwok ale, kobooch nguno koma aame agoi kosulda eng' laitornatetap Kamuktaindet.”

¹⁷ Ak ki taach kigombet, ak kingo kagogoito kongoi, kole, “Onam ni, ak opchechigei;

¹⁸ amu amwaiwok ale, kobooch nguno koma aee che po logoegap sabibuk, agoi koit laitornatetap Kamuktaindet.”

¹⁹ Ak ki nam magatyat, ak kingo kagomwa kongoi, kobuutul, ak kogoochi icheek, ak kole, “Ni ko poortanyu ne kigoitoi agobo okweek; oyae ko uu ni si obwaatena.”

²⁰ Ko uu nooto kigombet agine, kingo kagobata amitwogik che po lagat, kole, “Kigombani ko arorutyet ne leel ne po korotiikyuk, che kitumdoi agobo okweek.

²¹ “Ago ogeero, ineendet ne ng'wektoo ko mi eunnyi kobooto eng' mesani.

²² Amu wendi Weeriitap chii iman, ko uu ye ki king'at; ago pwo eng' chiichooto ng'wektoi ineendet!”

²³ Ak ki toi anyun koteebegei icheegei, kole ng'oo eng' icheek ne yaei kii.

Etunateet ne po iman

²⁴ Ki ng'eet anyun tiyet eng' kwenunnywa, kole ng'oo ne kiiti keele ne oo eng' icheek.

²⁵ Ak ki leenji icheek, Laitorani laitorinik eng' Pororyosyek: ak icheeget che tinyei pounateet eng' icheek keguure Toretik.

²⁶ Ago, ma uu nooto eng' okweek: ago ingoigei ne oo eng' okweek ne ming'in; ak ineendet ne oo koigei ne otisyei.

²⁷ Ng'oo ne oo anyun, ineendet ne tebyei eng' amisyet, anan ineendet ne otisyei? Tos ma ineendet ne tebyei eng' amisyet? Ago ami kwenung'wong' ko uu chiito ne otisyei.

²⁸ Ago okweek ko oo che ki otebi kobooto eng' yoomsosyekyuk;

²⁹ ak kaagoonok laitornatet, ko uu ye kigogoono Abba,

³⁰ si kobiit oamisye ak koeise mesennyu eng' laitornatennyu, ak tuun otebee ng'echerok che po laitornatet, orwookyini ortinwek taman ak aeng' che po Israel.

Sip koyastos Petero kole ma metoi Jeso

³¹ Simion, Simion, keero, kagosoom Setani kole konamak, si kosesak ko uu nganuuk:

³² ago ki asaa agobo inyee, si ma pek kayaneng'ung': ak ye kaiwalage, igimit che otupche.

³³ Ak koleenji ineendet, Kiptaiyat, kaachoboge keebe tuwai korgoreet agot meet.

³⁴ Ak ki mwa kole, “Amwaun Petero, kotom koote kipsoiywet rani, ieesyoa konyil somok ile, mengeno.”

Ye iyooktoi `Jeso piik

³⁵ Ak ki leenji icheek, “Kinga yootok ko motinye agot lolet, anan suberet, anan kweonik, ko tos kirarta kiy eng' okweek?” Ak ki le, “Ma rarwech kiy.”

³⁶ Ak ki leenji, “Ago ineendet ne tinyei lolet koibot nguno, ak uu nooto suberet agine: ak ineendet ne ma tinyei rotwetap chok, koalda ngoryennyi, si koale.

³⁷ Amu amwaiwok ale, kiit ne ki kisir ko kanyool kosulda eng' anee, keele, Ki kiit ineendet kobooto kiptengeginik: amu tinyei kagesunet ng'aleek che ki kisir agobo anee.”

³⁸ Ak ki le, “Kiptaiyat, keero, mi yu rotoogap chok aeng'u.” Ak ki leenji icheek, “Kagoyam.”

Kosaaei Jeso eng' Gethsemane

³⁹ Komong' saang' anyun, ak kwo agoi tulweetap Mseituni, ko uu piteennyi; ak ki isup kasubik ineendet.

⁴⁰ Ak ye kingo kagoit olooto, koleenji icheek, Osaa si mochut yoomseet.

⁴¹ Ak ki istoegei icheek ye tee ye itei koita ngewiirta; ak kigutuny kosa,

⁴² kole, “Abba, ngot igeer ak icham, iistoena kigombani: ma ko uu magennyu ago ingoyaak ko uu mageng'ung'.”

⁴³ Ak ki mong'ji ineendet malaikaiyat ne ki punu kipsengwet kogimit ineendet.

