LUKA 2 - Bukuit Ne Tilil

Sigetap Jeso

¹ Ki pun anyun ng'atuutyet Caesarea Agusto eng' peetuusyechooto kole, kesir kainaigap piik tugul.

² Ne po tai sirisyoni ye ki pounindetap Syria, Kurenio.

³ Ki pa anyun tugul si kesir, chii tugul eng' nganasennyi.

⁴ Ki togos agine Joseph eng' Galilaya kobunu nganaseetap Nazareth, agoi Judea, kot koit nganaseetap Daudi, ne kiguure Bethlehem, amu ki po ineendet kootap Daudi, ak ki po ooreennyi;

⁵ si kobiit kesir ineendet kobooto murerennyi Maria, ne ki chii oo.

⁶ Ak kiit sigeetap lakweet, kota komi olooto.

⁷ Ak ki sich weeriinnyi ne po tai; ak kolaakyi ngoroigap lakwandit, ak komogonji kaptugut, amu ki ma komi poroindo eng' kootap toek.

Mwaitaet agobo sigeetap Jeso

⁸ Ak ki mi emonooto mestoweek che kitebyei eng' keeweet koriibei akweennywa ne po keechiirek kemoi.

⁹ Ak ki tonon malaikaiyatap Kiptaiyat eng' ole neegitee icheek, ak ki iluuchi `liilindap Kiptaiyat komoswekwak tugul: koiyweis anyun miising'.

¹⁰ Ak ki leenji `malaikaiyat icheek, Amoiyweisye; ogeero, aibwok logoiywek che myach che po poiboiyet ne oo ne ityin piik tugul:

¹¹ amu kagisikwok Yetindet rani, eng' nganaseet ne po Daudi, nooto Kristo Kiptaiyat.

¹² Ak ni kaboorunet eng' okweek: Onyooru lakweet ko kagilaakyi ngoroigap lakwandit, korue moinget ne amisye tuuga.

¹³ Ak ki mi eng' sainooto kobooto malaikaiyandanooto chaang'indap lugosyegap kipsengwet che ki ilasu Kamuktaindet koleen,

¹⁴ Po teegisto Kamuktaindet, eng' ole toroor miising', Ak kaalyeet eng' ng'wony piik che chamaatiin eng' ineendet.

¹⁵ Ak kingo kagoweek malaikaisyek koba kipsengwet, koleenjigei mestowechooto, Ongebe nguno agoi Bethlehem, si kobiit kegeer ng'olyoondoniito kagoyaak, ne kagoboorwech Kiptaiyat.

¹⁶ Ak ki pwa anyun kochook, ak kinyoor Maria ak Joseph, ak lakweet korue moinget ne amisye tuuga.

¹⁷ Ak ye kingo keer kobarta mwaet ne kagagemwachi agobo lakwanooto.

¹⁸ Ak ki kwong'yo tugul che ki kas ng'aleechooto ki mwachi mestoweek.

¹⁹ Ago ki riip Maria ng'aleechooto tugul, kobwaatoti eng' muguleldanyi.

²⁰ Ak ki week anyun mestoweek, kotoroori Kamuktaindet ak kolasunoti eng' tuguuk tugul che kagogas ak che kagogeer, ko uu ye kagagemwachi.

Kagoitoetap Jeso eng' Hekaluut

²¹ Ak kingo it peetuusyek sisiit che kiyatitoe ineendet, keguure kainennyi Jeso, ko uu ye kiga kotoochi malaikaiyat kotomo kemanach.

Kemuti Jeso taitap Kiptaiyat

²² Ak kingo kagobata peetuusyegap katiliilennywa ko uu Ng'atuutyetap Musa, komut ineendet konyo Jerusalem, si kogoochi Kiptaiyat

²³ (ko uu ye ki kisir eng' Ng'atuutyetap Kiptaiyat, keele, Kiguure ne itabaanat agobo Kiptaiyat weeriit age tugul ne yaatei iyoteet),

²⁴ ak kogoito korosyot ko uu ye ki kimwa eng' Ng'atuutyetap Kiptaiyat, keele, Cheptugenik aeng', anan aarek aeng' che po cheptugenik.

²⁵ Ogeero, ki mi chiito age Jerusalem, ne ki kiguure Simion; ak ki chiito ne po iman ak kigonyiti Kamuktaindet, ne ki igeni kagaigaetap Israel: ak ki tebee `Kabuuset ne Tiliil ineendet.

²⁶ Ak kiga kong'aang'ji ineendet Kabuuset ne Tiliil, kole, ma keerei meet, kotom kogeer Kristo ne po Kiptaiyat.

