LUKA 20 - Bukuit Ne Tilil

Koeesyoi piik kimnateetap Jeso

¹ Ak ye ki ineeti piik eng' peetuut age eng' Hekaluut, ak koamdoi logoiywek che myach, kobwonji ineendet tisiik che eecheen ak siriik kobooto poisyek koche ineendet;

² ak ki mwachi ineendet koleenji, “Mwaiwech; iyae tuguuchu kimnateetap ng'oo? Ak ko ng'oo ne kigoonin kimnatoni?”

³ Ak ki wolji koleenji, “Ateebenok agane teebut; ak omwaiwo:

⁴ Kabatisaneetap Johana ko ki punu kipsengwet, anan ki punu piik?”

⁵ Ak ki ng'alaaljigei icheegei, kole, “Ngot kemwa keele, Ki punu kipsengwet; komwa kole, Ko kilya si moyan ineendet?

⁶ Ago ngot kemwa keele, Ki punu piik; kolachech piik tugul eng' koik: amu ki iyani icheek kole, ki maotyo Johana.”

⁷ Ak ki wol kole, “Ma kingen ole ki punu.”

⁸ Ak ki leenji `Jeso icheek, “Agot anee koma mwaiwok kimnateet ne ayae tuguuchu.”

Kalewenet agobo mbareetap sabibuk ak meek che yaach

⁹ Ak ki toi komwachi piik kalewenoni, kole: Kimin chii sabibuk eng' mbar, ak komanakyi meek, ak kwo emet age kotebi peetuusyek che chaang'.

¹⁰ Ak kingo it peetuut koyookyi otwogindet meechooto, si kobiit kogoochi icheek ineendet logoegap mbaranooto: ago kibir meek ineendet ak koon kwo puch.

¹¹ Ak ki iyookto kogeny otwogindet age: ak kibir nooto agine, ak koteweer, ak koon kwo puch.

¹² Ak ki iyookto kogeny ne po somok: ak ki iguoten agine ak kotoorchi saang'.

¹³ Ak ki le chiitap ko po mbareet, Ayai nee anyun? Ayooktoi weeriinnyu chamanennyu: tamangap kogonyit ineendet.

¹⁴ Ago ye kingo keer meek ineendet, kong'alaaljigei icheegei, kole, Niito ne tuun punjin tuguuk: ongebar anyun, si kindii tuguuk.

¹⁵ Ak ki toorta komanda eng' mbareetap sabibuk ak kobar. Itoi nee anyun chiitap ko po mbareet pichooto?

¹⁶ Nyoonei anyun ineendet ak kobar meechooto tugul, ak kogoochi piik alak mbareetap sabibuk. Ak ye kingo kas icheek, komwa kole, “Achicha, mat koek ko uu nooto.”

¹⁷ Ak ki ichiilji kong' icheek ak kole, “Nee anyun ne ki kisir keele, ‘Koita ne ki eesyo teegik, Ki kiyai nooto koek metitap luuita?’

¹⁸ Ak chii age tugul ne ibutyin koyata koilei konyaknyagansei; ak ineendet ne ibutyin koyata, konyirnyiraksei.”

Keteebse Jeso agobo kogoitoetap kodi

¹⁹ Ak ki cheeng' siriik ak tisiik che eecheen konam ineendet eng' sainooto; ak ki iywei icheek piik: amu ki nai kole mwaei kalewenoni agobo icheek.

²⁰ Ak kiriibooti icheeget ineendet ak koyookto segeik, che ki yaigei koek che po imanda, si kobiit koname ineendet ng'aleekyik, si kogoito ineendet kwo taitap pounateet ak kimnateetap pounindet.

²¹ Ak kiteebe ineendet kole, “Kaneetindoni, kingen keele imwae ak ineetisyei eng' iman, ago metiytiy chii, ak ineeti iman ooreetap Kamuktaindet:

²² Tos chamdoi ng'atuutik kigoochi kodi Caesarea, anan achicha?”

