LUKA 21 - Bukuit Ne Tilil

Kagoochinoik

¹ Ak ki keer `Jeso mogoreek kondai kagoochinoikwak ole kiyumjin

² ak kogeer mosoget age ne kibanania kondai sendeisyek aeng' che mengech.

³ Ak ki le, Amwaiwok iman ale, Kagonde mosogani panan che siirei cho tugul:

⁴ amu kagonde chu tugul eng' chaang'indonywa ole kindoi kagoochinoik; ago kagonde ineendet eng' panandanyi tugul che tinyei, agot che kosabe.

Sip komwaei Jeso agobo Hekaluut ak peetuusyek che pwoonei

⁵ Ak kingo ta kong'alaali alak agobo Hekaluut, ole ki kimusaganda eng' koik che korooron ak kagoochinoik, kole,

⁶ Eng' tuguuchu ogeere, ko tuun pwoonei peetuusyek, che ma ng'etunee koita agot agenge paragutap age, ne ma tuun ki wiirchin ng'wony.

⁷ Ak kiteebe, kole, “Kaneetindoni, egu anyun tuguuchuuto auyo? Ak uu nee kaboorunet ye tuun machei koriik kosulda tuguuchuuto?”

⁸ Ak ki le, Oriipkei si ma kibeetook: amu tuun pwoonei piik che chaang' eng' kainennyu, koleen, Aa ineendet; ak, Kagoriik peetuusyek: amosup icheek.

⁹ Ak ye tuun ogas agobo lugoosyek ak chemargeet, ko matoaragense: amu kanyool kosip kosulda tuguuchooto korook; ago tomo koriik kagesunet.

¹⁰ Koleenji anyun icheek, Tuun setyin pororyet age pororyet age, ak setyin laitornatet age laitornatet age:

¹¹ ak kobiit potanosyek che eecheen che po ng'wony, ak rubosyek eng' oldinwek alak, ak korotwek; ak kobiit kamuisosyek ak kaboorunoik che eecheen che punu kipsengwet.

¹² Ago ye tomo kobiit chuuto, konamak eng' eunekwak, ak kousok, ak komutak obe sinagogisyek ak korgorosyek, komutak taitap laitorinik ak pounik agobo kainennyu.

¹³ Egu paornateet eng' okweek.

¹⁴ Oegu che pegechinotin eng' mugulelwekwok, si mosip ogereer met agobo ole owolundoi:

¹⁵ amu agoonok kutit ak utaatyet, ne ma imuuchi puunikwok tugul kota kowol kiy anan kogirindaak.

¹⁶ Ak kong'wektak sigiikwok, ak che otupche, ak che po oreng'wong', ak choronok; ak kebar alak eng' okweek.

¹⁷ Ak kowechok piik tugul agobo kainennyu.

¹⁸ Ak ma petei sumeiyot agenge ne po metowekwok.

¹⁹ Ak eng' muitaeng'wong' onyooru saboonwekwok.

²⁰ Ak ye tuun ogeer lugoosyek koyiem Jerusalem, onai anyun ole, kagoriik ng'emisyennyi.

²¹ Ingomwechi anyun che mi Judea tuloonook; ak ingomanda che mi kwenutap nganasanooto; ak amat kota koba oriit icheek che mi emonooto.

²² Amu chuuto ko peetuusyegap mugetuut, si kobiit kosulda tuguuk tugul che ki kisir.

²³ Pwo eng' icheek che chiioo ak che tinyei lagok che reritos eng' peetuusyechooto! Amu piitu pichiindo ne oo eng' ng'wony, ak nereeknateet eng' pichuuto.

²⁴ Ak kobutyo icheek eng' ng'atibindap rotwetap chok, ak kimut luulenik koba pororyosyek tugul: ak kotyech Pororyosyek Jerusalem, agoi kosulda peetuusyegap Pororyosyek.

Konyonei Weeriitap Chii

²⁵ Ak kobiit kaboorunoik eng' asiista ak eng' arawet ak eng' kecheik; ak kobiit eng' ng'wony pichiindap pororyosyek, ak peng'jinet amu kamuutetap araraita ak peek che mildogei;

²⁶ ak kobek mugulelwegap piik amu kaiyweisyet, ak amu kagenisyetap tuguuk che pwaanjin ng'wony: amu kitumdumi kimnatosyegap kipsengwet.

²⁷ Ak eng' peetuunooto kogeer anyun Weeriitap chii konyonei eng' pooldet kobooto kimnateet ak liilindo ne oo.

²⁸ Ak ye toi kosulda tuguuchuuto, ogeer parak, ak oyot metowekwok; amu kariik katyageng'wong'.

Kanyool keriipkei

²⁹ Ak ki mwachi icheek kalewenet; kole, “Ogeer mogoywet, ak keetiik tugul:

³⁰ ye ing'atyo ogeere ak onae okweek ole, kariik kesisyet.

³¹ Uu nooto anyun ak okweek, ye ogeer koyaagiis tuguuchuuto, onai ole kariik laitornatetap Kamuktaindet.

³² Amwaiwok iman ale, Masiirtoi ibini, agoi kosulda tuguuk tugul.

³³ Siirtoi kipsengwet ak ng'wony: ago ma koi siirto ng'aleekyuk.

Kaneetisyet agobo keiyandit

³⁴ “Ago oriipkei anyun okweek, si ma nyi mugulelwekwok keiyandit, ak pogitet, ak kaimutigap sabeetap peetuusyechu, ak konyonjok peetuunooto kocheak ko uu mesteet:

³⁵ amu uu nooto tuun nyoonjin piik tugul che menyei ng'wony komugul.

³⁶ Ago oriipkei eng' peetuut age tugul, ak osaae, si kobiit oterteerisye, ochilile tuguuchuuto tugul pwoonei, ak otononse eng' taitap Weeriitap chii.”

³⁷ Ak ki ineetisyei eng' Hekaluut peetuut age tugul; ak kimandoi kemout age tugul, kowendi kotebyei eng' tulweet ne kiguure tulweetap Mseituni.

³⁸ Ak kimusyin piik tugul ineendet eng' Hekaluut, si kobiit kogas ineendet.