²⁷ Ki nyo anyun Hekaluut eng' Kabuuset ne Tiliil: ak ye kingo muut sigiik lakweet Jeso, si kobiit koyachi ineendet ko uu piteetap Ng'atuutyet,

²⁸ konam anyun lakweet eng' eunekyik, ak kolas Kamuktaindet kole,

²⁹ “Ee, Kiptaiyat, ichamjini nguno otwogindeng'ung' kwo eng' kaalyeet, ko uu ng'olyoondeng'ung';

³⁰ amu kagogeer konyekyuk yetuneng'ung',

³¹ ne ki ichop eng' taitap piik tugul;

³² lapkeiyet ne po ng'ang'utyet ne king'aang'jin Pororyosyek, ak toroornatetap piiguk Israel.”

³³ Ak ki kwong'yo Joseph ak kametap lakweet agobo tuguuchooto kagimwa agobo ineendet;

³⁴ ak ki iberuur Simion icheek, ak koleenji Maria kamennyi, “Keero, kaginde lakwani si kobutyo che chaang' ak kong'eetyo che chaang' eng' Israel; asi koek kaboorunet ne tuun kieesyoi;

³⁵ (ee agot inyeendet ko tuun torei rotwetap chok muguleldang'ung';) si kobiit kong'ang'agis kabwaatutigap mugulelwegap piik che chaang'.”

³⁶ Ak ki miitei agine Anah, che po Phanuel, ne ki maotyo, ne po ooreetap Asher (ne kiga koosit miising'; ki tebi ak manong'otyot kenyiisyek tisap kobooch ngitun.

³⁷ Ak ki tebi ko kwony ne ki kosiirtoe manong'otyot kenyiisyek tamanwogik sisiit ak ang'wan), koma mandoi eng' Hekaluut, ak kolasu, kobooto karugutetapkei, ak soomutik, kemoi ak peet.

³⁸ Ak ki nyo eng' sainooto ak kogoochi Kamuktaindet kongoi, ak ki ng'alaalji tugul che ki igeni katyaget eng' Jerusalem agobo ineendet.

Koweektogei Nazareth

³⁹ Ak kingo kagogees tugul ko uu Ng'atuutyetap Kiptaiyat, koweektagei koba Galilaya, agoi nganasennywa Nazareth.

⁴⁰ Ak kiner lakweet, ak kotesak kimnateet, ak ki nyi utaatyet: ak ki mi myeeindap Kamuktaindet kobooto ineendet.

Komi Jeso Hekaluut

⁴¹ Ki cham kobendi sigiikyik kenyiit age tugul Jerusalem eng' igoorto ne po paska.

⁴² Ak ye ki po kenyiisyek taman ak aeng', kotogosta icheek koba Jerusalem ko uu piteet ne po igoorto;

⁴³ ak ye kingo woong' peetuusyek, ye ki weeksei, kong'et lakweet Jeso eng' Jerusalem: ak ki ma nai sigiikyik;

⁴⁴ ago ki leen mi kobooto piik che ki pendi tugul, koba anyun pandap peetuut komugul; ak ki cheeng' ineendet eng' kwenutap piigap ooreennywa ak che ki ingengei:

⁴⁵ ak ye ki ma nyoor ineendet, koweektagei Jerusalem, kocheeng'at.

⁴⁶ Ak ye kingo keskei peetuusyek somogu, konyoorchi ineendet Hekaluut, kotebyei eng' kwenutap kaneetik, koepchin iit ng'aleekwak, ak koteepse icheeget:

⁴⁷ ak ki kwong'yo icheek tugul che ki epchin iit ineendet amu naennyi ak waluunaikyik.

⁴⁸ Ak ye kingo keer ineendet, kokwong'yo: ak ki leenji `kamennyi ineendet, “Lakwani, kalya si iyaiywech ko uu ni? Keero, kogicheeng'in anee ak kwandang'ung' eng' arageneet.”

⁴⁹ Ak ki leenji icheek, “Amu nee si ocheeng'a? Ma onai ole kanyolja atebee poisyetap Abba?”

⁵⁰ Ki ma iguiyo icheek ng'olyoondonooto kamwachi.

⁵¹ Ki choorgei anyun kobooto icheeget, ak kiit Nazareth; ak kigase iit icheek: ak kigonor kamet ng'aleechooto tugul eng' muguleldanyi.

⁵² Ki tesak utaatyetap Jeso, ak etunateet, ak myeeindo eng' Kamuktaindet ak eng' piik.