²³ Ago ki nai ng'aalseennywa, ak koleenji icheek,

²⁴ Oboorwo dinarit, Po ng'oo itooni ak siruutik che tinyei? Ak ki le, po Caesarea.

²⁵ Ak ki leenji icheek, Ogoochi Caesarea tuguuk che po Caesarea, ak ogoochi Kamuktaindet tuguuk che po Kamuktaindet.

²⁶ Ak ki ma imuuch koname mwaonooto eng' taitap piik; ak ki kwong'yo eng' waluunennyi, ak ki siisyo.

Keteebsen Jeso agobo ng'eetyeet

²⁷ Ak ki pwanji ineendet `Sadukaik alak, icheeget che mwaei kole, ma mi ng'eetyeet; ak kiteebe ineendet,

²⁸ kole, “Kaneetindoni, kisirwech Musa, kole, ‘Ngo me ng'eetap kam, ago tinyei osotyot, ne tomo kosich lakwa, kondii ng'eetap kam osotyondonooto, si kolalji ma ng'eetap kam.’

²⁹ Ki mi anyun weeriik tisabu che kitupcho: ak kiitunis ne po tai, ak kime ama ki sich lakwa;

³⁰ ak ki indi ne po aeng';

³¹ ak uu nooto ne po somok; ak ki igei nooto tugul ko tisap, ki pek ama sich lakwa.

³² Ak kingo pata kome agine kobogoryondonooto.

³³ Tuun eng' ng'eetyeet anyun koegu osotyotap ng'oo eng' icheek? Amu kiitun icheek tugul ko tisap.”

³⁴ Ki leenji `Jeso icheek, “Itunisyei weeriitap peetuusyechu, ak kogoitoi kitun:

³⁵ ago che kiityin keele nyoljin konyoor peetuusyechooto pwoonei, ak ng'eetyeet eng' che ki pek, koma tuun itunisyei, ama kigoitoi kitun:

³⁶ amu ma komuuchi kobek agoi: amu kergeitu ak malaikaisyek; ak icheeget ko weeriigap Kamuktaindet, amu weeriitap ng'eetyeet.

³⁷ Ago ng'eetos che ki kobek, amu ki iboor Musa agine eng' siruutik che tiliileen. Ye ki kisir agobo timdo ne kilolei, ye kiguure Kiptaiyat Kamuktaindetap Abraham, ak Kamuktaindetap Isak, ak Kamuktaindetap Jakobo.

³⁸ Ineendet koma Kamuktaindet ne po che ki kobek, ago po che saptos; amu saptos tugul eng' ineendet.”

³⁹ Ak ki wolji siriik alak koleenji, “Kaneetindoni, kaimwa komyee.”

⁴⁰ Amu ki mata kogany icheek koteebe ineendet teebut age tugul kogeny.

Kristo ko weeriitap Daudi?

⁴¹ Ak ki leenji icheek, Teptoi ano si komwaei icheek kole, “Kristo ko weeriitap Daudi?

⁴² Amu ki mwa Daudi ineendet eng' bukuitap Tyenwogigap Kalasunet, kole, ‘Ki leenji Kiptaiyat Kiptaiyandennyu, Tebee eunnyu ne po tai,

⁴³ Agoi ayai puuniguk koek ng'echereetap keelyeguk.’

⁴⁴ Kuuree anyun Daudi ineendet Kiptaiyat, koegundoi ano anyun weeriinnyi?”

Kanyool keriibegei siriik

⁴⁵ Ak ki mwachi kasubikyik kogasei piik tugul koleenji,

⁴⁶ Oriipkei eng' siriik, che chamei kobendat kolaachi ngoroik che kooen, ak kochamei kagatosyek eng' ole kiyae mung'aaret, ak ng'echerok che po tai eng' sinagogisyek, ak oldinwek che po tai eng' igoorwek;

⁴⁷ ak korebe mosoogik kooriikwak, ak kosaaei saautik che kooen kong'aalsei: tuun nyooru chuuto kirwooget ne oo kosiir.