⁴⁴ Ak ye ki mi ineendet nyalilda ne ng'waan, kotes kosa miising': ak ki kergeitu kaotikyik ak korotiik che sachin ng'wony.

⁴⁵ Ak kingo ng'eet eng' saaennyi, konyo ole mi kasubikyik, ak konyoor koruitos amu arageneet,

⁴⁶ ak ki leenji icheek, “Kalya si oruiye? Ong'eetyee, osaa, si mochut yoomseet.”

Keng'wektoi ak kenamei Jeso

⁴⁷ Ak kingo ta ko ng'alaali, ogeero, tuiyet, kobooto ineendet ne kiguure Judas, age eng' taman ak aeng', ki indoune icheek; ak koriikyi ineendet Jeso si kong'utut.

⁴⁸ Ago ki leenji Jeso, Judas, ing'wektoi Weeriitap chii eng' ng'ututet?

⁴⁹ Ak kingo keer che ki mi kobooto ineendet kiit ne machei koyaak, kole, “Kiptaiyat, ki ep eng' rotwetap chok?”

⁵⁰ Ak ki ep age eng' icheek otwogindetap tisiindet ne oo, ki ep iitinnyi ne po tai.

⁵¹ Ago ki wolji Jeso koleenji, “Omete; kagoyam.” Ak kitwa itinnyi, kosoop.

⁵² Ak ki leenji `Jeso tisiik che eecheen, ak kiptainigap Hekaluut, ak poisyek che kigabwa kogirinda ineendet, Kobwa ak rotoogap chok ak kirokweek, ko uu ye obwanjini rebindet?

⁵³ Ye ki ami kobootok peetuut age tugul eng' Hekaluut, koma oyogocha eunekwok: ago saing'wong' ni, ak kimnateet ne po mesundeito.

⁵⁴ Ki nam anyun ineendet ak komut kwo kootap tisiindet ne oo. Ak ki isubi Petero eng' ye loo.

⁵⁵ Ak ye kiga kolal maat eng' kok, kotep ng'wony tugul, ak ki tebee Petero kwenunnywa.

⁵⁶ Ak kingo keer chepto age ineendet kotebyei eng' ye mi lapkeiyetap maat, kochiilji kong' ineendet, kole, “Ki mi chiichi agine kobooto ineendet.”

⁵⁷ Ago ki tiiyo, kole, “Kobogoryondoni, mangen ineendet.”

⁵⁸ Ak ne matya kogeer chiito age ak koleenji, “Ii agenge aginye eng' icheek.” Ak ki le Petero, “Chiichi, ma po pichooto.”

⁵⁹ Ak ye kingo keskei olo po sait agenge, kole chiito age eng' kimnateet, Iman ki mi chiichi agine kobooto ineendet: amu Galiilindet ineendet.

⁶⁰ Ago ki le Petero, “Chiichi, mangen cho imwae.” Ak kota komwaei, koote kipsoiywet sainooto.

⁶¹ Ak ki welelgei anyun Kiptaiyat, ak kogeer Petero. Ak ki ibwaat Petero ng'olyootap Kiptaiyat, ko uu ye kagagomwachi, kole, “Kotom koote kipsoiywet rani, ieesyoa konyil somok.”

⁶² Ak kimanda saang', kwo koriir eng' ng'wanindo.

Chombilet ak pireetap Jeso

⁶³ Ak kichombil `piik Jeso che kinamei ineendet ak kobir.

⁶⁴ Ak ki tuch konyekyik, ak koteebe, kole, “Ng'orse: ng'oo ne kamasin?”

⁶⁵ Ak ki mwa ng'aleek alak che chaang' che yaacheen agobo ineendet, kochurachuri ineendet.

Komi Jeso taitap tisiik che eecheen

⁶⁶ Ak kingo kagoeech, koyumgei poisyegap pichooto, tisiik che eecheen ak siriik; ak ki imut ineendet kwo kapkirwoogennywa, kole,

⁶⁷ Ngo ii Kristo, imwaiwech. Ago ki leenji icheek, Agot ndamwaiwok, ko moyani:

⁶⁸ ak ngot ateebenak, ko mowolu.

⁶⁹ Ago kobooch nguno kotebee Weeriitap chii eutap tai ne po kamuktaet ne po Kamuktaindet.

⁷⁰ Ak ki le icheek tugul, Tos ii Weeriitap Kamuktaindet anyun? Koleenji icheek, Omwae ole aa ineendet.

⁷¹ Ak ki le icheek, Ta kemage nee paornateet age? Amu kagegas acheeget eng' kutinnyi.